រដ្ឋមន្ត្រីក្រសួងមហាផ្ទៃ លោក ស ខេង អះអាងថា ទំនាក់ទំនងរវាងកម្ពុជា-ចិន និងកិច្ចសហប្រតិបត្តិការជិតស្និទ្ធលើគ្រប់វិស័យក្នុងភាពជាដៃគូយុទ្ធសាស្ត្រគ្រប់ជ្រុងជ្រោយ បាននាំមកនូវវឌ្ឍនភាព និងការអភិវឌ្ឍរីកចម្រើនសម្រាប់កម្ពុជា និងសាធារណរដ្ឋប្រជាមានិតចិន។
រដ្ឋមន្ត្រីក្រសួងមហាផ្ទៃ លោក ស ខេង បានលើកឡើងបែបនេះបន្ទាប់ពីមានកិច្ចប្រជុំមួយរវាងកម្ពុជា-ចិន ស្ដីពីការបន្តអនុវត្តឆ្នាំបន្តនៃកិច្ចសហប្រតិបត្តិការអនុវត្តច្បាប់រវាងក្រសួងមហាផ្ទៃរបស់កម្ពុជា និងក្រសួងសន្តិសុខសាធារណៈនៃសាធារណរដ្ឋប្រជាមានិតចិន នៅថ្ងៃពុធ សប្តាហ៍នេះ។
លោក ស ខេង បានសរសេរលើទំព័រ Facebook របស់លោកនៅថ្ងៃទី២៩ ខែកញ្ញា នេះថា កិច្ចសហប្រតិបត្តិការនេះបានចែករំលែក និងផ្លាស់ប្ដូរទៅវិញទៅមកនូវសភាពការណ៍សន្តិសុខទូទៅ និងអាចជួយគាំទ្រគ្នាទៅវិញទៅមកលើការកសាងសមត្ថភាពកងកម្លាំង ជាពិសេសកិច្ចសហការទប់ស្កាត់ និងបង្ក្រាបបទល្មើសឆ្លងដែនគ្រប់ប្រភេទជាដើម។
លោក ស ខេង អះអាងថា កម្ពុជានឹងបន្តពង្រឹងកិច្ចសហប្រតិបត្តិការទប់ស្កាត់បទល្មើសឆ្លងដែនគ្រប់ប្រភេទ ជាពិសេសឧក្រិដ្ឋកម្មដែលមានអង្គការចាត់តាំង ដូចជាល្បែងស៊ីសងអនឡាញខុសច្បាប់ អំពើឆបោកតាមប្រព័ន្ធទូរគមនាគមន៍ និងការជួញដូរគ្រឿងញៀនខុសច្បាប់ជាដើម។
នៅថ្ងៃទី២៩ ខែកញ្ញា ឆ្នាំ២០២១ នេះ រដ្ឋមន្ត្រីក្រសួងមហាផ្ទៃ លោក ស ខេង បានបើកកិច្ចប្រជុំពិភាក្សាលើផែនការស្ដីពីការបន្តអនុវត្តឆ្នាំនៃកិច្ចសហប្រតិបត្តិការអនុវត្តច្បាប់ជាមួយសមាជិកក្រុមប្រឹក្សារដ្ឋ និងជារដ្ឋមន្ត្រីក្រសួងសន្តិសុខសាធារណៈនៃសាធារណរដ្ឋប្រជាមានិតចិន លោក ចាវ ឃើជឺ ដើម្បីចុះហត្ថលេខាសហការគ្នារវាងប្រទេសទាំងពីរបន្តទៀត។
កិច្ចសហប្រតិបត្តិការអនុវត្តច្បាប់រវាងកម្ពុជា-ចិន បានចាប់ផ្តើមឡើងកាលពីខែមេសា ឆ្នាំ២០១៩ កន្លងទៅ ដែលបានចុះហត្ថលេខាព្រមព្រៀងគ្នារវាងលោកនាយករដ្ឋមន្ត្រី ហ៊ុន សែន និងប្រធានាធិបតីនៃសាធារណរដ្ឋប្រជាមានិតចិន លោក ស៊ី ជីនពីង។
