29 C
Phnom Penh

អ្នក​ឃ្លាំមើល៖ ការ​លាតត្រដាង​របស់​លោក ឌួង ងៀប ឆ្លុះបញ្ចាំង​អំពើ​ពុករលួយ​ចាក់ឫស​ក្នុង​ប្រព័ន្ធ​តុលាការ

ដោយ ឌឹ ខេមបូឌា ដេលី

បទវិភាគ

អ្នក​ឃ្លាំមើល​បញ្ហា​សង្គម​ចាត់ទុក​ថា ការ​លាតត្រដាង​ពី​ភាព​អយុត្តិធម៌​របស់​លោក ឌួង ងៀប ដែល​ជា​ឧត្ដមសេនីយ៍ឯក​ផ្កាយ​៣ បាន​ឆ្លុះបញ្ចាំង​ឱ្យ​ឃើញ​ពី​អំពើពុករលួយ​ចាក់ឫស​ជ្រៅ​ក្នុង​ប្រព័ន្ធ​តុលាការ ដែល​ពលរដ្ឋ​ខ្មែរ​ច្រើន​ណាស់​បាន​រងគ្រោះ​ធ្លាក់​ខ្លួន​អស់​ទ្រព្យ​ដោយសារ​ល្បែង​ពុករលួយ​របស់​ចៅក្រម​នៅ​កម្ពុជា។

លោក ឌួង ងៀប ដែល​មាន​តួនាទី​ជា​ឧត្ដមសេនីយ៍ឯក​ផ្កាយ​មាស​៣ និង​ជា​ឧកញ៉ា​ផង បាន​ចេញ​ឡាយ​វីដេអូ​ចំនួន​ពីរ កាលពី​ថ្ងៃ​ទី​៧ និង​ថ្ងៃ​ទី​៨ ខែ​កុម្ភៈ ដោយ​ភ្ជាប់​ជាមួយ​ឯកសារ​មួយ​ចំនួន​ផង​នោះ បាន​បង្ហោះ​លើ​ទំព័រ Facebook ដោយ​និយាយ​ថា រូបលោក​ត្រូវ​បាន​តុលាការ​កាត់ទោស​ពី​បទ «ផិត​ក្បត់» ហើយ​បច្ចុប្បន្ន​កំពុង​ត្រូវ​បាន​កាត់ទោស​ពី​បទ «ឆបោក​ជនជាតិ​តៃវ៉ាន់» មួយ​ទៀត។

ការ​ចេញ​ឡាយ​វីដេអូ​និយាយ​ពី​បញ្ហា​ជម្លោះ​ជាមួយ​ជនជាតិ​តៃវ៉ាន់ និង​ការ​បែកបាក់​ប្រពន្ធ​កូន​ដោយ​លោក ឌួង ងៀប អះអាង​ថា មកពី​រូបលោក​អត់ទ្រាំ​ជាមួយ​ចៅក្រម​លែង​បាន ហើយ​លោក​អស់​លុយ​ឱ្យ​ចៅក្រម​តទៅទៀត។

អ្នក​នាំពាក្យ​សមាគម​ការពារ​សិទ្ធិមនុស្ស​អាដហុក លោក ស៊ឹង សែនករុណា លើកឡើង​ថា កន្លងមក អង្គការ​អន្តរជាតិ​បាន​រក​ឃើញ​ពី​អំពើពុករលួយ និង​ភាព​អយុត្តិធម៌​បាន​កើត​នៅ​ក្នុង​សង្គម​កម្ពុជា ដោយសារតែ​ប្រព័ន្ធ​យុត្តិធម៌​មិន​ឯករាជ្យ ហើយ​របាយការណ៍​នេះ​តែងតែ​ត្រូវ​បាន​រដ្ឋាភិបាល​ច្រានចោល ចំណែក​ឯ​ការ​អះអាង​របស់​លោក ឌួង ងៀប នា​ពេលនេះ បាន​បង្ហាញ​កាន់តែ​ច្បាស់​បន្ថែម​ទៀត។

លោក​ចាត់ទុក​ករណី​នេះ បាន​ឆ្លុះបញ្ចាំង​ឱ្យ​ឃើញ​ថា ភាព​អយុត្តិធម៌ និង​ការ​រង​ភាព​ឈឺចាប់​ដោយសារ​ប្រព័ន្ធ​តុលាការ មិនមែន​កើតឡើង​តែ​ប្រជាពលរដ្ឋ​ក្រីក្រ​នោះ​ទេ ប៉ុន្តែ​វា​បាន​កើតឡើង​គ្រប់​ស្រទាប់​វណ្ណៈ​ទាំងអស់ មិន​ថា​មាន​ទ្រព្យ ឧកញ៉ា និង​អ្នក​ក្រ​ឡើយ។

