អ្នកជំនាញសិទ្ធិមនុស្សរបស់អង្គការសហប្រជាជាតិ បានរិះគន់ថា ការធ្វើនយោបាយផ្ដាច់មុខរបស់រដ្ឋាភិបាលកម្ពុជា បានបញ្ជាក់យ៉ាងច្បាស់អំពីការធ្លាក់ចុះនូវគុណភាពនៃរបបប្រជាធិបតេយ្យដែលបានជះឥទ្ធិពលអាក្រក់យ៉ាងខ្លាំងលើការអនុវត្តច្បាប់ផ្សេងៗហួសហេតុ ដូចជាការអនុវត្តច្បាប់ក្រមព្រហ្មទណ្ឌ ជាដើម។
អ្នករាយការណ៍ពិសេសរបស់អង្គការសហប្រជាជាតិ ប្រចាំនៅកម្ពុជា លោក វិទិត មុនតាប៊ន (Vitit Muntarbhorn) បានបញ្ចេញរបាយការណ៍លើកដំបូងស្ដីពីសិទ្ធិមនុស្សនៅកម្ពុជា ដែលត្រូវបានផ្សព្វផ្សាយនៅថ្ងៃនេះថា ចាប់តាំងពីរដ្ឋាភិបាលកម្ពុជារំលាយគណបក្សសង្គ្រោះជាតិ នៅឆ្នាំ២០១៧ មក លំហប្រជាធិបតេយ្យនៅកម្ពុជាបានបន្តធ្លាក់ចុះយ៉ាងធ្ងន់ធ្ងរ ដែលជាឧបសគ្គមិនអាចឆ្ពោះទៅរកការផ្សះផ្សានយោបាយបាន។ អ្នករាយការណ៍ពិសេសរូបនេះអះអាងថា កម្ពុជាសព្វថ្ងៃនេះបានក្លាយជាប្រទេសដែលដឹកនាំដោយរដ្ឋាភិបាលឯកបក្ស ដែលអាចឱ្យគណបក្សកាន់អំណាចរបស់លោក ហ៊ុន សែន កាន់កាប់អាសនៈទាំងអស់នៅក្នុងរដ្ឋសភា ដែលធ្វើឱ្យមូលដ្ឋានអំណាចនយោបាយបក្សកាន់អំណាចប្រមូលផ្តុំខ្ពស់រហូតគ្មានស្ថាប័នជាតិណាមួយអាចគ្រប់គ្រងបាន។
លោក វិទិត មុនតាប៊ន (Vitit Muntarbhorn) បញ្ជាក់ថា ស្ថានភាពនយោបាយនៅកម្ពុជាសព្វថ្ងៃនេះ បើទោះបីជាមានគណបក្សនយោបាយក្រៅរដ្ឋាភិបាលច្រើនក៏ដោយ ប៉ុន្តែនៅមិនទាន់អាចធានាថា តើការបោះឆ្នោតជ្រើសរើសក្រុមប្រឹក្សាឃុំ-សង្កាត់ក្នុងឆ្នាំ២០២២ និងការបោះឆ្នោតជ្រើសរើសតំណាងរាស្ត្រក្នុងឆ្នាំ២០២៣ ខាងមុខអាចទុកចិត្តបានដែរឬក៏អត់នោះទេ។
កាលពីថ្ងៃទី១ ខែតុលា ឆ្នាំ២០២១ អ្នករាយការណ៍ពិសេសរបស់អង្គការសហប្រជាជាតិ លោក វិទិត មុនតាប៊ន (Vitit Muntarbhorn) បានចេញរបាយការណ៍ស្ដីពីស្ថានភាពសិទ្ធិមនុស្សនៅកម្ពុជាលើកដំបូងរបស់ខ្លួន ដែលរិះគន់រដ្ឋាភិបាលកម្ពុជាធ្ងន់ធ្ងរ ដូចជាការតាក់តែងច្បាប់ផ្សេងៗដោយឯកបក្សដើម្បីបំបិទសិទ្ធិសេរីភាពបញ្ចេញមតិរបស់ពលរដ្ឋ និងរិះគន់លើការអនុវត្តច្បាប់ក្រមព្រហ្មទណ្ឌដើម្បីចាប់ខ្លួនសកម្មជននយោបាយ និងសកម្មជនសិទ្ធិមនុស្ស ជាដើម។
យ៉ាងណាក៏ដោយ កាលពីចុងខែឧសភា ឆ្នាំ២០២១ លោក ហ៊ុន សែន អះអាងថា កម្ពុជាកំពុងតែអនុវត្តប្រព័ន្ធប្រជាធិបតេយ្យរបស់ខ្លួនបានយ៉ាងល្អ ព្រោះថាមន្ត្រីជាន់ខ្ពស់បក្សប្រឆាំងបាននាំគ្នាសុំសិទ្ធិធ្វើនយោបាយឡើងវិញជាបន្តបន្ទាប់ ខណៈមន្ត្រីមួយចំនួនកំពុងរៀបចំបង្កើតគណបក្សនយោបាយថ្មីដោយខ្លួនឯងដើម្បីចូលរួមការបោះឆ្នោតក្នុងឆ្នាំ២០២២ និងឆ្នាំ២០២៣ ខាងមុខ។
ក្រុមអ្នកឃ្លាំមើលសង្គមអះអាងថា បច្ចុប្បន្ននេះ ស្ថាប័នដែលជាសសរស្ដម្ភធំៗទាំង៣ របស់ជាតិ គឺស្ថាប័ននីតិប្បញ្ញត្តិ ស្ថាប័ននីតិប្រតិបត្តិ និងស្ថាប័នតុលាការ បានក្លាយជាឧបករណ៍របស់បក្សកាន់អំណាចទាំងស្រុង ព្រោះថាមេដឹកនាំបក្សកាន់អំណាចបានពង្រាយសមាជិកបក្សរបស់ពួកគេចូលទៅគ្រប់គ្រងស្ថាប័នទាំងនោះតាំងពីថ្នាក់ជាតិរហូតដល់ថ្នាក់មូលដ្ឋាន។
ប្រភពដដែលលើកឡើងថា ដោយសាររៀបចំបែបនេះ ត្រូវគេមើលឃើញថា កម្ពុជាកំពុងឆ្ពោះទៅរកការបាត់បង់នីតិរដ្ឋ និងអធិបតេយ្យភាពរបស់ខ្លួនទាំងស្រុង ព្រោះថាលោក ហ៊ុន សែន ដែលត្រូវគេចាត់ទុកថាជាបុរសខ្លាំងនៅកម្ពុជា ឧស្សាហ៍គំរាមពលរដ្ឋ និងរំលោភច្បាប់ជាញឹកញាប់ក្រោមលេសរក្សាសន្តិភាពដើម្បីកម្ពុជា៕