ការតាមដានមួយបានកត់សម្គាល់ឃើញថា បក្សប្រជាជនកម្ពុជា ប្រើបណ្ដាញយុវជនឲ្យធ្វើសកម្មភាពរើសយកមនុស្សក្នុងសហគមន៍ខ្មែរឯបរទេសចូលជាសមាជិកបក្សក្តាប់អំណាច។
មានអ្នកសង្កេតការណ៍សួរថា តើគេមានបំណងអ្វី គេបង្កើតបណ្ដាញនៅបរទេសរបៀបណា ហើយអ្នកណាជាមេខ្លោងក្នុងរឿងនេះ?
ក្រុមយុវជនបក្សប្រជាជនកម្ពុជា បានផ្តើមធ្វើសកម្មភាពបញ្ចុះបញ្ចូលកៀងគរប្រជាពលរដ្ឋខ្មែរតាមសហគមន៍នៅសហរដ្ឋអាមេរិក និងកាណាដា ពីតំបន់ខាងកើតទៅខាងលិច ពីខាងជើងទៅខាងត្បូង ចាប់ពីឆ្នាំ២០១៥ ក្នុងអាណត្តិឯកអគ្គរាជទូត ជុំ ប៊ុនរ៉ុង។ សកម្មភាពបានបន្តរហូតមកដល់ពេលបច្ចុប្បន្ននេះ គឺមានរយៈពេលជាង ៦ឆ្នាំហើយ។
តាមការពិនិត្យតាមដាន និងតាមព័ត៌មានពីប្រភពច្បាស់ការណ៍ អ្នកដឹកនាំបក្សប្រជាជនកម្ពុជា ដើរតាមមាគ៌ាមេដឹកនាំបក្សកុម្មុយនីស្ត ឬបក្សពលករយៀកណាម ដើម្បីបណ្ដុះ និងពង្រឹងកម្លាំងយុវជនគ្រប់ទីកន្លែងដើម្បីស្នងកេរ សម្បាច់មនោគមន៍វិជ្ជាផ្ដាច់មុខ មិនឲ្យមានក្រុមបក្ខពួកណាមានគំនិតទស្សនវិស័យ ចក្ខុវិស័យខុសពីខ្លួន ចូលមកដណ្តើមយកអំណាចកាន់ជំនួសគេបានជាដាច់ខាត។
តាមមនោគមន៍វិជ្ជាបង្រៀនតាមសាលាកុម្មុយនីស្តនិយម និងសង្គមនិយម គេមានសម្មាទិដ្ឋិ ឬសេចក្តីយល់ឃើញត្រូវថា មនុស្សចាស់ៗជំនាន់មុនមិនយូរប៉ុន្មានក៏លាចាកលោកនេះអស់ទៅហើយ ដូច្នេះយុវជននេះហើយដែលជាទំពាំងស្នងឫស្សី ជាសសរទ្រូងទ្រទ្រង់បក្សរបស់គេទៅអនាគត។
គេមានសម្មាទិដ្ឋិទៀតថា មនុស្សជំនាន់ក្រោយ ឬយុវជនប្រុសស្រីជំនាន់ក្រោយ មិនសូវដឹងរឿងរ៉ាវពិតក្នុងអតីតកាលប៉ុន្មានដូចមនុស្សជំនាន់មុន ពីព្រោះគេមិនបង្រៀនពង្សាវតារពិតក្នុងសាលា ហើយម្យ៉ាងទៀត ឪពុកម្តាយអ្នកខ្លះក៏បានធ្វើមរណកាល។ យុវជនរៀនសូត្រប្រវត្តិសាស្ត្របែបថ្មីដែលអ្នកឈ្នះសរសេរតម្រូវតាមទ្រឹស្ដីនយោបាយរបស់គេ។