ជុំវិញបញ្ហានេះ របាយការណ៍របស់អគ្គនាយកដ្ឋានអន្តោប្រវេសន៍ កាលពីចុងឆ្នាំ២០២០ បង្ហាញថា កម្ពុជាមានជនជាតិចិនសរុបដែលកំពុងស្នាក់អាស្រ័យ និងប្រកបអាជីវកម្មនៅកម្ពុជាមានប្រមាណជាង ១០ម៉ឺននាក់ ហើយពួកគេភាគច្រើនប្រកបរបរវាយនភ័ណ្ឌ ទេសចរណ៍ សំណង់ ហាងទំនិញខ្នាតតូច និងភោជនីយដ្ឋាន ក្នុងនោះជនជាតិចិនមួយចំនួនក៏បាននាំគ្នាប្រព្រឹត្តបទល្មើសខុសច្បាប់របស់កម្ពុជាផងដែរ។
ប្រភពដដែលបញ្ជាក់ថា ជនជាតិចិនប្រមាណជាង ៣ពាន់នាក់ដែលក្រសួងបានបណ្តេញចេញពីកម្ពុជា ភាគច្រើនប្រព្រឹត្តបទល្មើសដូចជាការឆបោកតាមប្រព័ន្ធទូរគមនាគមន៍ និងល្បែងអនឡាញ ការស្នាក់នៅខុសច្បាប់ និងការលួចឆ្លងដែនខុសច្បាប់ ជាដើម។
ជុំវិញបញ្ហានេះ ក្រុមអ្នកឃ្លាំមើលសង្គម លើកឡើងថា បើទោះបីជាមានកិច្ចសហប្រតិបត្តិការអនុវត្តច្បាប់រវាងកម្ពុជា-ចិនក៏ដោយ ក៏ពលរដ្ឋខ្មែរនៅតែមានការព្រួយបារម្ភអំពីការហូរចូលនៃជនជាតិចិន ដែលចូលទៅរស់នៅលើទឹកដីកម្ពុជា ដូចជាខេត្តព្រះសីហនុ ខេត្តសៀមរាប និងទីក្រុងភ្នំពេញ ជាដើម។
ប្រភពដដែលបញ្ជាក់ថា ជនជាតិចិនដែលចូលទៅរស់នៅប្រទេសកម្ពុជាទាំងនោះបានបង្កអសន្តិសុខដល់សង្គមយ៉ាងធ្ងន់ធ្ងរ ដូចជាការចាប់ជំរិត ប្លន់យកទ្រព្យសម្បត្តិ និងការប្រព្រឹត្តអំពើល្មើសផ្សេងៗ។ បញ្ហានេះ បើទោះបីជាមានការបង្ក្រាបពីសំណាក់អាជ្ញាធរក៏ដោយ ក៏នៅតែបន្តកើតមានដដែល។
ជាក់ស្តែង កម្លាំងនគរបាលជំនាញប្រឆាំងគ្រឿងញៀននៃស្នងការដ្ឋាននគរបាលខេត្តព្រះសីហនុ បានឃាត់ខ្លួនជនសង្ស័យជាជនជាតិចិនចំនួន ៦នាក់ ស្ថិតក្នុងសង្កាត់លេខ២ និងសង្កាត់លេខ៤ ក្រុងខេត្តព្រះសីហនុ ពាក់ព័ន្ធបទល្មើសជួញដូរ និងប្រើប្រាស់គ្រឿងញៀន។
ប្រតិបត្តិការចុះចាប់នេះ ដឹកនាំសម្របសម្រួលដោយលោក ហួត វិចិត្រ ព្រះរាជអាជ្ញារងអមសាលាដំបូងខេត្តព្រះសីហនុ កាលពីថ្ងៃទី២៦-២៧ ខែកញ្ញា ឆ្នាំ២០២១។ ប្រតិបត្តិការនេះ សមត្ថកិច្ចបានដកហូតវត្ថុតាងមួយចំនួន រួមមានថ្នាំញៀនកេតាមីន ថ្នាំញៀន Ice ថ្នាំញៀន WY កញ្ឆាក្រៀម ថ្នាំដបពណ៌មាស ជញ្ជីងថ្លឹងថ្នាំ រថយន្តចំនួន ២គ្រឿង និងទូរស័ព្ទចំនួន ១០គ្រឿង។
បច្ចុប្បន្ន ជនសង្ស័យទាំង ៦នាក់រួមជាមួយវត្ថុតាង ត្រូវបានកម្លាំងជំនាញនាំទៅកាន់ស្នងការដ្ឋាននគរបាលខេត្តព្រះសីហនុ ដើម្បីសាកសួរ និងចាត់ការតាមនីតិវិធីច្បាប់៕