អតីតប្រធានប្រតិបត្តិគណបក្សសង្គ្រោះជាតិម្នាក់នៅខេត្តកំពង់ឆ្នាំង ដែលកំពុងជាប់ពន្ធនាគារព្រៃស បានលើកឡើងក្នុងបន្ទប់សវនាការថា ការចោទប្រកាន់ និងចាប់ខ្លួនពួកគាត់ដាក់គុកជិត ២ឆ្នាំមកនេះ ដោយសាររឿងនយោបាយសុទ្ធសាធ។
ការប្រកាសរបស់អ្នកនយោបាយថ្នាក់ក្រោមជាតិនេះ ធ្វើឡើងនៅពេលសាលាដំបូងរាជធានីភ្នំពេញបន្តបើកសវនាការលើសំណុំរឿងអតីតសកម្មជន និងថ្នាក់ដឹកនាំគណបក្សសង្គ្រោះជាតិ ចំនួន ២១នាក់ពាក់ព័ន្ធនឹងបទចោទ «ញុះញង់យោធិនមិនឱ្យស្តាប់បទបញ្ជា បទញុះញង់ និងបទរួមគំនិតក្បត់»។
សវនាការនៅថ្ងៃទី៩ ធ្នូ ចៅក្រមសាលាដំបូងរាជធានីភ្នំពេញ បានសាកសួរឈ្មោះ ឈុន ប៊ុនឆាត ឈ្មោះ យឹម សារ៉េត និងឈ្មោះ ជុំ ចាន់ ពាក់ព័ន្ធនឹងការបង្កើតចលនានៅក្រៅប្រទេស និងសារអំពាវនាវរបស់លោក សម រង្ស៊ី ឱ្យពលរដ្ឋ និងកងកម្លាំងប្រដាប់អាវុធប្រឆាំងរដ្ឋាភិបាល រួមទាំងផែនការវិលត្រឡប់របស់លោក សម រង្ស៊ី នៅថ្ងៃទី៩ វិច្ឆិកា ផងដែរ។
ប៉ុន្តែលោក យឹម សារ៉េត និងលោក ជុំ ចាន់ ដែលជាអតីតសកម្មជនបក្សប្រឆាំង បានបដិសេធដោយសារចាប់តាំងពីគណបក្សនេះត្រូវបានរំលាយមក ពួកគេមិនដែលមានទំនាក់ទំនង និងធ្វើសកម្មភាពអ្វីទៀតដែរ ថ្វីត្បិតតែពួកគេបានដឹងអំពីការបង្កើតចលនានៅក្រៅប្រទេស និងផែនការវិលត្រឡប់របស់លោក សម រង្ស៊ី ប៉ុន្តែការទទួលបានព័ត៌មានទាំងអស់នេះ គឺតាមប្រព័ន្ធផ្សព្វផ្សាយតែប៉ុណ្ណោះ។ លើសពីនេះ ពួកគេក៏មិនបានទៅចូលរួមជាមួយសកម្មភាព ៩ វិច្ឆិកា ដែរ ដោយសារពួកគេជាប់រវល់រកស៊ី ខណៈលោក ឈុន ប៊ុនឆាត ក៏បានបដិសេធចំពោះទំនាក់ទំនងរវាងអតីតសកម្មជន និងមន្ត្រីបក្សប្រឆាំងដែរ ដោយថាខ្លួនជាមន្ត្រីរាជការស៊ីប្រាក់ខែរដ្ឋាភិបាល។
ក្រោយពីសួរអ្នកទាំងនោះរួច សហមេធាវីការពារក្ដីឱ្យជនជាប់ចោទទាំង ២១នាក់ គឺលោក សំ សុគង់ បានស្នើសុំសួរលោក កែវ ថៃ ដែលជាអតីតប្រធានប្រតិបត្តិគណបក្សសង្គ្រោះជាតិ នៅខេត្តកំពង់ឆ្នាំង ថាចាប់តាំងពីគណបក្សប្រឆាំងត្រូវបានរំលាយមក តើលោកមានបានទទួលផែនការចំនួន ៥ចំណុចដែលលោក សម រង្ស៊ី បានប្រកាសបន្ទាប់ពីកិច្ចប្រជុំនៅទីក្រុងឡងប៊ិច ដែរឬទេ។ លោក កែវ ថៃ បានលើកឡើងថា ចាប់តាំងពីគណបក្សសង្គ្រោះជាតិត្រូវបានរំលាយមក រូបលោកបានបោះបង់សកម្មភាពរបស់គណបក្សទាំងស្រុង និងគ្មានទំនាក់ទំនងជាមួយគ្នាទៀតដែរ។ លោកបន្តថា គ្រាន់តែលោកនិយាយទូរស័ព្ទរឿងជួបប្រជុំពាក់ព័ន្ធនឹងការងារសាលា បែរជាត្រូវគេយកមកកាត់តពាក្យបន្តិច ហើយយកមកចោទប្រកាន់រូបគាត់ជាបទល្មើសជាក់ស្ដែង និងបានមកចាប់ខ្លួនលោកដាក់គុក។
លោក កែវ ថៃ និយាយថា លោកមិនបានទទួលផែនការពីអ្នកណាទេ ពីព្រោះលោកបានបម្រើនៅក្នុងវិស័យអប់រំរហូតមក គ្រាន់តែលោកមាននិន្នាការនយោបាយជាមួយគណបក្សប្រឆាំងនាពេលកន្លងមកប៉ុណ្ណោះ។ លោកចាត់ទុកការចោទប្រកាន់របស់តុលាការពីបទ «រួមគំនិតក្បត់» ថាមិនត្រឹមត្រូវ ដោយសារលោកមិនពាក់ព័ន្ធករណីអ្វីឡើយ ប៉ុន្តែបើចោទប្រកាន់ដោយសារលោកមាននិន្នាការជាមួយបក្សប្រឆាំង នោះត្រឹមត្រូវជាង។
អតីតប្រធានប្រតិបត្តិគណបក្សសង្គ្រោះជាតិរូបនេះ ហៅការចោទប្រកាន់របស់តុលាការថាជារឿងនយោបាយសុទ្ធសាធ ព្រោះលោកដេកផ្ទះសុខៗ បែរជាតុលាការចោទលោកថាប្រព្រឹត្តបទល្មើសជាក់ស្ដែងទៅវិញ។
ទោះយ៉ាងណា ក្រោយពីសាកសួរជនជាប់ចោទពេញមួយព្រឹកនោះ ចៅក្រមលោក រស់ ពិសិដ្ឋ បានសម្រេចបិទ ដោយនឹងបន្តបើកសវនាការនៅសប្ដាហ៍ក្រោយទៀត។
អតីតសកម្មជន និងថ្នាក់ដឹកនាំគណបក្សសង្គ្រោះជាតិចំនួន ២១នាក់ ត្រូវបានតុលាការចោទប្រកាន់ពីបទ «ញុះញង់យោធិនមិនឱ្យស្តាប់បទបញ្ជា បទញុះញង់ និងបទរួមគំនិតក្បត់»។ ក្នុងចំណោមអ្នកជនជាប់ចោទ ២១នាក់នោះរួមមាន លោក សម រង្ស៊ី លោក អេង ឆៃអ៊ាង លោក ហ៊ូ វ៉ាន់ លោក នុត រំដួល លោកស្រី ជូឡុង សូមូរ៉ា លោកស្រី មូរ សុខហួរ លោក តុ វ៉ាន់ចាន់ ដែលកំពុងនៅក្រៅប្រទេស៕