រាជរដ្ឋាភិបាលដឹកនាំដោយបក្សប្រជាជនកម្ពុជា ដែលមាននាយករដ្ឋមន្ត្រី ហ៊ុន សែន ជាអគ្គមគ្គុទ្ទេសក៍ ហើយដែលយកផ្លាករាជាធិបតេយ្យជាត្រីមុខ កំពុងតែព្យាយាមធ្វើការពិសោធន៍ ស្ទាបស្ទង់ វាស់វែង ថ្លឹងថ្លែងឲ្យដឹងអំពីទឹកចិត្តខ្មែរតាមសហគមន៍ឯបរទេស ថាតើមានចំនួនអ្នកគាំទ្របក្សកាន់អំណាចនេះប៉ុន្មានភាគរយ មិនគាំទ្រប៉ុន្មានភាគរយ។
បើចំនួនអ្នកគាំទ្រមានល្មមសមរម្យ ស្មើ ឬលើសពីចំនួនអ្នកប្រឆាំង រដ្ឋអំណាចនៃបក្សប្រជាជនកម្ពុជា នឹងអនុញ្ញាតឲ្យខ្មែរនៅបរទេសមានសិទ្ធិបោះឆ្នោតបានគ្រប់លំដាប់ថ្នាក់ គ្រប់សម័យកាល ព្រោះថាបច្ចុប្បន្ននេះ រដ្ឋអំណាចក្រុងភ្នំពេញមិនទាន់អនុញ្ញាតឲ្យខ្មែរចូលសញ្ជាតិបរទេសមានសិទ្ធិបោះឆ្នោតទេ លើកលែងតែអ្នកកាន់សញ្ជាតិ ឬអត្តសញ្ញាណប័ណ្ណពីរ គឺខ្មែរមួយ បរទេសមួយ។
សាខាក្រុមយុវជនបក្សប្រជាជនកម្ពុជាឯនាយសមុទ្រអង់គ្លេស ហៅថា CPP Overseas Youth Wing ក្រោមអធិបតីភាពឧត្តមសេនីយ៍ឯក ហ៊ុន ម៉ាណែត ក្រោយការតែងតាំង និងដាក់ទិសដៅពីឪពុករបស់ខ្លួននាឆ្នាំ២០២០ កំពុងអនុវត្តគម្រោងប្រមូលអ្នកគាំទ្រយុវវ័យខ្មែរអាមេរិកាំងតាមតំបន់ឲ្យចូលគាំទ្របក្ស ដោយសន្យាផ្តល់លាភសក្ការៈផ្សេងៗដែលយុវជនគិតថាមិនងាយ ឬមិនអាចរកបានក្នុងមួយជីវិតរបស់ខ្លួន។
គេរៀបចំជាអង្គការចាត់តាំង ហៅថាក្រុមការងារយុវជនបក្សឯនាយសមុទ្រ ឬហៅតាមអង់គ្លេសថា Overseas Youth Working Group។ នៅថ្ងៃទី២០ ខែឧសភា ឆ្នាំ២០២០ បក្សប្រជាជនកម្ពុជា តំណាងដោយលោក សាយ ឈុំ ជាអនុប្រធានបានចេញសេចក្តីសម្រេចតែងតាំងបំពេញបន្ថែមសមាជិកគណៈអចិន្ត្រៃយ៍យុវជនគណបក្សប្រជាជនកម្ពុជាថ្នាក់កណ្តាល ចំនួន ២៣នាក់ថែមទៀត ដើម្បីជួយកិច្ចការលោក ហ៊ុន ម៉ាណែត។ យើងនឹងរាយឈ្មោះជូនជ្រាបនៅពេលក្រោយ។
ដូចបានរាយការណ៍ពីសប្តាហ៍មុនថា សមាសភាពក្នុងក្រុមការងារយុវជនបក្សប្រជាជនកម្ពុជាឯនាយសមុទ្រ និងក្រុមការងារយុវជនបក្សឯនាយសមុទ្រ ភាគច្រើនជាមន្ត្រីក្នុងរាជរដ្ឋាភិបាល មានទាំងផ្នែកស៊ីវិល មានទាំងផ្នែកកងកម្លាំងប្រដាប់អាវុធ ដោយការជួយឧបត្ថម្ភគាំទ្រពីក្រុមឧកញ៉ាផងដែរ។
យើងបានរាយការណ៍ថា ក្នុងសហរដ្ឋអាមេរិក រួមនឹងប៉ែកខាងកើតសហរដ្ឋអាមេរិក (East Coast) តំបន់កណ្តាល-ខាងត្បូង ស្ថិតក្រោមការទទួលខុសត្រូវរបស់ឧត្តមសេនីយ៍ ម៉ឹង ពន្លក និង ជាម គុណណាត។
អ្នកស្រី ស៊ូ ឡាក់ ប្រធានក្រុមប្រឹក្សាសហគមន៍ខ្មែរអាមេរិកាំង បានប្រាប់សារព័ត៌មាន The Cambodia Daily ថា សកម្មភាពមន្ត្រីភ្នាក់ងារបម្រើផលប្រយោជន៍ពីប្រទេសកម្ពុជា ឬអ្នកឃោសនាជួយផ្ចុងផ្ដើមឲ្យគាំទ្របក្សប្រជាជនកម្ពុជា ទោះជាមាន ឬគ្មានកម្រៃ ទោះជាស្ម័គ្រចិត្តក៏ដោយ គេទាំងនោះបំពានច្បាប់សហរដ្ឋអាមេរិកហើយ បើសិនជាមិនរាយការណ៍ឲ្យក្រសួងយុត្តិធម៌ រៀងរាល់ ៦ខែម្តង។
ប៉ែកខាងលិចសហរដ្ឋអាមេរិក ស្ថិតក្រោម ណុប តារា អភិបាលរងខេត្តកណ្តាល មានឋានៈជាអនុប្រធានក្រុមការងារយុវជនបក្សប្រជាជនកម្ពុជា ប៉ែកខាងលិច (West Coast)។ ចៅ ជីអាន មានឋានៈជាអនុប្រធានក្រុមការងារបក្សប្រជាជនកម្ពុជា ប្រចាំប៉ែកខាងលិច និង កែវ វ៉ាន់នី មានឋានៈជាប្រធានក្រុមការងារបក្សប្រជាជនកម្ពុជា ប្រចាំរដ្ឋកាលីហ្វ័នីញ៉ា និង ហេង ប៊ុនថុន ជាប្រធានក្រុមការងារយុវជនបក្សប្រជាជនកម្ពុជាប្រចាំរដ្ឋវ៉ាស៊ីនតុន។
លោក សុស ច័ន្ទតារា ពលរដ្ឋខ្មែរអាមេរិកាំង ជាសមាជិកក្នុងសហគមន៍ខ្មែរអាមេរិកាំងនៅភាគពាយព្យ បានរ៉ាយរ៉ាប់ប្រាប់សារព័ត៌មាន The Cambodia Daily អំពីវិធីគេបញ្ចុះបញ្ចូលខ្មែរនៅសហរដ្ឋអាមេរិក គឺការសន្យាឲ្យមុខមាត់ និងកិត្តិយស។
កាលពីឆ្នាំ២០២០ ថ្ងៃទី១១ ខែមករា ក្រុមការងារបក្សប្រចាំប៉ែកខាងលិច បានរៀបចំពិធីជប់លៀងអបអរសាទរទិវាជ័យជម្នះថ្ងៃទី៧ មករា ខួបទី៤១ នៅក្រុង Portland រដ្ឋ Oregon ដោយមានឯកអគ្គរាជទូតខ្មែរប្រចាំសហរដ្ឋអាមេរិក ជុំ សុន្ទរី ជាតំណាងរាជរដ្ឋាភិបាលចូលរួម។ ពិធីជប់លៀងនោះ គេសង្កេតឃើញវត្តមានឈ្មោះ សេង សំអុន ជាប្រធានគណៈកម្មការសាខាក្រុមការងារយុវជនបក្ស និងអ្នកស្រី ចាន់ ថន ជាអនុប្រធានក្រុមការងារចាត់តាំងយុវជនបក្ស។
