27 C
Phnom Penh

លោក រ៉ុង ឈុន ថា​ប្រព័ន្ធ​ច្បាប់​នៅ​កម្ពុជា​គ្រាន់តែ​ជា​ទីផ្សារ​ទិញ​លក់​រឿង​ក្តី​ប៉ុណ្ណោះ

បទវិភាគ

ប្រធាន​សហភាព​សហជីព​កម្ពុជា លោក រ៉ុង ឈុន អះអាង​ថា លោក​បាន​សង្កេត​ឃើញ​ថា ប្រព័ន្ធ​ច្បាប់​នៅ​កម្ពុជា​គ្រាន់តែ​ជា​ទីផ្សារ​ទិញ​លក់​រឿង​ក្តី​យ៉ាង​អណាធិបតេយ្យ​ប៉ុណ្ណោះ អំឡុង​ពេល​ដែល​លោក​ត្រូវ​បាន​តុលាការ​ឃុំ​ខ្លួន​អស់​រយៈពេល​ជាង ១​ឆ្នាំ​កន្លងមក​នេះ។

ប្រធាន​សហភាព​សហជីព​កម្ពុជា លោក រ៉ុង ឈុន បាន​អះអាង​ចំពោះ​មុខ​អ្នក​សារព័ត៌មាន​នៅ​លើ​ទីលាន​សាធារណៈ​មួយ​កន្លែង​ថា ការ​សម្រេច​ឃុំ​ខ្លួន​រូបលោក និង​សកម្មជន​បរិស្ថាន​ពី​សំណាក់​អាជ្ញាធរ​កម្ពុជា គឺជា​ការ​ទទួល​រង​នូវ​អំពើ​អយុត្តិធម៌​ជាទីបំផុត ហើយ​ការ​ធ្វើ​សន្និសីទ​សារព័ត៌មាន​នៅ​ថ្ងៃ​អង្គារ ទី​២៣ វិច្ឆិកា នេះ គឺ​ក្នុង​គោលបំណង​បង្ហាញ​ពី​ជំហរ​របស់​លោក និង​សកម្មជន​បរិស្ថាន​ដទៃ​ទៀត​ថា នឹង​ត្រូវ​បន្ត​កិច្ចការ​សង្គម​តាម​របៀប​ណា​ទៅ​ថ្ងៃ​មុខ និង​បង្ហាញ​ពី​ភាព​អយុត្តិធម៌​ក្នុង​ពន្ធនាគារ​អំឡុង​ពេល​ដែល​រូបលោក​ត្រូវ​ឃុំ​ខ្លួន​ផង​ដែរ។

លោក រ៉ុង ឈុន អះអាង​ថា ភាព​អយុត្តិធម៌​ក្នុង​ពន្ធនាគារ​ប្រៀប​ដូចជា​កញ្ចក់​ឆ្លុះបញ្ចាំង​ពី​ការ​ដឹកនាំ​របស់​រដ្ឋាភិបាល​កម្ពុជា​ដូច្នោះ​ដែរ ព្រោះ​ថា​ប្រព័ន្ធ​ច្បាប់​នៅ​កម្ពុជា​បាន​ក្លាយ​ជា​ទីផ្សារ​ទិញ​លក់​រឿង​ក្តី​គ្រប់​ប្រភេទ ដូចជា​ការ​ដោះដូរ​រឿង​ក្តី​ពី​ធ្ងន់​មក​ស្រាល ពី​ស្រាល​ទៅ​ធ្ងន់ ដោយ​ការ​ប្រើ​លុយកាក់​ជា​ថ្នូរ ជាដើម នៅ​ក្នុង​ស្ថាប័ន​តុលាការ​កម្ពុជា​សព្វថ្ងៃ​នេះ។

ប្រធាន​សហភាព​សហជីព​កម្ពុជា​រូប​នេះ​រិះគន់​ថា តុលាការ​មិន​ដែល​បាន​ស៊ើប​រឿង​ក្តី​ណា​មួយ​ឱ្យ​បាន​ច្បាស់លាស់ មុន​នឹង​ឃុំ​ខ្លួន​ជន​សង្ស័យ​នោះ​ទេ ដែល​ទង្វើ​បែប​នេះ​បង្ហាញ​ពី​ប្រព័ន្ធ​តុលាការ​កម្ពុជា​កំពុងតែ​ប្រព្រឹត្ត​នូវ​ទង្វើ​អយុត្តិធម៌​យ៉ាង​ធ្ងន់ធ្ងរ​លើ​ប្រជាពលរដ្ឋ​ខ្មែរ។

ការ​អះអាង​របស់​លោក រ៉ុង ឈុន ធ្វើឡើង​ក្នុង​សន្និសីទ​សារព័ត៌មាន​ដើម្បី​បង្ហាញ​ពី​ប្រព័ន្ធ​តុលាការ​នៅ​កម្ពុជា​ដែល​ប្រព្រឹត្ត​អំពើពុករលួយ​ក្នុង​ស្ថាប័ន​រដ្ឋាភិបាល​កម្ពុជា​សព្វថ្ងៃ​នេះ។

នៅ​ថ្ងៃ​ទី​២៣ ខែ​វិច្ឆិកា ឆ្នាំ​២០២១ សន្និសីទ​សារព័ត៌មាន​របស់​សមាគម​គ្រូបង្រៀន​កម្ពុជា​ឯករាជ្យ​ដែល​ប្រកាស​ធ្វើ​នៅ​ហាង​កាហ្វេ​ខាល់ឆ័រ ក្នុង​សង្កាត់​ទួលទំពូង២ ខណ្ឌ​ចំការមន រាជធានី​ភ្នំពេញ ស្ដីពី​ជំហរ​របស់​សកម្មជន​បរិស្ថាន និង​សិទ្ធិមនុស្ស ដើម្បី​កិច្ចការ​សង្គម​ជាតិ​ទៅ​ថ្ងៃ​មុខ មិន​បាន​ប្រារព្ធ​ដូច​ការ​គ្រោងទុក​នោះ​ទេ ដោយសារតែ​ម្ចាស់​ហាង​កាហ្វេ​ខាល់ឆ័រ មិន​អនុញ្ញាត ប៉ុន្តែ​សន្និសីទ​នេះ​នៅតែ​ដំណើរការ​ដដែល។

ប្រធាន​សហជីព​កម្ពុជា លោក រ៉ុង ឈុន កាលពី​ថ្ងៃ​ទី​១៨ ខែ​សីហា ឆ្នាំ​២០២១ ត្រូវ​បាន​កាត់ទោស​ឱ្យ​ជាប់​ពន្ធនាគារ ២​ឆ្នាំ ពី​បទ «ញុះញង់​ឱ្យ​ប្រព្រឹត្ត​អំពើ​បង្ក​ឱ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម» ប៉ុន្តែ​នៅ​ថ្ងៃ​ទី​១២ ខែ​វិច្ឆិកា ឆ្នាំ​២០២១ កន្លងទៅ​នេះ ត្រូវ​បាន​សាលាឧទ្ធរណ៍​សម្រេច​ដោះលែង​ឱ្យ​នៅ​ក្រៅ​ឃុំ​សាកល្បង​បន្ទាប់ពី​អនុវត្ត​ទោស​បាន ១៥​ខែ ១១​ថ្ងៃ​រួច​មក៕

© 2021, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស