ប្រជាពលរដ្ឋ និងក្រុមអាជីវកររស់នៅក្រុងព្រះសីហនុ សម្ដែងការព្រួយបារម្ភលាយឡំនឹងការរិះគន់លោក គួច ចំរើន អភិបាលខេត្តព្រះសីហនុ ចំពោះសមត្ថភាពលើការងារដឹកនាំទប់ស្កាត់បទល្មើសចាប់បង្ខាំងមនុស្សជំរិតទារប្រាក់ បទល្មើសជួញដូរអាវុធ បទល្មើសជួញដូរគ្រឿងញៀន និងសកម្មភាពបាញ់បោះសេរី និងបទល្មើសល្បែងស៊ីសងគ្រប់ប្រភេទដែលកំពុងកើតមានឡើងនៅខេត្តព្រះសីហនុ យ៉ាងកក្រើក។
ពលរដ្ឋនៅខេត្តនេះបានលើកឡើងថា អាជ្ញាធរមានសមត្ថកិច្ចហាក់បណ្តោយឲ្យជនល្មើសអាចធ្វើសកម្មភាពយ៉ាងអនាធិបតេយ្យ ដែលបង្កការភ័យខ្លាចពីសុវត្ថិភាពក្នុងការរស់នៅ និងប៉ះពាល់ដល់ការប្រកបមុខរបរប្រចាំថ្ងៃរបស់ពួកគាត់។
ក្រុមប្រជាពលរដ្ឋបង្ហាញក្ដីព្រួយបារម្ភពីសុវត្ថិភាពក្នុងការធ្វើដំណើរ ការរស់នៅ និងការប្រកបមុខរបរចិញ្ចឹមជីវិតប្រចាំថ្ងៃ ត្បិតពួកគាត់តែងតែសង្កេតឃើញថា ក្រុមជនល្មើសដែលភាគច្រើនជាជនជាតិចិន បានចេញធ្វើសកម្មភាពចាប់មនុស្សបង្ខាំងទារប្រាក់ និងប្លន់ប្រដាប់អាវុធជាដើម បានកើតមានជាច្រើនករណីនៅក្នុងខេត្តព្រះសីហនុ ក្បែរៗតំបន់ដែលពួកគាត់រស់នៅ។
កាលពីថ្ងៃទី១០ ខែកញ្ញា ឆ្នាំ២០២១ កន្លងមកថ្មីៗនេះ មានក្រុមជនល្មើសជនជាតិចិនមួយក្រុមមានគ្នាជាង ១០នាក់ បានធ្វើសកម្មភាពចាប់ជនជាតិចិនដូចគ្នាដើម្បីបង្ខាំងជំរិតទារប្រាក់ មានទីតាំងនៅចុងឆ្នេរអូរឈើទាល ក្បែរកាស៊ីណូជីងកាង ស្ថិតនៅភូមិ៤ សង្កាត់លេខ៤ ក្រុងព្រះសីហនុ។ សកម្មភាពនោះ គឺមានផ្ទុះអាវុធដាក់គ្នារវាងជនល្មើសបាញ់តដៃគ្នាជាមួយកម្លាំងសមត្ថកិច្ចចម្រុះ ដែលករណីនេះបានបង្កឲ្យមានការភ្ញាក់ផ្អើលស្ទើរមួយចំហៀងក្រុងព្រះសីហនុ។
បទល្មើសនេះ សមត្ថកិច្ចនគរបាល និងកងរាជអាវុធហត្ថខេត្តព្រះសីហនុ បានសហការចុះបង្ក្រាប និងចាប់ខ្លួនជនសង្ស័យចំនួន ១៤នាក់ ដកហូតអាវុធវែងខ្លីចំនួន ៧ដើម និងរំដោះជនរងគ្រោះជនជាតិចិន បានម្នាក់ផងដែរ។
បច្ចុប្បន្ន ជនសង្ស័យទាំង ១៤នាក់ រួមជាមួយវត្ថុតាង ត្រូវបានបញ្ជូនទៅកាន់ទីបញ្ជាការកងរាជអាវុធហត្ថខេត្តព្រះសីហនុ ដើម្បីសាកសួរ និងកសាងសំណុំរឿងបញ្ជូនទៅកាន់សាលាដំបូងខេត្តព្រះសីហនុ ផ្ដន្ទាទោសតាមច្បាប់៕