នៅក្រុង Seattle និង Tacoma រដ្ឋវ៉ាស៊ីនតុន មានពិធីជួបជុំគ្នានៅថ្ងៃទី៥ ខែមករា ឆ្នាំ២០២០ ដើម្បីបង្កើតសាខាក្រុមការងារយុវជនបក្សប៉ែកខាងលិចសហរដ្ឋអាមេរិក ក្រោមអធិបតីភាពឯកអគ្គរាជទូត ជុំ សុន្ទរី និងអភិបាលរងខេត្តកណ្តាល ណុប តារា អនុប្រធានក្រុមការងារចាត់តាំងយុវជនបក្ស លោក ហេង ប៊ុនថុន ប្រធានសាខាក្រុមការងារយុវជនបក្សប្រចាំរដ្ឋវ៉ាស៊ីនតុន។ ថ្ងៃទី៤ ខែមករា ឆ្នាំ២០២០ ឯកអគ្គរាជទូតខ្មែរ ជុំ សុន្ទរី ចូលរួមបើកកម្មវិធីបង្កើតសាខាក្រុមការងារយុវជនបក្សប្រចាំក្រុងឡងប៊ិច (Long Beach) ជាមួយឈ្មោះ ចៅ ជីអាន អនុប្រធានក្រុមការងារយុវជនបក្សប៉ែកខាងលិច និងឈ្មោះ កែវ វ៉ាន់នី ប្រធានក្រុមការងារយុវជនបក្សប្រចាំរដ្ឋកាលីហ្វ័នីញ៉ា។
លោក សុស ច័ន្ទតារា អធិប្បាយទៀតថា មានពលរដ្ឋខ្មែរអាមេរិកាំងខ្លះក៏លង់ក្នុងការចង់បានលាភសក្ការៈ មានលុយកាក់ និងបរិភោគអាហារមិនចេញលុយជាដើមនោះដែរ។
នៅរដ្ឋ Nevada ប៉ែកខាងលិចជាប់រដ្ឋកាលីហ្វ័នីញ៉ា នៃសហរដ្ឋអាមេរិក ក្រុមការងារយុវជនបក្សបានបង្កើតសាខានៅថ្ងៃទី៩ ខែមករា ឆ្នាំ២០២០ ហើយបានបើកពិធីជប់លៀងអបអរសាទរខួប៤១ឆ្នាំនៃទិវាជ័យជម្នះ ៧ មករា នៅក្រុង Las Vegas ដែលជាទីក្រុងកាស៊ីណូ ក្រោមអធិបតីភាពឯកអគ្គរាជទូត ជុំ សុន្ទរី។
កម្មវិធីនោះរៀបចំឡើងដោយប្រធានក្រុមការងារបក្ស ប៉ោ សួន ដោយមានការចូលរួមពីប្រធានក្រុមការងារយុវជនបក្សប្រចាំរដ្ឋកាលីហ្វ័នីញ៉ា កែវ វ៉ាន់នី ឈ្មោះ ថាច់ សេរីវុធ ប្រធានក្រុមការងារយុវជនបក្សប្រចាំរដ្ឋ Nevada និងគណៈប្រតិភូ។ នៅក្រុង Richfield រដ្ឋ Minnesota សាខាក្រុងការងារយុវជនបក្សអបអរសាទរជ័យជម្នះនៅថ្ងៃទី៥ ខែមករា ឆ្នាំ២០២០ ដោយមានអ្នកចូលរួមចំនួនប្រមាណ ៦០នាក់។
