ក្រុមមន្ត្រីសង្គមស៊ីវិលស្នើឱ្យមន្ត្រីរដ្ឋាភិបាលប្រកាសទ្រព្យ និងបំណុលរបស់មន្ត្រីតាមក្រសួង-ស្ថាប័នជាសាធារណៈ ដោយពុំចាំបាច់ប្រកាសនៅតែក្នុងអង្គភាពប្រឆាំងអំពើពុករលួយតែមួយនោះទេ បន្ទាប់ពីក្រសួងមួយចំនួនបានរកឃើញថា មានមន្ត្រីជាប់ពាក់ព័ន្ធនឹងអំពើពុករលួយ។
ប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ ថ្លែងថា ការប្រកាសទ្រព្យ និងបំណុលរបស់ក្រសួង-ស្ថាប័នជាតិជាសាធារណៈ គឺជារឿងមួយល្អ ដើម្បីកាត់បន្ថយអំពើពុករលួយ ដោយសារផ្ទៀងផ្ទាត់ស្ថានភាពនៃការងារទៅនឹងប្រាក់ចំណូលរបស់បុគ្គលក្នុងស្ថាប័ន។
លោកថា លោកចង់ឱ្យព័ត៌មាននៃការមានទ្រព្យរបស់មន្ត្រីដែលត្រូវប្រកាស គឺត្រូវបានដឹងឮជាសាធារណៈ ហើយពលរដ្ឋគេអាចប៉ាន់ប្រមាណមើលថា ឋានៈរបស់មន្ត្រីទាំងនោះស័ក្តិសមនឹងមានទ្រព្យប៉ុណ្ណឹងដែរទេ។ បើមានទ្រព្យច្រើន ហើយមិនអាចពន្យល់បាន គឺជាទ្រព្យមួយដែលកើតពីអំពើពុករលួយ។ លោកថា ការប្រកាសបែបនេះ គឺប្រសើរជាងការប្រកាសដាក់ក្នុងស្រោមសំបុត្រ ហើយពេលមានបញ្ហាទើបស៊ើបអង្កេតជាក្រោយនោះ គឺមិនបានធ្វើឱ្យមហាជនពេញចិត្តឡើយ។
កាលពីថ្ងៃទី៣០ ខែមករា ឆ្នាំ២០២២ នាយកដ្ឋានប្រកាសទ្រព្យសម្បត្តិ និងបំណុលនៃអង្គភាពប្រឆាំងអំពើពុករលួយ (អ.ប.ព.) បានចេញសេចក្ដីជូនដំណឹងអះអាងថា អង្គភាពនេះបានទទួលឯកសារប្រកាសទ្រព្យសម្បត្តិ និងបំណុលសរុបចំនួនជាង ១ម៉ឺន ៤ពាន់ច្បាប់ (១៤៤៣៥ច្បាប់)។ ក្រសួង-ស្ថាប័ន និងរាជធានី-ខេត្តដែលបានបញ្ចប់ការប្រកាសរបស់ខ្លួន ១០០% មាន ៣១ស្ថាប័ន ដូចជាគណៈកម្មាធិការជាតិរៀបចំការបោះឆ្នោត ស្ថាប័នប្រឆាំងអំពើពុករលួយ ក្រសួងការបរទេស និងសហប្រតិបត្តិការអន្តរជាតិ និងរដ្ឋលេខាធិការដ្ឋានអាកាសចរស៊ីវិល ជាដើម។
អង្គភាពដដែលបន្តថា ចំពោះរាជធានី-ខេត្តដែលបានបញ្ចប់ការប្រកាសរបស់ខ្លួនទាំងស្រុងដែរនោះមានចំនួន ២៥ ដូចជាខេត្តមណ្ឌលគិរី ខេត្តពោធិ៍សាត់ ខេត្តកំពង់ចាម ខេត្តត្បូងឃ្មុំ ខេត្តកំពង់ស្ពឺ ខេត្តកំពង់ឆ្នាំង និងខេត្តបាត់ដំបង ជាដើម។
នៅថ្ងៃទី២ កុម្ភៈ នេះផងដែរ អង្គភាពប្រឆាំងអំពើពុករលួយ (ACU) បានចេញសេចក្ដីប្រកាសមួយដោយបញ្ជាក់ថា ក្រុមស៊ើបអង្កេតផ្ទៃក្នុងនៃអង្គភាពប្រឆាំងអំពើពុករលួយ បានរកឃើញថាមន្ត្រីរបស់ខ្លួនជាប់សង្ស័យប្រព្រឹត្តអំពើពុករលួយ ដែលបញ្ញត្តិក្នុងមាត្រា៥៩២ ឬបទវីតិក្រមនៃក្រមព្រហ្មទណ្ឌ និងមាត្រា៣២ នៃច្បាប់ស្ដីពីការប្រឆាំងអំពើពុករលួយ។ បច្ចុប្បន្ន អង្គភាពនេះបានបញ្ជូនមន្ត្រីម្នាក់ទៅសាលាដំបូងរាជធានីភ្នំពេញ ដើម្បីចាត់វិធានការច្បាប់បន្ត។
ករណីនេះ អង្គភាពប្រឆាំងអំពើពុករលួយលើកទឹកចិត្តដល់សាធារណជនចូលរួមផ្ដល់ព័ត៌មានមកអង្គភាពនេះជាបន្ទាន់ ក្នុងករណីដែលមានជនខិលខូចណាម្នាក់អះអាងថា ខ្លួនអាចប្រើប្រាស់តួនាទីរបស់ខ្លួនជាមន្ត្រីអង្គភាពប្រឆាំងអំពើពុករលួយ ដើម្បីជួយសម្រួលដល់កិច្ចការល្មើសច្បាប់ណាមួយ។
ទាក់ទិនបញ្ហាពុករលួយនេះដែរ ប្រធានអង្គភាពប្រឆាំងអំពើពុករលួយ លោក ឱម យ៉ិនទៀង កាលពីថ្ងៃទី២៦ ខែមករា ឆ្នាំ២០២២ បានចេញលិខិតអញ្ជើញ ឬកោះហៅលោក ឯក ច័ន្ទពន្លឹក សកលវិទ្យាធិការរងសាកលវិទ្យាល័យការពារជាតិ ដើម្បីឱ្យចូលខ្លួនទៅបំភ្លឺពាក់ព័ន្ធភាពមិនប្រក្រតីមួយចំនួននៅក្នុងសកម្មភាពបំពេញតួនាទីភារកិច្ចរបស់ខ្លួន តាមពាក្យបណ្ដឹងដែលអង្គភាពមួយនេះទទួលបានកាលពីថ្ងៃទី១៨ ខែមករា ឆ្នាំ២០២២។
យោងតាមលេខាធិការដ្ឋាននៃអង្គការតម្លាភាពអន្តរជាតិ ដែលមានការិយាល័យនៅទីក្រុងប៊ែរឡាំង ប្រទេសអាល្លឺម៉ង់ ចេញផ្សាយនូវលទ្ធផលសន្ទស្សន៍នៃការយល់ឃើញពីអំពើពុករលួយ (CPI) ឆ្នាំ២០២១ នាថ្ងៃទី២៥ ខែមករា ឆ្នាំ២០២២ លើកឡើងថា កម្ពុជាជាប់ចំណាត់ថ្នាក់ទី១៥៧ ក្នុងចំណោម ១៨០ប្រទេស និងដែនដីដែលត្រូវបានដាក់បញ្ចូលក្នុងការសិក្សា។
កម្ពុជាទទួលបានពិន្ទុ ២៣លើពិន្ទុអតិបរមា ១០០ គឺឡើងពីពិន្ទុ ២១ ដែលទទួលបានក្នុងឆ្នាំ២០២០។ កម្ពុជានៅជាប្រទេសពុករលួយជាងគេបំផុតនៅតំបន់អាស៊ាន ព្រោះមានអំពើពុករលួយចាក់ឫសទាំងក្នុងវិស័យសាធារណៈ និងវិស័យឯកជន៕