ពលរដ្ឋខេត្តកោះកុង បានឲ្យដឹងថា បទល្មើសជីកកាយដីភ្នំដើម្បីយកមកចាក់រំលោភយកដីចំណីព្រែកនៅចំណុចភូមិអន្លង់វ៉ាក់ ឃុំតាតៃ ស្រុកកោះកុង បានកក្រើកឡើងវិញជាបណ្តើរៗហើយដោយគ្មានអាជ្ញាធរចុះទប់ស្កាត់ទេ។
ប្រភពបន្តថា អ្នកដែលដឹកចាក់ដីលុបចំណីព្រែកនៅចំណុចខាងលើ ឈ្មោះ ប៊ុន មួយ ដែលកន្លងមកទីតាំងមានសកម្មភាពចាក់ដីលុបព្រែកនេះ អាជ្ញាធរស្រុកកោះកុង ក៏ធ្លាប់បានចុះហាមឃាត់ និងតម្រូវឲ្យបុគ្គលរូបនេះធ្វើកិច្ចសន្យាបញ្ឈប់សកម្មភាពដឹកដីចាក់លុបព្រែកធម្មជាតិមួយនេះម្តងរួចហើយ ប៉ុន្តែពេលនេះ អ្នកស្រី ប៊ុន មួយ ដែលជាអាជីវករលក់គ្រឿងសំណង់នៅក្រុងខេមរភូមិន្ទ ខេត្តកោះកុង មិនបានអនុវត្តតាមការហាមឃាត់របស់អាជ្ញាធរឡើយ។
ពលរដ្ឋរស់នៅឃុំតាតៃ រិះគន់ថា វិធានការរបស់លោក ណឹម ភារម្យ អភិបាលរងស្រុកកោះកុង ដែលបានដាក់ចេញនាពេលកន្លងមកនេះ គឺមិនមានប្រសិទ្ធភាពទេ ដោយសារតែក្រុមឈ្មួញនៅតែបន្តជីកកកាយដីភ្នំដើម្បីយកមកចាក់លុបព្រែកនៅទីតាំងខាងលើនេះដដែល។
ក្រុមប្រជាពលរដ្ឋបានសំណូមពរជាថ្មីម្តងទៀតទៅអ្នកស្រី មិថុនា ភូថង អភិបាលខេត្តកោះកុង មានវិធានការ និងត្រួតពិនិត្យទៅលើសកម្មភាពដឹកដីចាក់លុបព្រែកតាតៃ ដោយអ្នកស្រី ប៊ុន មួយ ឲ្យមានប្រសិទ្ធភាព។
ទាក់ទិនករណីនេះ លោក ធិន សម្បត្តិ មេឃុំតាតៃ បានប្រាប់សារព័ត៌មានក្នុងស្រុកថា ទីតាំងចាក់ដីលុបព្រែកខាងលើ គឺគេមានប្លង់កម្មសិទ្ធិ ហើយការចាក់ដីលុបព្រែកតាតៃនេះ ក៏មានច្បាប់អនុញ្ញាតដែរ។ ប៉ុន្តែបើករណីចាក់ដីរំលោភចូលព្រែកធម្មជាតិ គឺរូបលោកនឹងឲ្យកម្លាំងចុះទៅពិនិត្យមើល ដើម្បីឈានទៅមានវិធានការបន្តទៀត។
ចំណែកលោក លឹម ភឿន ភូមិបាលស្រុកកោះកុង បានឲ្យដឹងដែរថា ករណីដឹកដីចាក់លុបចំណីព្រែកតាតៃ នៅចំណុចអន្លង់វ៉ាក់ខាងលើ រូបលោកមិនបានដឹងទេ ប៉ុន្តែចំពោះដីចំណីព្រែក គឺច្បាប់បានកំណត់ហើយត្រូវទុក ២០ម៉ែត្រពីមាត់ព្រែក។
លោក ជា សូវី អភិបាលស្រុកកោះកុង ថ្លែងថា បើមានសកម្មភាពដឹកដីចាក់លុបចូលក្នុងព្រែកតាតៃពិតប្រាកដមែននោះ គឺរូបលោកនឹងចាត់កម្លាំងឲ្យចុះទៅពិនិត្យជាក់ស្តែង និងមានវិធានការបន្ត។
យ៉ាងនេះក្តី សារព័ត៌មាន The Cambodia Daily នៅមិនទាន់អាចទាក់ទងអ្នកស្រី មិថុនា ភូថង អភិបាលខេត្តកោះកុង ដើម្បីបំភ្លឺជុំវិញសកម្មភាពដឹកដីចាក់លុបចំណីព្រែកនៅចំណុចភូមិអន្លង់វ៉ាក់ ឃុំតាតៃ ស្រុកកោះកុង បានទេនៅថ្ងៃទី១៦ ខែវិច្ឆិកា ឆ្នាំ២០២១៕