អ្នកស្រី អ៊ុងសាន ស៊ូជី អតីតទីប្រឹក្សារដ្ឋមានឋានៈស្មើនឹងប្រធានាធិបតី បានថ្លែងថា ការបង្កើតរដ្ឋាភិបាលឯកភាពជាតិ និងកម្លាំងរបស់រដ្ឋាភិបាលនេះ គឺជាសិទ្ធិ និងឆន្ទៈរបស់ប្រជាជន។
បើតាមមេធាវីរបស់អ្នកស្រី គឺអ្នកស្រី ស៊ូជី បានថ្លែងដូចនេះនៅក្នុងការជំនុំជម្រះក្ដីលើសំណុំរឿងពុករលួយប្រឆាំងនឹងអតីតទីប្រឹក្សារដ្ឋភូមារូបនេះ ហើយចម្លើយរបស់អ្នកស្រី គឺជាការឆ្លើយតបទៅនឹងការចោទសួររបស់រដ្ឋអាជ្ញាដែលបានសួរអ្នកស្រីថា តើមានជាប់ពាក់ព័ន្ធនឹងការបង្កើតរដ្ឋាភិបាលឯកភាពជាតិដែរឬទេ។ នេះបើតាមវិទ្យុ RFA ជាភាសាភូមា ដែលបានធ្វើសេចក្ដីរាយការណ៍នៅថ្ងៃអង្គារ ទី២១ កញ្ញា នេះ។
តាមមេធាវី Khin Maung Zaw ការបើកសវនាការជំនុំជម្រះក្ដីករណីអ្នកស្រី ស៊ូជី កាលពីថ្ងៃចន្ទ ទី២០ កញ្ញា គឺមានជិត ១១សំណុំរឿង។
ក្រុមមេធាវីរបស់អ្នកស្រី ស៊ូជី បានចេញសេចក្ដីថ្លែងការណ៍ភ្លាមៗក្រោយពីសវនាការបិទបញ្ចប់។ សេចក្ដីថ្លែងការណ៍បានស្រង់សម្ដីរបស់អ្នកស្រី ស៊ូជី ដែលបានថ្លែងនៅក្នុងសវនាការដែលថា អ្នកស្រី ស៊ូជី បានប្រាប់ទៅចៅក្រម និងរដ្ឋអាជ្ញាថា អ្នកស្រីពុំដែលមានគំនិតប្រឆាំងនឹងឆន្ទៈរបស់ប្រជាជនក្នុងការតស៊ូដើម្បីសេរីភាពនោះទេ។
មេធាវី លោក Khin Maung Zaw អះអាងថា ក្រុមមេធាវីបានជួបអ្នកស្រី ស៊ូជី បានប្រហែលកន្លះម៉ោងមុនសវនាការចាប់ផ្ដើម។ មេធាវីរូបនេះថា មុនថ្ងៃបើកសវនាការ គឺក្រុមប៉ូលិស និងរដ្ឋអាជ្ញាបានទៅជួបអ្នកស្រី ស៊ូជី ដើម្បីយកចម្លើយពីអ្នកស្រីអំពីការបង្កើតរដ្ឋាភិបាលឯកភាពជាតិ។ តែនៅពេលនោះ អ្នកស្រី ស៊ូជី នៅតែប្រកាន់ជំហរថា ទោះជាអ្នកស្រីមិនចូលពាក់ព័ន្ធ ឬអនុម័តក៏ដោយ តែអ្នកស្រីគ្មានសិទ្ធិប្រឆាំង ឬរាំងខ្ទប់ចលនានេះទេ ព្រោះវាជាឆន្ទៈ និងជាសិទ្ធិរបស់ប្រជាជន។
កាលពីថ្ងៃទី៧ កញ្ញា រដ្ឋាភិបាលដែលបង្កើតឡើងដោយអ្នកនយោបាយគាំទ្រលទ្ធិប្រជាធិបតេយ្យមានឈ្មោះថា រដ្ឋាភិបាលរួបរួមជាតិ ឬឯកភាពជាតិភូមា បានប្រកាសធ្វើសង្គ្រាមផ្ដួលរំលំរបបយោធាដោយអំពាវនាវឱ្យក្រុមប្រដាប់អាវុធ និងជនស៊ីវិលដាក់គោលដៅលើពួកយោធា និងទ្រព្យសម្បត្តិរបស់ក្រុមនេះក្នុងការវាយប្រហារ។
លោក Duwa Lashi La ប្រធានស្តីទីនៃរដ្ឋាភិបាលឯកភាពជាតិ បាននិយាយថា នេះគឺជាការចាប់ផ្តើមនៃការបះបោរទូទាំងប្រទេស។ លោកបានព្រមានប្រជាជនឱ្យចៀសវាងការធ្វើដំណើរដែលមិនចាំបាច់ ហើយត្រូវស្តុកទុកស្បៀងអាហារក្នុងផ្ទះចាប់ពីពេលនេះតទៅ ព្រោះសង្គ្រាមទ្រង់ទ្រាយធំ និងសង្គ្រាមវាយឆ្មក់ចាប់ផ្ដើមនៅទូទាំងប្រទេសហើយ។
ក្នុងរយៈពេលប៉ុន្មានខែចុងក្រោយនេះ កម្លាំងមូលដ្ឋានរបស់ប្រជាជនបានលេចឡើងនៅទូទាំងប្រទេសភូមា គឺដើម្បីប្រឆាំងនឹងរបបយោធាដែលបានដណ្តើមអំណាចតាមរយៈរដ្ឋប្រហារកាលពីខែកុម្ភៈ និងបានបង្កអំពើហិង្សាទៅលើប្រជាជនដែលចេញមុខប្រឆាំងនឹងរបបនេះ។
