31 C
Phnom Penh

អ្នកជំនាញ​អង្គការ​សហប្រជាជាតិ​ស្នើ​ឲ្យ​កម្ពុជា​ផ្អាក​អនុវត្ត​អនុក្រឹត្យ​ស្ដីពី​ច្រក​ទ្វារ​អ៊ីនធឺណិត​ជាតិ

ដោយ ឌឹ ខេមបូឌា ដេលី

បទវិភាគ

ក្រុម​អ្នកជំនាញ​អង្គការ​សហប្រជាជាតិ​ផ្នែក​សិទ្ធិមនុស្ស ជំរុញ​ឱ្យ​អាជ្ញាធរ​កម្ពុជា​ផ្អាក​គម្រោង​អនុវត្ត​អនុក្រឹត្យ​ស្ដីពី «ច្រក​ទ្វារ​អ៊ីនធឺណិត​ជាតិ» នៅ​ថ្ងៃ​ទី​១៦ ខែ​កុម្ភៈ ខាងមុខ​នេះ ដោយសារ​អនុក្រឹត្យ​នេះ​មាន​ការ​រឹតត្បិត និង​ធ្វើ​ឱ្យ​ប៉ះពាល់​ដល់​សិទ្ធិ​ឯកជន ព្រមទាំង​ជះ​ឥទ្ធិពល​អវិជ្ជមាន​យ៉ាង​ធ្ងន់ធ្ងរ​លើ​សេរីភាព​ប្រព័ន្ធ​អ៊ីនធឺណិត។

សេចក្ដី​ប្រកាស​ព័ត៌មាន​របស់​អ្នកជំនាញ​អង្គការ​សហប្រជាជាតិ​ផ្នែក​សិទ្ធិមនុស្ស បាន​ចេញ​ផ្សាយ​កាលពី​ថ្ងៃ​ចន្ទ ទី​៣១ មករា បាន​លើកឡើង​ថា អនុក្រឹត្យ​ដែល​គ្រោង​នឹង​ចូល​ជាធរមាន​នៅ​ថ្ងៃ​ទី​១៦ ខែ​កុម្ភៈ ខាងមុខ​នេះ នឹង​ជះ​ឥទ្ធិពល​អវិជ្ជមាន​យ៉ាង​ធ្ងន់ធ្ងរ​លើ​សេរីភាព​ប្រព័ន្ធ​អ៊ីនធឺណិត អ្នក​ការពារ​សិទ្ធិមនុស្ស និង​សង្គម​ស៊ីវិល​នៅ​ក្នុង​ប្រទេស​កម្ពុជា។

ប្រភព​ដដែល​ឲ្យ​ដឹង​ថា អនុក្រឹត្យ​ដែល​មាន​លក្ខណៈ​រឹតត្បិត​នេះ អាច​នឹង​មាន​ផល​ប៉ះពាល់​យ៉ាង​អាក្រក់​លើ​សិទ្ធិ​ឯកជន និង​បង្កើត​បាន​ជា​ហានិភ័យ​គ្រោះថ្នាក់​មួយ ប្រសិនបើ​ព័ត៌មាន​ទាំងនោះ​ត្រូវ​បាន​គេ​ប្រើ​ខុស។

អ្នកជំនាញ​អង្គការ​សហប្រជាជាតិ​បន្ត​ថា អនុក្រឹត្យ​នេះ​បាន​ផ្ដល់​អំណាច​លើសលប់​ដល់​ប្រតិបត្តិករ​ច្រក​ទ្វារ​អ៊ីនធឺណិត​ជាតិ ក្នុង​ការ​តាមដាន​គេហទំព័រ​ដែល​មនុស្ស​ទូទៅ​ចូល​មើល ក៏ដូចជា​បណ្ដុំ​ទិន្នន័យ​លម្អិត​ទាក់ទង​នឹង​រាល់​ការ​ចូល​មើល​គេហទំព័រ។ អនុក្រឹត្យ​នេះ​ក៏​នឹង​អនុញ្ញាត​ឱ្យ​អាជ្ញាធរ​អាច​បិទ​ការ​ចូល​ប្រើ​អ៊ីនធឺណិត ឬ​បិទ​គេហទំព័រ ឬ​ដែន​អ៊ីនធឺណិត​ជាក់លាក់​ណា​មួយ​តាម​អំពើ​ចិត្ត។

ក្រុម​នេះ​និយាយ​ថា អនុក្រឹត្យ​នេះ​នឹង​អនុញ្ញាត​ឱ្យ​រដ្ឋាភិបាល​កម្ពុជា អាច​តាមដាន​សកម្មភាព​លើ​ប្រព័ន្ធ​អ៊ីនធឺណិត ស្កាត់​ចាប់​យក និង​ត្រួតពិនិត្យ​ការ​ប្រាស្រ័យ​ទាក់ទង​តាម​ប្រព័ន្ធ​បច្ចេកវិទ្យា ព្រមទាំង​ប្រមូល រក្សា​ទុក និង​ចែករំលែក​ព័ត៌មាន​បុគ្គល​របស់​អ្នក​ប្រើប្រាស់​នីមួយៗ។

