ក្រុមអ្នកច្បាប់បានលើកឡើងថា ការព្រមព្រៀងគ្នាលើប្រាក់កម្ចីដែលមានអត្រាការប្រាក់លើសពីអត្រាការប្រាក់ដែលបានកំណត់ក្នុងច្បាប់ នឹងត្រូវចាត់ទុកជាមោឃៈ ដូច្នេះកូនបំណុលមានកាតព្វកិច្ចសងត្រឹមតែចំពោះការប្រាក់ដែលមានចែងក្នុងច្បាប់តែប៉ុណ្ណោះ។
មេធាវីការពារក្តីនៅកម្ពុជា អ្នកស្រី ម៉េង សុភារី បានសរសេរលើគណនី Facebook របស់ខ្លួននៅថ្ងៃទី២១ តុលា នេះថា ឧបសគ្គម្ចាស់បំណុល និងកូនបំណុលក្នុងការខ្ចីប្រាក់ដោយយកការប្រាក់ខ្ពស់ កំពុងតែបន្តកើតមានឥតឈប់ឈរ ប៉ុន្តែកម្ពុជាបានចែងយ៉ាងច្បាស់នូវក្រមរដ្ឋប្បវេណីស្ដីពីការកំណត់អត្រាការប្រាក់ខ្ពស់បំផុតក្នុងកម្រិតត្រឹមតែ ១៨ភាគរយប៉ុណ្ណោះក្នុង ១ឆ្នាំ។
ប្រភពដដែលបានលើកឡើងជាសំណួរថា តើត្រូវធ្វើដូចម្តេចនៅពេលម្ចាស់បំណុល និងកូនបំណុលចុះកិច្ចសន្យាខ្ចីប្រាក់ក្នុងអត្រាការប្រាក់ខ្ពស់លើសពីច្បាប់កំណត់?
អ្នកច្បាប់រូបនេះបានពន្យល់ថា ប្រសិនបើម្ចាស់បំណុល និងកូនបំណុលបានព្រមព្រៀងគ្នាក្នុងអត្រាការប្រាក់លើសពីអត្រាការប្រាក់ដែលមានកម្រិតក្នុងច្បាប់ នោះចំនួនអត្រាការប្រាក់ដែលលើសនោះត្រូវចាត់ទុកជាមោឃៈ ដូច្នេះកូនបំណុលមានកាតព្វកិច្ចសងតែចំពោះការប្រាក់ដែលមានចែងក្នុងច្បាប់កំណត់តែប៉ុណ្ណោះ។
ជាងនេះទៀត ក្នុងករណីដែលកូនបំណុលបានសងការប្រាក់លើសពីច្បាប់បានកំណត់ នោះចំនួនការប្រាក់ដែលលើសនោះនឹងក្លាយទៅជាប្រាក់សំណងលើប្រាក់ដើម។ លើសពីនេះ ក្នុងករណីការប្រាក់របស់កូនបំណុលដែលលើសនោះទូទាត់ជាមួយប្រាក់ដើម ហើយនៅសល់ទៀតនោះ ម្ចាស់បំណុលត្រូវតែសងទៅឲ្យកូនបំណុលវិញ ដោយភ្ជាប់ជាមួយការប្រាក់ដោយគិតទៅតាមចំនួនថ្ងៃដែលលើសនោះផងដែរ។
អ្នកស្រីបញ្ជាក់ថា កូនបំណុលក៏អាចប្តឹងសុំឲ្យតុលាការលុបចោលកិច្ចសន្យាបាន ប្រសិនបើកិច្ចសន្យារវាងខ្លួន និងម្ចាស់បំណុលត្រូវបានធ្វើឡើងដោយអំពើឆ្លៀតឱកាស ដោយមានគោលបំណងកេងចំណេញហួសហេតុក្នុងពេលដែលកូនបំណុលកំពុងជួបប្រទះការលំបាកផ្នែកសេដ្ឋកិច្ច ឬភាពឆោតល្ងង់ ឬខ្វះការពិសោធន៍ណាមួយរបស់ខ្លួន។