ប៉ែកកណ្តាល-ខាងត្បូងសហរដ្ឋអាមេរិក មានកិច្ចប្រជុំមួយដើម្បីបង្កើតសាខាក្រុមការងារយុវជនបក្សនៅរដ្ឋ Kentucky តាមបណ្ដាញឆ្លងឆ្លើយបន្តផ្ទាល់ហ៊្សូម (ZOOM) នៅថ្ងៃទី៥ ខែមករា ឆ្នាំ២០២០ ក្រោមអធិបតីភាពឧត្តមសេនីយ៍ ម៉ឹង ពន្លក ប្រធានក្រុមការងារយុវជនបក្សប្រជាជនកម្ពុជា ដោយមានឈ្មោះ សូ វីសុទ្ធី ជាប្រធាន និងឈ្មោះ ជិន ដេវិដ (Jin David) ជាប្រធានសាខាបក្សប្រចាំរដ្ឋ Kentucky។
សេចក្តីរាយការណ៍និយាយថា មានអ្នកចូលរួមប្រជុំតាមវីដេអូ និងអបអរសាទរខួប៤១ឆ្នាំនៃជ័យជម្នះ ៧ មករា មានចំនួន ២៣០នាក់។ នៅប៉ែកខាងកើតវិញ សាខាក្រុមការងារយុវជនបក្សនៅក្រុង Philadelphia រដ្ឋ Pennsylvania ក៏បានរៀបចំពិធីជប់លៀងខួបជ័យជម្នះ ៤១ឆ្នាំដែរ ដោយមានការចូលរួមពី ជាម គុណណាត រួមនឹងសាខាបក្សប្រចាំរដ្ឋ ទាំងរដ្ឋ Pennsylvania និងរដ្ឋ New Jersey ព្រមទាំងអគ្គកុងស៊ុលកិត្តិយសនៃប្រទេសកម្ពុជា មន្ត្រីក្នុងក្រុងជាច្រើនរូប និងសមាជិកសហគមន៍ខ្មែរសរុបប្រមាណ ៤០០នាក់។
លោក សុស ច័ន្ទតារា ក៏បានសម្ដែងក្តីបារម្ភដែរចំពោះការចូលជ្រៀតជ្រែកបំបែកខ្មែរតាមសហគមន៍ដែលខ្មែរនៅសហរដ្ឋអាមេរិក គួរព្យាយាមតាមដានតទៅទៀត។
ជនបរទេសម្នាក់ដែលបានសង្កេតឃើញសកម្មភាពដ៏សស្រាក់សស្រាំពីខាងបក្សប្រជាជនកម្ពុជា និងមន្ត្រីរាជរដ្ឋាភិបាល បានពោលទាំងក្តីព្រួយបារម្ភថា «ក្នុងខណៈដែលពលរដ្ឋខ្មែរនៅបរទេសមួយចំនួនកំពុងផ្ដោតលើរឿងនយោបាយក្នុងស្រុកខ្មែរ គេភ្លេចខ្លួនមិនបានគិតខ្វល់ខ្វាយអំពីគ្រោះថ្នាក់នៅមុខផ្ទះ និងក្រោយផ្ទះរបស់គេឡើយ។ គេមិនទាំងដឹងថា មនុស្សជាអ្នកជិតខាង ឬមិត្តភ័ក្ដិ សាច់សាលោហិតរបស់គេខ្លះ កំពុងឱបក្រសោបលទ្ធិកុម្មុយនីស្ដផ្ដាច់ការនៅក្នុងប្រទេសសេរីប្រជាធិបតេយ្យនោះផង។ តែបើដឹងវិញ តើគេធ្វើអ្វីដែរឬ?»។
លើកក្រោយ យើងនឹងពិនិត្យមើលថាតើគេចាយថវិកាពីប្រភពណាក្នុងការជួបជុំអបអរសាទរទិវាជ័យជម្នះ និងដំណើរចេញចូលពីគ្រាមុនវីរុសកូវីដ-១៩ រាតត្បាតពិភពលោក៕