មន្ត្រីជាន់ខ្ពស់បក្សប្រឆាំង សម្ដែងការសោកស្ដាយចំពោះសមាជិករដ្ឋសភាសហរដ្ឋអាមេរិក លោក អាលែន ឡូវិនថល (Alan Lowenthal) ដែលមិនឈរឈ្មោះក្នុងការបោះឆ្នោតជ្រើសរើសសមាជិករដ្ឋសភារបស់សហរដ្ឋអាមេរិក ដែលនឹងប្រព្រឹត្តទៅនៅឆ្នាំ២០២២ ខាងមុខនេះបន្តទៀតនោះទេ។
អតីតអគ្គលេខាធិការគណបក្សសង្គ្រោះជាតិក្រៅប្រទេស (CNRP-O) លោក ប៉ុន សៅរី បានសរសេរលើគណនី Facebook របស់លោកកាលពីថ្ងៃទី១៩ ធ្នូ ថា សមាជិកសភាសហរដ្ឋអាមេរិក លោក Alan Lowenthal គឺជាមិត្តដ៏ល្អរបស់ជាពលរដ្ឋខ្មែរ និងប្រទេសកម្ពុជា។ លោក Alan Lowenthal តែងតែចូលរួមឈឺឆ្អាលចំពោះសុខទុក្ខ និងសិទ្ធិសេរីភាពរបស់ប្រជាពលរដ្ឋខ្មែរជានិច្ច ហើយសមាជិកសភាសហរដ្ឋអាមេរិករូបនេះ តែងតែខ្នះខ្នែងចូលរួមជំរុញ និងគាំទ្រឲ្យមានការស្ដារលទ្ធិប្រជាធិបតេយ្យ និងការគោរពសិទ្ធិមនុស្សនៅកម្ពុជាយ៉ាងសកម្មផងដែរ។
កាលពីថ្ងៃទី១៦ ខែធ្នូ ឆ្នាំ២០២១ សមាជិករដ្ឋសភារបស់សហរដ្ឋអាមេរិក លោក Alan Lowenthal បានចេញប្រកាសព័ត៌មានថា លោកនឹងមិនឈរឈ្មោះជាបេក្ខជនរដ្ឋសភាឡើងវិញនៅឆ្នាំ២០២២ បន្តទៀតនោះទេ ប៉ុន្តែលោកបានបញ្ជាក់ថា ទោះបីជាលោកសម្រេចចិត្តដើរចេញពីជួរមុខនៃការតស៊ូដើម្បីពលរដ្ឋអាមេរិកក៏ដោយ ក៏លោកនៅតែតស៊ូដើម្បីកិច្ចការដែលត្រឹមត្រូវ និងអ្វីដែលធ្វើឱ្យកាន់តែប្រសើរឡើងទាំងប្រជាជន និងប្រទេសជាតិទៅថ្ងៃមុខ។
សមាជិករដ្ឋសភាអាមេរិកមកពីគណបក្សប្រជាធិបតេយ្យប្រចាំរដ្ឋកាលីហ្វ័រញ៉ា លោក Alan Lowenthal កាលពីចុងខែកក្កដា ឆ្នាំ២០២១ បានផ្ដួចផ្ដើមជំរុញឱ្យមានច្បាប់លទ្ធិប្រជាធិបតេយ្យសម្រាប់ប្រទេសកម្ពុជា (Cambodia Democracy Act) ឬហៅកាត់ថា H.R. លេខ៤៦៨៦ ដើម្បីដាក់ទណ្ឌកម្មលើរដ្ឋាភិបាលកម្ពុជាដែលកំពុងរំលោភសិទ្ធិមនុស្ស និងប្រជាធិបតេយ្យយ៉ាងធ្ងន់ធ្ងរសព្វថ្ងៃនេះ។
លោក Alan Lowenthal ធ្លាប់បានរិះគន់ថា មេដឹកនាំបក្សកាន់អំណាច លោក ហ៊ុន សែន បានធ្វើគ្រប់យ៉ាងតាមអំណាចរបស់ខ្លួន ដើម្បីបំផ្លាញលទ្ធិប្រជាធិបតេយ្យនៅកម្ពុជា ការបិទសិទ្ធិសេរីភាពសារព័ត៌មាន ការបង្ខំក្រុមជំទាស់ឲ្យនិរទេសខ្លួន ការរំលាយគណបក្សប្រឆាំង និងការចាប់ខ្លួនប្រធានគណបក្សសង្គ្រោះជាតិ លោក កឹម សុខា ជាដើម។
សមាជិកសភាអាមេរិករូបនេះអះអាងថា របៀបដឹកនាំបែបផ្ដាច់ការរបស់លោក ហ៊ុន សែន មកទល់ពេលនេះ គឺបញ្ច្រាសទៅនឹងកិច្ចសន្យាក្នុងកិច្ចព្រមព្រៀងសន្តិភាពទីក្រុងប៉ារីស ឆ្នាំ១៩៩១ ទាំងស្រុង ដូច្នេះការដាក់ទណ្ឌកម្មលើរដ្ឋាភិបាលមួយនេះ គឺជារឿងស័ក្តិសមបំផុត ព្រោះថាក្រុមលោក ហ៊ុន សែន បានវាយប្រហារកម្ទេចសិទ្ធិសេរីភាពរបស់ពលរដ្ឋខ្មែរឥតឈប់ឈររហូតមក។
កាលពីចុងខែឧសភា ឆ្នាំ២០២១ លោក Alan Lowenthal បានចុះហត្ថលេខារួមគ្នាជាមួយលោក Steve Chabot ដែលជាសមាជិកសភាអាមេរិកមកពីគណបក្សសាធារណរដ្ឋ តាមរយៈអនុរដ្ឋមន្ត្រីការបរទេសសហរដ្ឋអាមេរិក អ្នកស្រី Wendy R. Sherman ទាមទារឱ្យមេដឹកនាំបក្សកាន់អំណាច លោក ហ៊ុន សែន ទម្លាក់ចោលការចោទប្រកាន់ទៅលើប្រធានគណបក្សសង្គ្រោះជាតិ លោក កឹម សុខា និងទាមទារឱ្យគណបក្សសង្គ្រោះជាតិដំណើរការឡើងវិញ ដើម្បីចូលរួមក្នុងការបោះឆ្នោតក្រុមប្រឹក្សាឃុំ-សង្កាត់នៅឆ្នាំ២០២២ ខាងមុខនេះផងដែរ៕