លោក Duwa Lashi La ក៏បានអំពាវនាវដល់ក្រុមជនជាតិភាគតិចទាំងឡាយក្នុងពេលនេះ ត្រូវវាយប្រហារលើរបបយោធា និងទ្រព្យសម្បត្តិរបស់ក្រុមនេះនៅក្នុងតំបន់រៀងៗខ្លួន ហើយត្រូវចេះការពារជីវិត និងទ្រព្យសម្បត្តិរបស់ប្រជាជនដោយប្រុងប្រយ័ត្ន។ លោកបន្តថា ត្រូវវាយលើថ្នាក់ដឹកនាំរបបយោធា មានដូចជាមេរដ្ឋប្រហារ មីន អ៊ុងឡាំង និងក្រុមប្រឹក្សាយោធាទៅតាមវិធីផ្សេងៗគ្នា។
លោក Duwa Lashi La ក៏ទទូចដល់ទាហាន ប៉ូលិស និងមន្ត្រីរាជការ គួរតែលាលែងពីតំណែង ហើយចូលរួមក្នុងការបះបោរនេះ។ ជាងនេះទៅទៀត លោកបន្តសុំឲ្យមន្ត្រីរដ្ឋការទាំងអស់ដែលនៅក្រោមក្រុមប្រឹក្សាយោធា មិនត្រូវទៅការិយាល័យ គឺត្រូវធ្វើពហិការមិនបម្រើការងារឱ្យរបបសឹកមួយនេះ។
ក្រោយពីការប្រកាសបែបនេះ គេសង្កេតឃើញកងកម្លាំងរបស់រដ្ឋាភិបាលឯកភាពជាតិគាំទ្រដោយកងទ័ពជនជាតិដើមនៃបណ្ដារដ្ឋប្រឆាំងពួកយោធា បានបង្កើនការវាយប្រហារទៅលើពួកយោធានៅទូទាំងប្រទេស។ ការវាយឆ្មក់បានបំផ្លាញប៉ុស្តិ៍យាម និងអង់តែនវិទ្យុទាក់ទងរបស់ពួកយោធាជិត ២០០ទីតាំង ហើយមិនតែប៉ុណ្ណោះ ការវាយឆ្មក់នេះបានវាយកម្ទេចទ្រព្យសម្បត្តិពួកយោធារាប់សិបកន្លែងផងដែរ។ ចាប់តាំងពីការប្រកាសបើកសង្គ្រាមរបស់កងទ័ពនៃក្រុមរដ្ឋាភិបាលឯកភាពជាតិនេះ ពួកយោធាបានស្លាប់កាន់តែកើនឡើង គឺរាប់រយនាក់ ហើយរត់ចុះចូលនឹងកម្លាំងការពារប្រជាជន និងកងទ័ពរដ្ឋាភិបាលឯកភាពជាតិកាន់តែកើនឡើង។
ចាប់តាំងពីពួកយោធាធ្វើរដ្ឋប្រហារប្លន់អំណាចនៅថ្ងៃទី១ ខែកុម្ភៈ មក ប្រជាជនស្លាប់ដោយសារការវាយបង្ក្រាប និងបាញ់សម្លាប់កើនឡើង ១១១៤នាក់ និងចាប់ខ្លួនជាង ៦៦០០នាក់ ក្នុងនោះមានអ្នកនយោបាយក្រោមការដឹកនាំរបស់អ្នកស្រី ស៊ូជី ចំនួន ៣០០នាក់។ នេះបើយោងតាមរបាយការណ៍របស់សមាគមជំនួយសម្រាប់អ្នកទោសនយោបាយភូមា។
ចំពោះអ្នកស្រី ស៊ូជី រងបទចោទ ១១ករណី ក្នុងនោះរួមមាន អំពើពុករលួយ ការបំពានច្បាប់គ្រាមានអាសន្នដាក់ប្រទេសក្នុងស្ថានភាពជំងឺឆ្លងកូវីដ-១៩ និងការទិញវិទ្យុទាក់ទងដោយលួចលាក់ ដែលជាទោសក្បត់ជាតិ។ បទចោទទាំងនេះនាំឱ្យអ្នកស្រីប្រឈមនឹងការផ្ដន្ទាទោសជាង ១០០ឆ្នាំ។
មេធាវីបានប្រាប់អ្នកសារព័ត៌មានថា អ្នកស្រី ស៊ូជី ដែលមានអាយុ ៧៦ឆ្នាំនៅមានសុខភាពរឹងមាំ។ សវនាការករណីអ្នកស្រី ស៊ូជី ដែលបានធ្វើឡើងនៅពេលនេះ ត្រូវបានមើលឃើញថាជាឈុតឆាកមួយរបស់ពួកយោធា មានផែនការរំលាយគណបក្សសម្ព័ន្ធជាតិប្រជាធិបតេយ្យ ក្រោមលេសចោទថា ជ័យជម្នះរបស់បក្សនេះនៅក្នុងការបោះឆ្នោតកាលពីខែវិច្ឆិកា ឆ្នាំ២០២០ គឺជាការលួចបន្លំ និងជាលទ្ធផលក្លែងក្លាយនាំឱ្យមានរដ្ឋប្រហារកើតឡើង៕