ទោះ​យ៉ាងណា លោក ស៊ឹង សែនករុណា ជំរុញ​ឱ្យ​មាន​ការ​ស៊ើបអង្កេត​មួយ ដើម្បី​ផ្ដល់​យុត្តិធម៌​ដល់​ជនរងគ្រោះ និង​កុំ​ឱ្យ​អំពើ​នេះ​កើតឡើង​នៅ​ក្នុង​សង្គម​ខ្មែរ ឬ​ប្រព័ន្ធ​តុលាការ​កម្ពុជា​បន្ត​ទៀត ដើម្បី​ឱ្យ​ប្រជាពលរដ្ឋ​មាន​ភាព​ជឿជាក់​ឡើងវិញ និង​បញ្ចៀស​ការ​រិះគន់​បន្ត​ទៀត​ផង​ដែរ។

អ្នកវិភាគ​នយោបាយ សង្គម និង​ជា​អនុប្រធាន​ក្រុមប្រឹក្សាភិបាល​នៃ​ចលនា​ពលរដ្ឋ​ដើម្បី​ប្រជាធិបតេយ្យ (PMD) លោក គឹម សុខ

អ្នកវិភាគ​នយោបាយ សង្គម និង​ជា​អនុប្រធាន​ក្រុមប្រឹក្សាភិបាល​នៃ​ចលនា​ពលរដ្ឋ​ដើម្បី​លទ្ធិប្រជាធិបតេយ្យ (PMD) លោក គឹម សុខ យល់​ថា ករណី​លោក ឌួង ងៀប នេះ មិនមែន​ជា​ល្ខោន​នយោបាយ​បំពុល​ព័ត៌មាន​សង្គម​ទេ តែ​ជា​ការ​ឆ្លុះបញ្ចាំង​អំពី​ចរិត​ពុករលួយ​ស៊ីជម្រៅ​ក្នុង​ប្រព័ន្ធ​តុលាការ​កម្ពុជា។ នេះ​ជា​អ្វី​ដែល​លោក​ធ្លាប់​បំភ្លឺ​ថា នៅ​ពេល​មាន​ជម្លោះ​ប្ដឹង​គ្នា​ក្ដី​ក្ដាំ​ឡើង​តុលាការ ភារកិច្ច​ចម្បង​របស់​ពួក​ចៅក្រម មិនមែន​ពិនិត្យ​ស្រាវជ្រាវ​រក​ខុសត្រូវ​នោះ​ទេ ប៉ុន្តែ​វិធី​ដំបូង​របស់​ពួកគេ​នោះ គឺ​រក​ស៊ីលុយ​ទាំងសងខាង ទាំង​ចុងចោទ និង​ដើមចោទ។

លើស​ពី​នេះ បន្ទាប់ពី​ស៊ី​មួយ​វគ្គ​ហើយ ពួក​ចៅក្រម​ប្រឹង​រក​ឱ្យ​ឃើញ​ថា ភាគី​ណា​នៃ​គូ​ជម្លោះ​មាន​លទ្ធភាព​ជាង ហើយ​បង្កើត​ល្បែង​ស៊ី​ភាគី​ដែល​មាន​ទ្រព្យ​ច្រើន​ជាង​នោះ​រហូត​ដល់​អស់​ពី​ខ្លួន ខណៈ​ពេលខ្លះ គូ​ជម្លោះ​ចេះតែ​តាម​អ៊ុត​តាម​ល្បែង​ស៊ីលុយ​របស់​ចៅក្រម​រហូត​ដល់​អស់​ផ្ទះ អស់​ដី​ថែម​ទៀត ក៏​នៅតែ​គ្មាន​លទ្ធផល​សម្រេច។

លោក គឹម សុខ បន្ត​ថា ប្រជាពលរដ្ឋ​ខ្មែរ​ច្រើន​ណាស់​ដែល​រងគ្រោះ​ធ្លាក់​ខ្លួន​អស់​ទ្រព្យ​ដោយសារ​ល្បែង​ពុករលួយ​របស់​ពួក​ចៅក្រម​នៅ​កម្ពុជា ហើយ​ភាគច្រើន​លើសលប់​សម្ងំ​ឈឺចាប់ មិន​ហ៊ាន​និយាយ​ក្រោយពី​ចាញ់​បោក​ចៅក្រម រីឯ​ខ្លះ​ទៀត​ដល់​ទៅ​ទ្រាំ​លែង​បាន ក៏​ចេញ​បក​ស្បែក​មុខ​ចៅក្រម​ដូច​ករណី​លោក ឌួង ងៀប នេះ​ជាដើម។