អ្នកជំនាញ​ដដែល​លើកឡើង​ថា អនុក្រឹត្យ​ដែល​ស្ថិត​ក្នុង​ទម្រង់​បច្ចុប្បន្ន​នេះ ហួស​ពី​ការ​រឹតត្បិត​ដែល​ត្រូវ​បាន​អនុញ្ញាត​ក្នុង​ការ​កម្រិត​សេរីភាព​បញ្ចេញមតិ​ដែល​មាន​ចែង​ក្នុង​មាត្រា​១៧ និង ១៩(៣) នៃ​កតិកាសញ្ញា​អន្តរជាតិ​ស្ដីពី​សិទ្ធិពលរដ្ឋ និង​សិទ្ធិ​នយោបាយ ដែល​ជា​សន្ធិសញ្ញា​សិទ្ធិមនុស្ស​ដ៏​សំខាន់​មួយ​ដែល​កម្ពុជា​ជា​ភាគី។ អ្នកជំនាញ​ស្នើ​ឱ្យ​អាជ្ញាធរ​កម្ពុជា​ផ្អាក​ការ​អនុវត្ត និង​ធ្វើការ​ជាមួយ​យន្តការ​សិទ្ធិមនុស្ស​អន្តរជាតិ និង​ក្រុម​ភ្នាក់ងារ​អង្គការ​សហប្រជាជាតិ​ប្រចាំ​ក្នុង​ប្រទេស ដើម្បី​ធ្វើ​ឱ្យ​អនុក្រឹត្យ​នេះ​ស្រប​ទៅ​នឹង​កិច្ចការពារ​សិទ្ធិមនុស្ស។

នាយក​ប្រតិបត្តិ​មជ្ឈមណ្ឌល​កម្ពុជា​ដើម្បី​ប្រព័ន្ធ​ផ្សព្វផ្សាយ​ឯករាជ្យ (CCIM) លោក ប៉ា ងួនទៀង មាន​ប្រសាសន៍​កន្លងមក​ថា គោលបំណង​ដែល​រដ្ឋាភិបាល​បាន​ផ្ដល់​ក្នុង​អនុក្រឹត្យ​ស្ដីពី​ការ​បង្កើត​ច្រក​ទ្វារ​អ៊ីនធឺណិត​ជាតិ គឺ​មាន​ភាព​ទូលំទូលាយ។ លោក​ថា អនុក្រឹត្យ​នេះ​បាន​ផ្ដល់​អំណាច​ដល់​រដ្ឋាភិបាល​ហួស​ព្រំដែន ដោយ​អាច​បកស្រាយ និង​អាច​បិទ​ក្រុមហ៊ុន​ផ្ដល់​សេវា​អ៊ីនធឺណិត​ស្រេចតែចិត្ត។

ទោះ​យ៉ាងណា អ្នក​នាំពាក្យ​ក្រសួង​ប្រៃសណីយ៍ និង​ទូរគមនាគមន៍ លោក មាស ប៉ូ បដិសេធ​ធ្វើ​អធិប្បាយ​ចំពោះ​ករណី​នេះ។

មាត្រា​៦ នៃ​អនុក្រឹត្យ​ស្ដីពី​ការ​បង្កើត​ច្រក​ទ្វារ​អ៊ីនធឺណិត​ជាតិ បាន​កំណត់​ឱ្យ​ក្រុមហ៊ុន ឬ​ប្រតិបត្តិករ​ត្រូវ​ផ្ដល់​អំពី​ស្ថានភាព គុណភាព និង​ក្រាហ្វិក​នៃ​ការ​តភ្ជាប់​បណ្ដាញ​ជូន​ទៅ​ក្រសួង​ប្រៃសណីយ៍ និង​ទូរគមនាគមន៍ ហើយ​ត្រូវ​សហការ​ជាមួយ​ក្រសួង និង​សមត្ថកិច្ច​ពាក់ព័ន្ធ​ផ្សេង​ទៀត​ក្នុង​ការ​ចាត់​វិធានការ​ទប់ស្កាត់ និង​ការ​កាត់ផ្ដាច់​ចោល​រាល់​ការ​តភ្ជាប់​បណ្ដាញ​ទាំងឡាយ​ណា​ដែល​ប៉ះពាល់​ដល់​ចំណូល​ជាតិ សុវត្ថិភាព សណ្ដាប់ធ្នាប់​សង្គម សីលធម៌ វប្បធម៌ និង​ទំនៀមទម្លាប់ ជាដើម។

រីឯ​មាត្រា​១៤ នៃ​ច្បាប់​ដដែល​នេះ​បាន​ចែង​ថា ក្រសួង​មាន​សិទ្ធិ​ត្រួតពិនិត្យ​លើ​ហេដ្ឋារចនាសម្ព័ន្ធ និង​បណ្ដាញ រួម​ទាំង​គ្រឿង​សម្ភារ​បរិក្ខារ​នៃ​ច្រក​ទ្វារ​អ៊ីនធឺណិត​ក្នុង​ករណី​ចាំបាច់ និង​ត្រូវ​ផ្ដល់​ព័ត៌មាន​ផ្សេង​ទៀត។ លើស​ពី​នេះ ប្រតិបត្តិករ​ត្រូវ​រក្សា​ទុក​កំណត់ត្រា​បច្ចេកទេស និង​តារាង​បែងចែក​ការ​ផ្ដល់​អាសយដ្ឋាន និង​កំណត់​ផ្លូវ​នៃ​ក្រាហ្វិក​ឆ្លងកាត់​ច្រក​ទ្វារ​អ៊ីនធឺណិត​ជាតិ​រយៈពេល ១២​ខែ​ចុងក្រោយ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស