លោក ហ៊ុន សែន បានបន្តកាត់ផ្ទៃដីបឹងតាមោក ជិត ៣៦ហិកតារ ប្រគល់ទៅឱ្យឧត្ដមសេនីយ៍ធំៗនៅក្នុងអគ្គមេបញ្ជាការនៃកងយោធពលខេមរភូមិន្ទធ្វើកម្មសិទ្ធិ ខណៈអគ្គស្នងការដ្ឋាននគរបាលជាតិ ក៏ទទួលបានផ្ទៃដីបឹងតាមោកចំនួនពីរកន្លែងផងដែរនោះ។
យោងតាមអនុក្រឹត្យចុះហត្ថលេខាដោយលោក ហ៊ុន សែន កាលថ្ងៃទី២៦ ខែសីហា ឆ្នាំ២០២១ ដែលសារព័ត៌មាន The Cambodia Daily ទើបទទួលបាន ឱ្យដឹងថា ផ្ទៃដីបឹងតាមោក ឬបឹងកប់ស្រូវទំហំជាង ៣៥ហិកតារស្ថិតនៅសង្កាត់គោករកា ខណ្ឌព្រែកព្នៅ រាជធានីភ្នំពេញ ត្រូវបានកាត់ប្រគល់ទៅឱ្យឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ និងឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស។
អនុក្រឹត្យដដែលបញ្ជាក់ថា ផ្ទៃដីបឹងតាមោក ជាង ៣៥ហិកតារនេះមិនត្រឹមតែបានកាត់ឲ្យលោក វង្ស ពិសេន និងលោក សៅ សុខា ប៉ុណ្ណោះទេ ប៉ុន្តែបឹងនេះក៏បានកាត់ទៅឲ្យឧត្តមសេនីយ៍ឯក យ៉ា គឹមអ៊ី អគ្គលេខាធិការរងនៃអគ្គលេខាធិការដ្ឋាន និងជានាយកដ្ឋានអធិការកិច្ចនៃក្រសួងការពារជាតិ ឧត្តមសេនីយ៍ទោ សៀ សម្បត្តិ ស្នងការនៃស្នងការដ្ឋានស្រាវជ្រាវ និងបង្ក្រាបបទល្មើសនៃបញ្ជាការដ្ឋានកងរាជអាវុធហត្ថលើផ្ទៃប្រទេស និងលោក ប៉ោ ម៉េង ក៏ទទួលបានដែរ។
កាលពីខែសីហា ឆ្នាំ២០២១ លោក ហ៊ុន សែន ក៏បានចេញអនុក្រឹត្យដាច់ដោយឡែកពីគ្នាចំនួនពីរទៀត ដោយកាត់ផ្ទៃបឹងតាមោកទំហំជាង ១៨ហិកតារ (១៨២៣៧២ម៉ែត្រក្រឡា) ស្ថិតនៅសង្កាត់គោករកា ខណ្ឌព្រែកព្នៅ រាជធានីភ្នំពេញ ប្រគល់ឱ្យអគ្គស្នងការដ្ឋាននគរបាលជាតិ ខណៈផ្ទៃបឹងទំហំជាង ១៥ហិកតារ (១៥០៦៥១ម៉ែត្រក្រឡា) ស្ថិតនៅសង្កាត់គោករកា ខណ្ឌព្រែកព្នៅ ត្រូវបានលោក ហ៊ុន សែន កាត់ប្រគល់ឱ្យអគ្គស្នងការដ្ឋាននគរបាលជាតិ ដើម្បីធ្វើកម្មសិទ្ធិកាលពីថ្ងៃទី១២ ខែសីហា ឆ្នាំ២០២១។
ក្រៅពីមន្ត្រីធំៗនោះ រដ្ឋាភិបាលក៏បានកាត់ដីនៅតំបន់បឹងធម្មជាតិមួយនេះ ប្រគល់ឱ្យឧកញ៉ា ក្រុមហ៊ុនឯកជន អគ្គស្នងការដ្ឋាននគរបាលជាតិ រួមទាំងក្រសួងមួយចំនួនទៀត។
បឹងតាមោក មានផ្ទៃដីសរុបជាង ៣២០០ហិកតារ (៣២៣៩ហិកតារ) ជាអាងស្តុកទឹកកខ្វក់ និងរំដោះទឹកចេញពីរាជធានីភ្នំពេញ ហើយបឹងនេះត្រូវបានរដ្ឋាភិបាលចេញអនុក្រឹត្យមួយកាលពីដើមខែកុម្ភៈ ឆ្នាំ២០១៦ ដោយកំណត់បឹងធម្មជាតិមួយនេះជាសម្បត្តិសាធារណៈរបស់រដ្ឋ។
ប៉ុន្តែយោងតាមអនុក្រឹត្យរបស់រដ្ឋាភិបាលដែលបានចេញជាបន្តបន្ទាប់ ចាប់តាំងពីឆ្នាំ២០១៨ ដល់ខែកញ្ញា ឆ្នាំ២០២១ ផ្ទៃបឹងតាមោក ដែលជាអាងស្តុកទឹកកខ្វក់ និងរំដោះទឹកចេញពីរាជធានីភ្នំពេញ ត្រូវបានរដ្ឋាភិបាលកាត់ជាង ១ពាន់ហិកតារទៅហើយ។
ពាក់ព័ន្ធនឹងការកាត់ផ្ទៃបឹងធម្មជាតិចុងក្រោយនេះ លោក សុខ ទូច បានលើកឡើងកាលពីពេលថ្មីៗនេះថា កាលពីមុន បឹងធម្មជាតិមានច្រើន នៅពេលលុបតិចតួច មិនសូវមានបញ្ហានោះឡើយ ប៉ុន្តែបច្ចុប្បន្ននេះ បឹងតាមោកដែលជាបឹងធម្មជាតិចុងក្រោយនោះ ត្រូវបានលុបអស់ខ្ទេចខ្ទីទៀត។
លោកបន្តថា រាល់ថ្ងៃមិនមោទកភាពអ្វីទៀតឡើយ ដោយសារតែបឹងធម្មជាតិដែលនៅសេសសល់តិចតួច ត្រូវបានលុបជាបន្តបន្ទាប់ដែលបន្សល់ទុកការលំបាកយ៉ាងច្រើននៅខាងក្រោយ។
បឹងធម្មជាតិធំៗមួយចំនួននៅរាជធានីភ្នំពេញ ក្នុងនោះមានបឹងកក់ បឹងជើងឯក បឹងទំពុន និងបឹងតាមោក ជាដើមនោះ ជាកន្លែងស្តុកទឹកស្អុយ និងរំដោះទឹកហូរចេញពីទីក្រុងភ្នំពេញ អំឡុងពេលភ្លៀងធ្លាក់នៅរដូវវស្សា ប៉ុន្តែប៉ុន្មានឆ្នាំចុងក្រោយនេះ លោក ហ៊ុន សែន បានកាត់ឱ្យក្រុមហ៊ុន បុគ្គលមានអំណាច និងស្ថាប័នរដ្ឋ ដើម្បីសាងសង់អគារ និងហេដ្ឋារចនាសម្ព័ន្ធផ្សេងៗ។ ការលុបបឹងធម្មជាតិនៅរាជធានីភ្នំពេញ ត្រូវបានគេសង្កេតឃើញថា ទីក្រុងភ្នំពេញតែងតែរងការជន់លិចដោយជំនន់ទឹកភ្លៀងជាបន្តបន្ទាប់៕