អ្នកជំនាញផ្នែកច្បាប់រូបនេះគូសបញ្ជាក់ថា កិច្ចសន្យាដែលធ្វើឡើងដោយការភ័ន្តច្រឡំ ឬដោយការឆបោក ឬដោយការគំរាមកំហែង និងកិច្ចសន្យាដែលធ្វើឡើងដោយការរំលោភទៅលើស្ថានភាព ដូចជានៅពេលធ្វើកិច្ចសន្យា ម្ចាស់បំណុលបានប្រើឋានៈខ្លួនដែលមានអាទិភាពជាងកូនបំណុលខាងផ្នែកសេដ្ឋកិច្ច ឬផ្នែកសង្គម ឬបានប្រើស្ថានភាពផ្សេងដទៃទៀតដែលកូនបំណុលមិនអាចប្រឆាំងតបតបាន កូនបំណុលមានសិទ្ធិប្តឹងលុបចោលនូវកិច្ចសន្យានេះចោលដោយស្របច្បាប់។
អ្នកស្រី ម៉េង សុភារី សង្កត់ធ្ងន់ថា ការបង្កើតបំណុលត្រូវបង្កើតដោយការពិចារណា និងមានផែនការច្បាស់លាស់ដែលអាចយកបំណុលនោះទៅប្រើដោយស្របច្បាប់ និងមានមូលដ្ឋានសំណងជាក់លាក់ ចៀសវាងធ្លាក់ខ្លួនទៅក្នុងវិបត្តិហិរញ្ញវត្ថុដ៏ជ្រៅពិបាកដកខ្លួន ឬដកខ្លួនមិនរួចទៅថ្ងៃក្រោយ។
ការលើកឡើងរបស់មេធាវី ម៉េង សុភារី បែបនេះ បន្ទាប់ពីមានករណីផ្ទុះឡើងនៃការជំពាក់បំណុលរបស់តារាកំប្លែងខ្មែរមួយរូបដែលបានប្រកាសថា ខ្លួនបានជំពាក់បំណុលគេរហូតដល់ទៅជាង ៥៧ម៉ឺនដុល្លារអាមេរិកកាលពីពេលថ្មីៗនេះ។
កាលពីថ្ងៃទី១៨ ខែតុលា ឆ្នាំ២០២១ កន្លងទៅ តារាកំប្លែងស្រីឈ្មោះ ស្រេង សុកាន់ដា ដែលគេស្គាល់ជាទូទៅក្នុងពិភពសិល្បៈថា នាងខ្ញុង បានទម្លាយតាមបណ្ដាញសង្គម ដោយប្រកាសពីការក្ស័យធនលើមុខរបររកស៊ីរបស់ខ្លួន ដែលធ្វើឱ្យជំពាក់បំណុលគេសរុបជាទឹកប្រាក់ជាង ៥៧ដុល្លារអាមេរិក។ ក្នុងរបាយការណ៍ដែលសាមីខ្លួនបានផ្សព្វផ្សាយក្រោយប្រកាសក្ស័យធននេះ ម្ចាស់បំណុលដែលខ្លួនបានជំពាក់មានចំនួន ១៦នាក់ ក្នុងនោះមានបំណុលខ្លះអត្រាការប្រាក់រហូតដល់ទៅ ៥០ភាគរយឯណោះ។
កាលពីថ្ងៃទី២១ ខែធ្នូ ឆ្នាំ២០១១ ទីស្ដីការក្រសួងយុត្តិធម៌ បានចេញសេចក្តីប្រកាសស្ដីពីអត្រាការប្រាក់ដែលត្រូវបានកម្រិត ក្នុងនោះមាត្រា១ នៃសេចក្តីប្រកាសនេះបានចែងថា អត្រាការប្រាក់ដែលត្រូវបានកម្រិតក្នុងច្បាប់ស្ដីពីការអនុវត្តក្រមរដ្ឋប្បវេណីត្រូវបានកំណត់មិនឲ្យលើស ១៨ភាគរយឡើយក្នុងមួយឆ្នាំ៕