សកម្មជនបក្សប្រឆាំងអះអាងថា គណបក្សភ្លើងទៀន ដែលបានប្រកាសគម្រោងធ្វើសមាជរបស់ខ្លួន គឺបានបង្ហាញយ៉ាងច្បាស់ថា គណបក្សនេះគ្មានឆន្ទៈរួបរួមជាមួយគណបក្សសង្គ្រោះជាតិបន្តទៀតនោះទេ។
សកម្មជនគណបក្សសង្គ្រោះជាតិ លោ ហ៊ុន កុសល បានប្រាប់សារព័ត៌មាន The Cambodia Daily នៅថ្ងៃទី៦ ខែសីហា ឆ្នាំ២០២១ ថា ការអះអាងថា កឹម សុខា និង សម រង្ស៊ី ជាមនុស្សតែមួយដែលអតីតមេបក្សប្រឆាំងលោក សម រង្ស៊ី តែងលើកឡើងកន្លងមកនោះ គ្រាន់តែការភូតកុហកអ្នកគាំទ្ររបស់ខ្លួនឯងប៉ុណ្ណោះ។
លោកអះអាងថា ការរួបរួមរវាងលោក កឹម សុខា និងលោក សម រង្ស៊ី ជាបំណងប្រាថ្នារបស់ប្រជាជនខ្មែរទូទាំងប្រទេស ប៉ុន្តែការបែកចេញពីស្មារតីរួមរបស់គណបក្សសង្គ្រោះជាតិនៅពេលនេះ គឺមានន័យថា សមាជិកអតីតបក្សប្រឆាំងបានយល់ព្រមចូលរួមកំដរល្បែងនយោបាយរបស់លោក ហ៊ុន សែន តែប៉ុណ្ណោះ។
លោកបញ្ជាក់ថា ដើម្បីបង្ហាញជំហររួបរួមដ៏ស្មោះត្រង់ និងគោរពតាមការចង់បានរបស់អ្នកគាំទ្រគណបក្សសង្គ្រោះជាតិ ភាគីនយោបាយខាងគណបក្សសិទ្ធិមនុស្ស បានដាក់ពាក្យទៅក្រសួងមហាផ្ទៃ ដើម្បីប្រកាសរំលាយបក្សនេះចេញពីឆាកនយោបាយតាំងពីឆ្នាំ២០១៨ មកម្ល៉េះ ដោយឡែកភាគីនយោបាយគណបក្សភ្លើងទៀនរបស់លោក សម រង្ស៊ី មិនបានអនុវត្តប្រកាសរំលាយគណបក្សរបស់ខ្លួនបែបនេះទេរហូតមកទល់នឹងពេលនេះ។
គណបក្សភ្លើងទៀនដែលជាអតីតគណបក្សរបស់លោក សម រង្ស៊ី បានប្រកាសពីគម្រោងបើកសមាជរបស់ខ្លួននៅចុងខែសីហា ខាងមុខនេះ។
កាលពីថ្ងៃទី៣១ ខែកក្កដា ឆ្នាំ២០២១ គណបក្សភ្លើងទៀន បានចេញសេចក្តីប្រកាសព័ត៌មានរបស់ខ្លួនស្ដីពីសេចក្តីសម្រេចនៃកិច្ចប្រជុំគណៈកម្មាធិការអចិន្ត្រៃយ៍គណបក្ស សម្រេចធ្វើសមាជសាមញ្ញរបស់គណបក្សនៅថ្ងៃទី២២ ខែសីហា ឆ្នាំ២០២១ ខាងមុខនេះ ដើម្បីជ្រើសរើសសមាសភាព និងកំណត់យុទ្ធសាស្ត្រថ្មីរបស់គណបក្សផងដែរ។
ការប្រកាសធ្វើសមាជគណបក្សភ្លើងទៀននេះ ត្រូវគេសង្ស័យថាជាសេណារីយ៉ូនយោបាយរបស់អតីតមេដឹកនាំប្រឆាំង លោក សម រង្ស៊ី ជាអ្នកនៅបញ្ជាពីក្រោយក្នុងគោលបំណងចូលរួមបោះឆ្នោតជ្រើសរើសក្រុមប្រឹក្សាឃុំ-សង្កាត់ឆ្នាំ២០២២ ខាងមុខនេះ ស្របពេលដែលមហាជនមើលឃើញថា លោក សម រង្ស៊ី កំពុងតែរកច្រកចូលស្រុកដើម្បីបន្តជីវិតនយោបាយរបស់ខ្លួនដែរនោះ។
គណបក្សសង្គ្រោះជាតិ ត្រូវបានបង្កើតឡើងដោយការច្របាច់បញ្ចូលគ្នារវាងគណបក្សសិទ្ធិមនុស្សរបស់លោក កឹម សុខា និងគណបក្ស សម រង្ស៊ី របស់លោក សម រង្ស៊ី ដែលបានប្តូរទៅជាគណបក្សភ្លើងទៀន ក្នុងពេលបច្ចុប្បន្ននេះ កាលពីថ្ងៃទី១៧ ខែកក្កដា ឆ្នាំ២០១២ នៅក្នុងទីក្រុងម៉ានីល ប្រទេសហ្វីលីពីន។
គិតចាប់ពីថ្ងៃទី១៧ ខែកក្កដា ឆ្នាំ២០១២ ដល់ថ្ងៃទី១៦ ខែវិច្ឆិកា ឆ្នាំ២០១៧ គណបក្សសង្គ្រោះជាតិ គឺមានអាយុជិត ៥ឆ្នាំកន្លះហើយ ប៉ុន្តែត្រូវតុលាការកំពូលប្រកាសរំលាយទាំងអយុត្តិធម៌ពីបទក្បត់ជាតិតាមប្រសាសន៍លោក ហ៊ុន សែន និងបានហាមឃាត់សិទ្ធិធ្វើនយោបាយមន្ត្រីជាន់ខ្ពស់បក្សនេះចំនួន ១១៨រូបផងដែរ។
ក្រុមអ្នកឃ្លាំមើលនិយាយថា ក្នុងរយៈពេលចុងក្រោយនេះ អតីតមេដឹកនាំបក្សប្រឆាំង លោក សម រង្ស៊ី ហាក់លែងមានភាពអត់ធ្មត់ និងទាមទារការរស់ឡើងវិញរបស់គណបក្សសង្គ្រោះជាតិទៀតហើយ ស្របពេលដែលគណបក្សនយោបាយដែលទើបនឹងបង្កើតថ្មី និងគណបក្សចាស់ដែលកំពុងរៀបចំកំណែទម្រង់ថ្មី ដែលគេសង្ស័យថាជាការរៀបចំរបស់លោក សម រង្ស៊ី បានចេញមកជាបន្តបន្ទាប់ ខណៈការបោះឆ្នោតឃុំ-សង្កាត់កំពុងតែខិតជិតមកដល់ដែរនោះ៕