ពលរដ្ឋមួយចំនួននៅស្រុកដងទង់ បានស្នើដល់លោក ម៉ៅ ធនិន អភិបាលខេត្តកំពត ចាត់វិធានការផ្លូវច្បាប់ទៅលើលោក ដាញ់ សារី ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តកំពត ដែលលួចចេញប្លង់កម្មសិទ្ធិរំលោភដីបរិវេណអាងទឹកដងទង់ និងដីកម្មសិទ្ធិពលរដ្ឋ ១៩គ្រួសារលក់ឲ្យក្រុមហ៊ុន សេង សម្បត្តិ ក្នុងពេលវិវាទមិនមិនទាន់ដោះស្រាយចប់។
ប្រជាពលរដ្ឋដែលមានទំនាស់ដីធ្លីជាមួយក្រុមហ៊ុន សេង សម្បត្តិ បានចោទលោក ដាញ់ សារី ថាបានចេញវិញ្ញាបនបត្រសម្គាល់ម្ចាស់អចលនវត្ថុស្ថិតនៅភូមិសុភី ឃុំស្រែជាងខាងជើង ស្រុកដងទង់ ខេត្តកំពត មានទំហំផ្ទៃដីជាង ១០ហិកតារ នៅលើដីកំពុងមានទំនាស់។ មិនត្រឹមតែប៉ុណ្ណោះ បានកែប្រែដីកសិកម្មទៅជាដីសាងសង់ ដើម្បីបំពេញបំណងឲ្យលោក សេង សម្បត្តិ កាលថ្ងៃទី២៣ ខែសីហា។
វិវាទនេះ ប្រជាពលរដ្ឋរងគ្រោះដីធ្លីប្រមាណចំនួន ៦គ្រួសារបានដាក់ពាក្យប្ដឹងទៅកាន់អង្គភាពប្រឆាំងអំពើពុករលួយ កាលពីថ្ងៃទី១៩ ខែកក្កដា កន្លងទៅ ដើម្បីជំទាស់នឹងការឃុបឃិតតាមលំដាប់អាជ្ញាធរចេញប្លង់លក់ដីទាំងនោះ និងស្នើស៊ើបអង្កេតឲ្យបានម៉ត់ចត់ចំពោះករណីនេះ។
ទាក់ទិនវិវាទនេះ លោក ម៉ៅ ធនិន អភិបាលខេត្តកំពត បានលើកឡើងក្នុងវេទិកាសាធារណៈរវាងប្រជាពលរដ្ឋរងគ្រោះដីធ្លីជាមួយក្រុមហ៊ុន សេង សម្បត្តិ កាលពីព្រឹកថ្ងៃទី២៤ ខែតុលា កន្លងមកនេះថា លោកព្រួយបារម្ភចំពោះការបាត់បង់ដីអាងទឹកដងទង់នេះ ដោយសារតែការឃុបឃិតរបស់មន្ត្រីមួយចំនួន។ ចំណែកឯភាគីលោក សេង សម្បត្តិ បានឆ្លើយតបក្នុងវេទិកាសាធារណៈនោះដែរថា ក្នុងចំណោមប្រជាពលរដ្ឋ ១៩គ្រួសារ គឺខាងក្រុមហ៊ុនបានទិញដីពីប្រជាពលរដ្ឋទាំងនោះរួចហើយ គឺផ្ទុយពីការអះអាងរបស់ប្រជាពលរដ្ឋទៅវិញ។
ទោះជាបែបនេះ អភិបាលខេត្តកំពត បានព្រមានថា នឹងមានវិធានការរដ្ឋបាល និងតាមផ្លូវច្បាប់ចំពោះមន្ត្រីដែលពាក់ព័ន្ធលួចលាក់ ឬឃុបឃិតធ្វើប្លង់កម្មសិទ្ធិលក់ដីអាងទឹក និងដីរបស់ប្រជាពលរដ្ឋ ដោយបំប្លែងពីដីកសិកម្មទៅជាដីសាងសង់នេះ។ លោកបញ្ជាក់ថា រាល់ការទិញដីនៅអាងទឹកដងទង់ខាងលើនេះ គឺមានក្នុងទម្រង់ខុសច្បាប់ស្ទើរតែទាំងស្រុង។
សារព័ត៌មាន The Cambodia Daily នៅមិនទាន់អាចទាក់ទងលោក ដាញ់ សារី ប្រធានមន្ទីរសុរិយោដីខេត្តកំពត ដើម្បីបំភ្លឺជុំវិញការចេញប្លង់ទៅលោក សេង សម្បត្តិ នៅលើដីកំពុងមានវិវាទខាងលើនេះបានទេ នៅល្ងាចថ្ងៃទី២៩ ខែតុលា ឆ្នាំ២០២១។
តាមប្រភពពីមន្ត្រីរដ្ឋបាលខេត្តកំពត ស្នើមិនបង្ហាញឈ្មោះ ឲ្យដឹងថា ករណីឃុបឃិតគ្នាលក់ដីនេះ គឺមានមន្ត្រីនៅតាមមន្ទីរស្ថាប័នជំនាញជាច្រើនរូបបានជាប់ពាក់ព័ន្ធ និងទទួលសំណូកពុករលួយពីលោក សេង សម្បត្តិ នៅក្នុងអាណត្តិលោក ជាវ តាយ ដឹកនាំជាអភិបាលខេត្តកំពត។
ប្រភពដដែលបញ្ជាក់ថា ក្នុងនោះរួមមានលោក វ៉ិត វឌ្ឍនា នាយករដ្ឋបាលខេត្តកំពត ជាមេចំណែក លោក ប៉ិល កុសល អភិបាលរងខេត្ត លោក ដាញ់ សារី ប្រធានមន្ទីរសុរិយោដីខេត្ត លោក ចាន់ វណ្ណា ប្រធានមន្ទីរធនធានទឹកខេត្ត និងមានមន្ត្រីមូលដ្ឋានភូមិ ឃុំ ស្រុក ថែមទៀតផង៕