យ៉ាងណា លោក​ថា​បើ​តាម​ការ​អះអាង​របស់​លោក ឌួង ងៀប នេះ លោក​ក៏​មាន​ខ្សែ​បណ្ដាញ​ធំ​ដែរ ទើប​ហ៊ាន​ចេញ​មុខ​បន្លឺ​សំឡេង​ឮៗ​តវ៉ា​ជា​សាធារណៈ​ត​ទល់នឹង​ចៅក្រម ពីព្រោះ​ពួក​ចៅក្រម​នៃ​តុលាការ​កម្ពុជា ហាក់​មាន​អភ័យ​ឯកសិទ្ធិ​ពី​លោក ហ៊ុន សែន ឱ្យ​ប្រព្រឹត្ត​អំពើពុករលួយ​យក​លុយ​មួយ​ចំណែក​ជួយ​គណបក្ស​ប្រជាជន​កម្ពុជា ហើយ​បើ​ប៉ះ​អ្នក​មាន​ខ្សែ​ធំ​កាង ទើប​សម្រួល​គ្នា​ជា​ក្រោយ។

លោក គឹម សុខ ចាត់ទុក​ការ​ប្រព្រឹត្ត​របស់​ចៅក្រម​នេះ ថា​ជា​ប្រពៃណី​ការងារ​ក្នុង​ប្រព័ន្ធ​តុលាការ​កម្ពុជា។

លោក ឌួង ងៀប បាន​រៀបរាប់​ក្នុង​វីដេអូ​ថា បន្ទាប់ពី​មាន​ជម្លោះ​ជាមួយ​គ្រួសារ​នោះ រូបលោក​ក៏​ត្រូវ​បាន​គ្រួសារ​បណ្ដេញ​ចេញ​ពី​ផ្ទះ ហើយ​ប្រពន្ធ​របស់​គាត់​បាន​យក​ឯកសារ​អាជីវកម្ម​របស់​គាត់​ទាំងអស់។ ដៃគូ​សហការី និង​ប្រពន្ធ បាន​ជំរុញ​ឱ្យ​គាត់​ខ្ចី​លុយ​ចំនួន ១​លាន​ដុល្លារ​ពី​ធនាគារ​មួយ ហើយ​លោក​ចោទ​ថា ប្រពន្ធ​យក​ពាក់កណ្ដាល​ទៅ​លេង​ល្បែង​ភ្នាល់​ទឹកភ្លៀង​ថែម​ទៀត ខណៈ​បច្ចុប្បន្ន លោក ឌួង ងៀប និយាយ​ថា មក​ដល់​ពេលនេះ លោក​បាន​ប្រឈម​នឹង​បណ្ដឹង​ពី​បទ​ឆបោក ហើយ​សំណុំរឿង​នេះ​បាន​ឈាន​ទៅ​ដល់​សំណុំរឿង​ព្រហ្មទណ្ឌ​ដែរ។

លោក ឌួង ងៀប ឧត្ដមសេនីយ៍ឯក​ផ្កាយ​មាស​៣ និង​ជា​ឧកញ៉ា​ផង។ (រូបថត​ពី​ហ្វេសប៊ុក)

លោក ឌួង ងៀប មាន​តួនាទី​ជា​ឧត្ដមសេនីយ៍ឯក​ផ្កាយ​៣ និង​ជា​ឧកញ៉ា​ផង​នោះ បាន​និយាយ​ថា បន្ទាប់ពី​រង​ការ​ចោទប្រកាន់​ហើយ រូបលោក​បាន​អង្វរ​តុលាការ​ឱ្យ​ជួយ ខណៈ​លោក​អះអាង​ថា មិន​ដែល​បោក​អ្នក​ណា​មួយ​រៀល​ទេ ប៉ុន្តែ​បែរជា​ចាញ់​បោក​ទៅ​តុលាការ​ដែល​ត្រូវ​បង់​លុយ​ម្ដង​ហើយ​ម្ដង​ទៀត ទោះបីជា​ខ្លួន​មិន​មាន​កំហុស​ក៏ដោយ។

បើ​តាម​ការ​សិក្សា​ថ្មី​មួយ​របស់​គម្រោង​នីតិរដ្ឋ​ពិភពលោក (World Justice Project) ចេញ​ផ្សាយ​កាលពី​ថ្ងៃ​ទី​១៤ ខែ​តុលា ឆ្នាំ​២០២១ បាន​វាយតម្លៃ​ថា នីតិរដ្ឋ​នៅ​កម្ពុជា​ទាប​ជាងគេ​នៅ​តំបន់​អាស៊ី​ប៉ាស៊ីហ្វិក ស្ថិត​ក្នុង​ចំណាត់ថ្នាក់​ទី​១៣៨ ក្នុង​ចំណោម​ប្រទេស​១៣៩ នៃ​គម្រោង​ដែល​បាន​សិក្សា៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស