នៅលើគេហទំព័ររបស់រដ្ឋមន្ត្រីក្រសួងការបរទេសអូស្ត្រាលី គឺមានសេចក្ដីថ្លែងការណ៍មួយនិយាយអំពីការឃុំខ្លួន និងការកាត់ទោសដោយអយុត្តិធម៌ពីសំណាក់របបសឹកភូមា ទៅលើលោកសាស្ត្រាចារ្យ Sean Turnell ជាជនជាតិអូស្ត្រាលី និងជាទីប្រឹក្សាសេដ្ឋកិច្ចរបស់អ្នកស្រី អ៊ុងសាន ស៊ូជី។
នៅក្នុងសេចក្ដីថ្លែងការណ៍នេះហើយដែលអ្នកស្រី Marise Payne បានប្រាប់ទៅរបបសឹកភូមាថាត្រូវតែដោះលែង លោក Sean Turnell ជាបន្ទាន់ ព្រោះរដ្ឋាភិបាលកាំបេរ៉ា ចាត់ទុកជារឿងអយុត្តិធម៌បំផុតដែលពួកយោធាធ្វើទៅលើពលរដ្ឋអូស្ត្រាលី ហើយធ្វើឱ្យឈឺចាប់ដល់រដ្ឋាភិបាលទៀតផង។
ក្នុងលិខិតរបស់រដ្ឋមន្ត្រីការបរទេសអូស្ត្រាលី ដែលធ្វើឡើងកាលពីថ្ងៃទី៦ កុម្ភៈ បានបញ្ជាក់ថា លោកសាស្ត្រាចារ្យ Sean Turnell ត្រូវបានឃុំខ្លួនជាងមួយឆ្នាំមកហើយ។ ការកាត់ទោសទៅលើបុរសរូបនេះ គឺសម្រាប់រដ្ឋាភិបាលអូស្ត្រាលី សូមទាត់ចោលទាំងស្រុង ហើយផ្ទុយទៅវិញត្រូវតែដោះលែងគាត់ជាបន្ទាន់ គឺឲ្យគាត់មកប្រទេសអូស្ត្រាលី វិញ ដើម្បីជួបជុំគ្រួសាររបស់គាត់។
លិខិតរបស់អ្នកស្រី Marise Payne បានសរសេរថា ស្ថានទូតអូស្ត្រាលី នៅទីក្រុងណៃភិដោ បានប្រាប់ឱ្យពួកយោធាដោះលែងលោកសាស្ត្រាចារ្យ Sean Turnell ជាច្រើនខែមកហើយដែលអ្នកស្រីថា អូស្ត្រាលីមិនចង់មានវិធានការក្ដៅអ្វីលើពួកយោធាទេ។
តែប្រយោគមួយដែលទំនងធ្វើឱ្យពួកយោធាពិចារណាសម្រេចដោះលែងសាស្ត្រាចារ្យ Sean Turnell គឺអ្នកស្រីបង្ហើបថា អូស្ត្រាលីមានសម្ពន្ធភាពខ្លាំងៗជាច្រើនដែលគាំទ្រអូស្ត្រាលី និងគាំទ្រលោក Sean Turnell ឲ្យមានសេរីភាពឡើងវិញ ហើយថាអូស្ត្រាលីនឹងបន្តជំរុញសម្ពន្ធភាពឲ្យរួមសហការគ្នាដាក់ទម្ងន់ទៅលើពួកយោធា។
ក្រៅពីនេះទៀត លិខិតរបស់អ្នកស្រីដែលបានបង្ហាញលេខទូរស័ព្ទចំនួនពីរខ្សែទៅពួកយោធាផងដែរ ក៏បានប្រាប់ថា ជនជាតិអូស្ត្រាលីម្នាក់នេះត្រូវតែមានសុខភាពល្អ ហើយត្រូវតែបើកផ្លូវឲ្យមេធាវី និងគ្រួសារទៅជួបលោក Sean Turnell។
រដ្ឋាភិបាលអូស្ត្រាលី បានទាមទារឱ្យពួកយោធាដោះលែងលោក Sean Turnell ជាបន្ទាន់បន្ទាប់ពីទទួលដំណឹងថា តុលាការរបបសឹកបានកាត់ទោសបុរសជនជាតិអូស្ត្រាលីរូបនេះឱ្យមានទោស ១៤ឆ្នាំ ដែលកំហុសទម្លាក់ទៅលើលោក Sean Turnell គឺចោទថាបុរសនេះជាមេគំនិតរុញឱ្យអ្នកស្រី ស៊ូជី រំលោភច្បាប់ដាក់ប្រទេសក្នុងគ្រាមានអាសន្ន នៅពេលប្រទេសធ្លាក់ក្នុងជំងឺកូវីដ និងមួយករណីទៀត គឺរំលោភច្បាប់សម្ងាត់របស់ប្រទេស។
លោក Sean Turnell ត្រូវបានចាប់ខ្លួននៅអំឡុងខែកុម្ភៈ គឺប៉ុន្មានថ្ងៃប៉ុណ្ណោះដែលពួកយោធាធ្វើរដ្ឋប្រហារផ្ដួលរំលំរបបប្រជាធិបតេយ្យដឹកនាំដោយអ្នកស្រី អ៊ុងសាន ស៊ូជី។ សម្រាប់អ្នកស្រីរដ្ឋមន្ត្រីការបរទេសអូស្ត្រាលី បានប្រាប់ទៅពួកយោធាភូមា ទោះបទចោទអ្វីក៏ដោយ គឺរដ្ឋាភិបាលអូស្ត្រាលីមិនអាចទទួលយកបានឡើយ។ អ្នកស្រីថាត្រូវតែដោះលែងលោក Sean Turnell ជាបន្ទាន់ គឺគាត់ជាប់ឃុំខ្លួនអយុត្តិធម៌បំផុត គឺជាងមួយឆ្នាំហើយ។
យ៉ាងណា ភាពមិនច្បាស់លាស់កំពុងកើតមានអំពីថាតើលោកសាស្ត្រាចារ្យ Sean Turnell ត្រូវបានដោះលែងឱ្យមានសេរីភាពហើយឬនៅនៅថ្ងៃទី៧ កុម្ភៈ នេះ។
បើតាមទីភ្នាក់ងារសារព័ត៌មានរបស់រដ្ឋាភិបាលកម្ពុជា ហៅកាត់ថា AKP អះអាងថា លោក Sean Turnell ត្រូវបានដោះលែងហើយ។ ស្ថាប័នព័ត៌មានមួយនេះបានបញ្ជាក់ថា ការដោះលែងលោក Sean Turnell គឺតាមសំណើរបស់លោក ហ៊ុន សែន ដែលជាប្រធានអាស៊ានសម្រាប់ឆ្នាំនេះ។
បើតាមប្រភពដដែលនេះ លោក ហ៊ុន សែន និយាយថា លោកសាទរដែលបុរសជនជាតិអូស្ត្រាលីរូបនេះត្រូវបានដោះលែងតាមសំណើរបស់លោក ដែលបានស្នើទៅពួកយោធាភូមាជំនួសឱ្យរដ្ឋាភិបាលអូស្ត្រាលី។
តែរឿងនេះនៅមិនទាន់ច្បាស់ការនៅឡើយទេ ព្រោះទីភ្នាក់ងារសារព័ត៌មានរបស់ប្រទេសបារាំង AFP ដែលជាសារព័ត៌មានត្រូវបានទទួលស្គាល់ពេញពិភពលោកថាមានវិជ្ជាជីវៈត្រឹមត្រូវ បានចុះផ្សាយនៅរសៀលថ្ងៃទី៧ កុម្ភៈ នេះថា បុរសជនជាតិអូស្ត្រាលីរូបនេះនៅមិនទាន់ត្រូវបានដោះលែងឱ្យមានសេរីភាពនៅឡើយទេ។ ប្រភពដដែលនេះថាក្រុមប្រឹក្សាយោធាភូមាសូមទាត់ចោលការចុះផ្សាយដូចនេះ។
ទីភ្នាក់ងារសារព័ត៌មាន AFP បានស្រង់សម្ដីអ្នកនាំពាក្យក្រុមប្រឹក្សាយោធា គឺលោក Zaw Min Tun អំពីបុរសម្នាក់ឈ្មោះលោក Sean Turnell។ លោក Zaw Min Tun បានច្រានចោលព័ត៌មានដែលចុះផ្សាយថាមានការដោះលែងបុរសជនជាតិអូស្ត្រាលីរូបនេះ។
យ៉ាងណា លោកឧត្តមសេនីយ៍ មីន អ៊ុងឡាំង បានប្រាប់ AFP ថា ការដោះលែងលោក Sean Turnell គឺលោកកំពុងពិចារណារឿងនេះ តែលោកថាត្រូវរង់ចាំការជំនុំជម្រះក្ដីបុរសនេះរួចរាល់សិន។
កន្លងមក របបសឹកភូមាបានដោះលែងជនបរទេសជាច្រើននាក់រួចមកហើយ មានដូចជាអ្នកកាសែតជនជាតិអាមេរិកាំង លោក Danny Fenster ឲ្យបានរួចផុតពីការឃុំឃាំង ដោយសារតែមានជំនួបផ្ទាល់រវាងលោក មីន អ៊ុងឡាំង និងអតីតឯកអគ្គរដ្ឋទូតអាមេរិកប្រចាំអង្គការសហប្រជាជាតិ លោក Bill Richardson។
លោក Richardson បានទៅដល់ប្រទេសភូមា កាលពីដើមខែវិច្ឆិកា ឆ្នាំ២០២១ ក្នុងដំណើរទស្សនកិច្ចរយៈពេលពីរសប្តាហ៍ក្នុងក្របខ័ណ្ឌនៃការបំពេញបេសកកម្មមនុស្សធម៌។ តែលោកបានស្វែងរកការដោះលែងឱ្យអ្នកកាសែត Danny Fenster ផងដែរ។ លោក Danny Fenster ជាអ្នកកាសែតបរទេសដែលជាប់ក្នុងពន្ធនាគារនៅភូមា ក្រោយពីរដ្ឋប្រហារថ្ងៃទី១ ខែកុម្ភៈ ឆ្នាំ២០២១។ លោក Danny Fenster បានចាកចេញភ្លាមពីភូមា ជាមួយលោក Richardson ហើយបានទៅដល់សហរដ្ឋអាមេរិក កាលពីថ្ងៃទី១៦ ខែវិច្ឆិកា ឆ្នាំ២០២១។
អ្នកកាសែតម្នាក់ជនជាតិជប៉ុន គឺលោក Yuki Kitazumi ត្រូវបានរបបសឹកភូមាដោះលែងកាលពីថ្ងៃទី២១ ឧសភា ក្រោយពួកយោធាកាត់ទោសពីបទផ្សាយព័ត៌មានមិនពិត។ លោក Yuki Kitazumi គឺជាអ្នកកាសែត Freelance សម្រាប់ស្ថាប័នព័ត៌មាន Japan Nikkei business។ ការដោះលែងអ្នកកាសែតជប៉ុនរូបនេះ ក្រោយពីរដ្ឋាភិបាលក្រុងតូក្យូ ថ្កោលទោសរបបសឹកយ៉ាងខ្លាំង ហើយព្រមានដាក់ទណ្ឌកម្មលើរបបសឹកនេះទៀតផង៕