22 C
Phnom Penh

បក្ស​ភ្លើង​ទៀន​គ្រោង​ធ្វើ​សមាជ​នៅ​ចុង​ខែ​វិច្ឆិកា ខណៈ​សកម្មជន​បក្ស​ប្រឆាំង​រិះគន់​ថា​បក្ស​នេះ​កំពុង​បំបែក​ខ្លួន​ពី​គណបក្ស​សង្គ្រោះ​ជាតិ

បទវិភាគ

គណបក្ស​ភ្លើង​ទៀន ដែល​មាន​មន្ត្រី​បក្ស​ប្រឆាំង​នៅ​ក្រៅ​ប្រទេស​ជា​ខ្នង​បង្អែក បាន​ប្រកាស​រៀបចំ​ធ្វើ​ពិធី​សមាជ​របស់​ខ្លួន​នៅ​ថ្ងៃ​ទី​២៧ ខែ​វិច្ឆិកា ឆ្នាំ​២០២១ ដើម្បី​ធ្វើ​វិសោធនកម្ម​ប្រការ​មួយ​ចំនួន​របស់​គណបក្ស ខណៈ​សកម្មជន​បក្ស​សង្គ្រោះ​ជាតិ រិះគន់​ថា ការ​ធ្វើ​បែប​នេះ គឺ​បង្ហាញ​នូវ​សកម្មភាព​បំបែក​ខ្លួន​ចេញពី​គណបក្ស​សង្គ្រោះ​ជាតិ ដោយ​មិន​អាច​ប្រកែក​បាន។

គណបក្ស​ភ្លើង​ទៀន ដែល​មាន​ដើមកំណើត​ពី​គណបក្ស សម រង្ស៊ី បាន​ចេញ​សេចក្តី​ប្រកាស​ព័ត៌មាន​នៅ​ថ្ងៃ​ទី​២៦ ខែ​តុលា ឆ្នាំ​២០២១ នេះ​ថា ខ្លួន​នឹង​ប្រារព្ធ​ពិធី​សមាជ​នៅ​ពេល​ដ៏​ខ្លី​ខាងមុខ ដើម្បី​កែសម្រួល​នូវ​លក្ខន្តិកៈ​គណបក្ស ការ​រៀបចំ​ជ្រើសរើស​មេដឹកនាំ​ថ្មី និង​កំណត់​យុទ្ធសាស្ត្រ​របស់​ខ្លួន​ជាដើម។

ផែនការ​ធ្វើ​សមាជ​គណបក្ស​ក្រោយ​គណបក្ស​នេះ​បាន​បើក​អង្គប្រជុំ​គណៈ​អចិន្ត្រៃយ៍​របស់​ខ្លួន​កាលពី​ថ្ងៃ​ទី​២៣ ខែ​តុលា ឆ្នាំ​២០២១ កន្លងទៅ។

គណបក្ស​ភ្លើង​ទៀន គឺជា​គណបក្ស​ដែល​បាន​ប្តូរ​ឈ្មោះ​មកពី​គណបក្ស សម រង្ស៊ី កាលពី​ឆ្នាំ​២០១៧ ដែល​បាន​ប្រកាស​ធ្វើ​សមាជ​របស់​ខ្លួន​ម្តង​រួច​មក​ហើយ​កាលពី​អំឡុង​ខែ​សីហា ឆ្នាំ​២០២១ ប៉ុន្តែ​ត្រូវ​អាក់ខាន​ទៅវិញ​ដោយសារ​ការ​រីក​រាលដាល​នៃ​ជំងឺ Covid-19។

កាល​ពី​ឆ្នាំ​២០១២ គណបក្ស សម រង្ស៊ី និង​គណបក្ស​សិទ្ធិមនុស្ស បាន​រួម​បញ្ចូល​គ្នា​បង្កើត​ទៅ​ជា​គណបក្ស​សង្គ្រោះ​ជាតិ ប៉ុន្តែ​គណបក្ស សម រង្ស៊ី មិន​បាន​ដាក់​ពាក្យ​ទៅ​ក្រសួង​មហាផ្ទៃ ដើម្បី​រំលាយ​រចនាសម្ព័ន្ធ​របស់​ខ្លួន​នោះ​ទេ បើ​ទោះបីជា​គណបក្ស​សិទ្ធិមនុស្ស របស់​លោក កឹម សុខា ធ្លាប់​ដាក់​ពាក្យ​ដើម្បី​សុំ​រំលាយ​ពី​ក្រសួង​មហាផ្ទៃ​កាលពី​ពេល​កន្លងទៅ​ក្តី។

សកម្មជន​បក្ស​ប្រឆាំង លោក ហ៊ុន កុសល បាន​ប្រាប់​សារព័ត៌មាន The Cambodia Daily នៅ​ថ្ងៃ​ទី​២៦ តុលា នេះ​ថា ភាព​មិន​ស្មោះត្រង់​របស់​គណបក្ស​ភ្លើង​ទៀន ដែល​គ្រោង​ធ្វើ​សមាជ​ក្នុង​ពេល​ខាងមុខ​នេះ គឺ​កំពុងតែ​ដើរ​ចូល​ក្នុង​ផែនការ និង​បំណង​របស់​គណបក្ស​កាន់​អំណាច​ដែល​តែងតែ​មាន​គោលដៅ​ចង់​ឱ្យ​ស្មារតី​គណបក្ស​សង្គ្រោះ​ជាតិ រលាយ​សាបសូន្យ​នោះ។

សកម្មជន​រូប​នេះ​រិះគន់​ថា ការ​ប្រកាស​ធ្វើ​សមាជ​របស់​បក្ស​នេះ​កំពុង​បង្ហាញ​សកម្មភាព​បែក​ចេញពី​គណបក្ស​សង្គ្រោះ​ជាតិ​យ៉ាង​ច្បាស់ ដូច្នេះ​ស្មារតី កឹម សុខា និង សម រង្ស៊ី ជា​មនុស្ស​តែ​មួយ​ដែល​ភាគី​លោក សម រង្ស៊ី ប្រកាស​មិន​ដាច់​ពី​មាត់​នោះ គ្រាន់តែ​ជា​ល្បិច​កល​ក្នុង​ការ​បែក​ចេញពី​គណបក្ស​សង្គ្រោះ​ជាតិ ដោយ​មិន​ហ៊ាន​ចេញ​មុខ​ប្រកាស​ដោយ​ត្រង់ៗ ព្រោះ​ខ្លាច​ការ​ថ្កោលទោស​ពី​អ្នក​គាំទ្រ​តែប៉ុណ្ណោះ។

លោក ហ៊ុន កុសល បញ្ជាក់​ថា បើ​លោក សម រង្ស៊ី មាន​ភាព​ស្មោះត្រង់​ជាមួយ​គណបក្ស​សង្គ្រោះ​ជាតិ មិន​បែក​ចេញ​ទៅ​ដឹកនាំ​បក្ស​ភ្លើង​ទៀន ឬ​បង្កើត​បក្ស​ថ្មី​ផ្សេង​ទៀត​នោះ គឺ​មាន​ប្រយោជន៍​ដល់​ចលនា​តស៊ូ​របស់​អ្នក​ប្រជាធិបតេយ្យ​ខ្លាំង​ណាស់ ប៉ុន្តែ​ការ​ធ្វើ​សកម្មភាព​បំបែក​កម្លាំង​ប្រជាធិបតេយ្យ​បែប​នេះ គឺ​ស្មើ​នឹង​ពួកគេ​កំពុង​រួម​ដៃ​ជាមួយ​បក្ស​កាន់​អំណាច​បំបែក​ដួង​ព្រលឹង​សង្គ្រោះ​ជាតិ ឲ្យ​រលាយ​សាបសូន្យ​តាម​បំណង​របស់​បក្ស​កាន់​អំណាច​ដូច្នោះ​ដែរ។

ជុំវិញ​ការ​បែកបាក់​អ្នក​ប្រជាធិបតេយ្យ​នេះ អ្នកវិភាគ​នយោបាយ សង្គម និង​ជា​អនុប្រធាន​ក្រុមប្រឹក្សាភិបាល​នៃ​ចលនា​ពលរដ្ឋ​ដើម្បី​ប្រជាធិបតេយ្យ លោក គឹម សុខ បាន​សរសេរ​លើ​គណនី Facebook របស់​លោក​នៅ​ថ្ងៃ​ទី​២៦ តុលា នេះ​ថា មន្ត្រី​ជាន់ខ្ពស់​របស់​បក្ស​ក្រៅ​រដ្ឋាភិបាល​មួយ​ចំនួន​បាន​លើកឡើង​ថា ពិត​ជា​ពិបាក​ណាស់​ក្នុង​ការ​បង្រួបបង្រួម​គណបក្ស​ដែល​មាន​និន្នាការ​ប្រជាធិបតេយ្យ​ឱ្យ​ចូល​គ្នា​ក្នុង​ស្មារតី​រួម​តែ​មួយ។

អ្នកវិភាគ​រូប​នេះ​លើក​ជា​សំណួរ​ថា តើ​ការ​ហែក​គ្នា រួច​ហើយ​ទៅ​ប្រកួត​ត​ទល់​នឹង​បក្ស​កាន់​អំណាច​បច្ចុប្បន្ន​នេះ ជា​រឿង​ងាយស្រួល​ជាង​ការ​រួបរួម​គ្នា​មែន​ទេ ប៉ុន្តែ​ចម្លើយ​គឺ​ថា ពិត​ជា​មិន​អាច​ទៅ​រួច​ជាដាច់ខាត ដូច្នេះ​តើ​គួរ​ពិចារណា​ឬ​ទេ​អំពី​ការ​ជ្រើសរើស​យក​ផ្លូវ​ដែល​ពិបាក​តិចតួច ហើយ​មាន​សង្ឃឹម​ទទួល​បាន​ជោគជ័យ​ទៅ​ថ្ងៃ​ក្រោយ។

លោក គឹម សុខ បញ្ជាក់​ថា ការ​ខិតខំ​ផ្សះផ្សា​ក្រុម​អ្នក​នយោបាយ​ដែល​មាន​និន្នាការ​ប្រជាធិបតេយ្យ ដើម្បី​រៀបចំ​ក្បួន​ប្រកួត​រួម​កម្លាំង​ឡើងវិញ គឺជា​រឿង​ចាំបាច់​បំផុត ប៉ុន្តែ​បើ​គណបក្ស​ក្រៅ​រដ្ឋាភិបាល​ដែល​ប្រាថ្នា​ចង់​បាន​ប្រជាធិបតេយ្យ ហើយ​មិន​ប្រឹងប្រែង​បង្រួបបង្រួម​គ្នា​ឲ្យ​មាន​កម្លាំង​ប្រកួត​ពី​ឥឡូវ​នេះ​ទេ ប្រហែល​ជា ២០​ឆ្នាំ​ក្រោយ នឹង​ខើច​ពេល​ក្នុង​ការ​ពុះពារ​សង្គ្រោះ​កម្ពុជា​ឡើងវិញ​ខ្លាំង​ណាស់។

ក្រុម​អ្នក​សង្កេតការណ៍​រិះគន់​ថា គណបក្ស​ក្រៅ​រដ្ឋាភិបាល​តែង​អះអាង​ពី​ការ​យក​ឈ្នះ​បក្ស​កាន់​អំណាច ប៉ុន្តែ​ពួកគេ​ហាក់​មិន​ផ្ដោត​លើ​ការ​រួបរួម​អ្នក​ប្រជាធិបតេយ្យ​ដូច​គ្នា​នោះ​ទេ។ ជាង​នេះ​ទៀត សូម្បី​មន្ត្រី​បក្ស​សង្គ្រោះ​ជាតិ​ដែល​ត្រូវ​គេ​រំលាយ​ហើយ​ក៏ដោយ ក៏​អ្នក​ទាំងនោះ​ហាក់​មិន​មាន​គោលជំហរ​រួបរួម​គ្នា​វិញ​ដែរ ខណៈ​ការ​រួបរួម​កាលពី​ឆ្នាំ​២០១២ ជា​រូបភាព និង​គំរូ​ជោគជ័យ​មួយ​ដែល​ពួកគេ​ធ្លាប់​បាន​ទទួលស្គាល់​គ្រប់​គ្នា​ហើយ​ក៏ដោយ៕

© 2021, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស