28 C
Phnom Penh

អ្នក​ឃ្លាំមើល​ថា​រដ្ឋាភិបាល​ក្រុង​ប៉េកាំង​អាច​នឹង​ត្រួតត្រា​សេដ្ឋកិច្ច​ខ្មែរ​ពេញ​ទំហឹង

ដោយ ឌឹ ខេមបូឌា ដេលី

បទវិភាគ

ក្រុម​អ្នក​ឃ្លាំមើល​និយាយ​ថា ដោយសារតែ​រដ្ឋាភិបាល​ក្រុង​ប៉េកាំង អាច​ត្រួតត្រា​សេដ្ឋកិច្ច​ខ្មែរ​ពេញ​ទំហឹង ហេតុ​ដូច្នេះ​ហើយ​បាន​ជា​រដ្ឋាភិបាល​ចិន អាច​បង្កើត​រដ្ឋ​មួយ​នៅ​កម្ពុជា​នៅ​ក្រុង​ព្រះសីហនុ ខេត្ត​ព្រះសីហនុ ដែល​ពួកគេ​នាំគ្នា​ហៅថា​តៃកាំង និង​អាច​ឱ្យ​ជនជាតិ​ចិន​ដែល​កំពុង​រស់នៅ​លើ​ទឹកដី​ខ្មែរ​សព្វថ្ងៃ​នេះ​កាន់តែ​មាន​សិទ្ធិ​អំណាច​រឹតតែ​ខ្លាំង​ឡើងៗ។

អ្នកវិភាគ​នយោបាយ និង​សង្គម បណ្ឌិត ឡៅ ម៉ុងហៃ បាន​សរសេរ​លើ​គណនី Facebook របស់​លោក​កាលពី​ថ្ងៃ​ទី​១៣ ខែ​កុម្ភៈ ថា អស់​រយៈពេល​ប្រមាណ​ជា ១០​ឆ្នាំ​កន្លងទៅ​នេះ ពាណិជ្ជករ​ចិន​បាន​ធ្វើ​ឲ្យ​ជីវភាព​ពលរដ្ឋ​ខ្មែរ​មួយ​ចំនួន​ធូរធារ ប៉ុន្តែ​អ្នកវិភាគ​រូប​នេះ​បាន​លើកឡើង​នូវ​ទស្សនៈ​មេដឹកនាំ​ជនជាតិ​ឥណ្ឌា លោក មហាត្មៈគន្ធី ថា «ភាព​មាន​បាន​ដោយ​មិន​ធ្វើ​ការងារ​ប្រកប​ដោយ​វិជ្ជាជីវៈ គឺជា​បាបកម្ម​របស់​សង្គម​ជាតិ​ដ៏​ធ្ងន់ធ្ងរ​មួយ​ក្នុង​ចំណោម​បាបកម្ម​ធំៗ​ទាំង​៧ របស់​ប្រទេស​ជាតិ​នោះ»។

បណ្ឌិត ឡៅ ម៉ុងហៃ លើកឡើង​ថា នៅ​ពេលនេះ ចិន​បាន​ប្រកាស​ជួយ​ការពារ​អធិបតេយ្យភាព និង​ឯករាជ្យ​ជាតិ​របស់​កម្ពុជា ប៉ុន្តែ​ការ​ចេញ​មុខ​ជួយ​របស់​មហាអំណាច​ចិន​បែប​នេះ ធ្វើ​ឱ្យ​លោក​ព្រួយបារម្ភ​ចំពោះ​អំណាច​ចិន​មក​លើ​កម្ពុជា​ទៅវិញ ព្រោះ​ថា​សិទ្ធិ​អំណាច​ជនជាតិ​ចិន​ដែល​ទៅ​រស់នៅ​លើ​ទឹកដី​កម្ពុជា​សព្វថ្ងៃ​នេះ គឺ​ដូចគ្នា​នឹង​សិទ្ធិ​អំណាច​របស់​បារាំង ដែល​បាន​ត្រួតត្រា​ខ្មែរ​កាល​ពី​សម័យ​ដើម​ដូច្នោះ​ដែរ។

ក្រុម​អ្នក​ឃ្លាំមើល​សង្គម​រិះគន់​ថា ការ​ឱន​ក្បាល​ពឹង​ជំនួយ​ចិន នឹង​នាំ​ឲ្យ​កម្ពុជា​ខាតបង់​ប្រយោជន៍​ដ៏​ធំធេង ដូចជា​ហិនហោច​ព្រៃឈើ ធនធាន​រ៉ែ ជាដើម។ ជាង​នេះ​ទៀត កម្ពុជា​នឹង​ក្លាយ​ជា​ទីផ្សារ​លាង​លុយ​កង្វក់​របស់​អ្នកជំនួញ​ទុច្ចរិត​ចិន​ថែមទៀត។ ករណី​នេះ មិន​ត្រឹមតែ​ខាត​ផលប្រយោជន៍​សេដ្ឋកិច្ច​កម្ពុជា​ដ៏​ធ្ងន់ធ្ងរ​ប៉ុណ្ណោះ​ទេ ប៉ុន្តែ​ថែមទាំង​បង្កើត​វិបត្តិ​សង្គម​ដល់​កម្ពុជា​ថែមទៀត។

ប្រភព​ដដែល​អះអាង​ថា កម្ពុជា​នៅ​ពេលនេះ​កំពុងតែ​មាន​សម្ព័ន្ធ​ស្មុគស្មាញ​ជាមួយ​មហាអំណាច​កុម្មុយនីស្ត​ចិន​យ៉ាង​ធ្ងន់ធ្ងរ​ទាំង​បំណុល សេដ្ឋកិច្ច និង​ឥទ្ធិពល​នយោបាយ ដែល​អាច​នឹង​ធ្លាក់​ខ្លួន​ជា​ប្រទេស​ដែល​អាច​ឱ្យ​ចិន​យក​ជា​ឈ្នាន់​បម្រើ​ប្រយោជន៍​របស់​គេ​គ្រប់​បែប​យ៉ាង ជាពិសេស​ដើម្បី​អុកឡុក​សន្តិសុខ​ក្នុង​តំបន់​ក្នុង​ការ​ពង្រីក​ឥទ្ធិពល​នយោបាយ​ក្នុង​តំបន់​អាស៊ាន​ថែមទៀត។

យ៉ាងណាក៏ដោយ កាលពី​ចុង​ឆ្នាំ​២០២១ លោក ហ៊ុន សែន អះអាង​ថា មហាអំណាច​ចិន​បាន​ជួយ​ឱ្យ​កម្ពុជា​មាន​ឯករាជ ទាំង​កិច្ចការ​នយោបាយ និង​សេដ្ឋកិច្ច​របស់​ខ្លួន បើ​មិន​បាន​ចិន កម្ពុជា​ក៏​មិន​រីកចម្រើន​ដូច​សព្វថ្ងៃ​នេះ​ដែរ។

ទាក់ទិន​នឹង​បញ្ហា​នេះ ក្រសួង​សេដ្ឋកិច្ច និង​ហិរញ្ញវត្ថុ​កម្ពុជា បាន​បង្ហាញ​របាយការណ៍​របស់​ខ្លួន​កាលពី​អំឡុង​ឆ្នាំ​២០២១ ថា កម្ពុជា​បាន​ជំពាក់​បំណុល​ចិន​កើន​ឡើង​ដល់ ៤៣,៧៨% ខណៈ​អ្នកវិភាគ​នយោបាយ​និង​សង្គម បណ្ឌិត ឡៅ ម៉ុងហៃ ធ្លាប់​បាន​អះអាង​មុន​របាយការណ៍​នេះ​ថា កម្ពុជា​បាន​ជំពាក់​លុយ​ចិន​ប្រមាណ ៥​ពាន់​លាន​ផោន ឬ​ស្មើ​នឹង​ជាង ៦​ពាន់​លាន​ដុល្លារ​អាមេរិក ដែល​ជា​បំណុល​ខ្ពស់​ជាងគេ​ក្នុង​ចំណោម​ប្រទេស​ចំនួន​៣០ ដែល​ជំពាក់​លុយ​ចិន។

ជាង​នេះ​ទៀត ត្រូវ​គេ​មើលឃើញ​ថា កម្ពុជា​គ្រាន់តែ​ជា​ទីផ្សារ​ទំនិញ​របស់​ចិន​ប៉ុណ្ណោះ ត្បិត​កម្ពុជា​បាន​នាំចេញ​ទំនិញ​ទៅកាន់​ប្រទេស​ចិន កាលពី​ឆ្នាំ​២០១៩ គិតជា​ទឹកប្រាក់​មាន​ចំនួន​ត្រឹមតែ ១​ពាន់​លាន​ដុល្លារ​ប៉ុណ្ណោះ ចំណែក​ចិន​នាំចូល​ទៅ​កម្ពុជា​វិញ​មាន​ទំហំ​ទឹកប្រាក់​ដល់​ទៅ​ជិត ៧​ពាន់​លាន​ដុល្លារ​អាមេរិក​ឯណោះ។

ទាក់ទិន​នឹង​បញ្ហា​នេះ វិទ្យាស្ថាន Kiel Institute ដែល​មាន​មូលដ្ឋាន​នៅ​ប្រទេស​អាល្លឺម៉ង់ កាលពី​ចុង​ឆ្នាំ​២០១៩ បាន​រក​ឃើញ​ថា កម្ពុជា​ស្ថិត​ក្នុង​ចំណោម​ប្រទេស​ដែល​មាន​អត្រា​ជំពាក់​បំណុល​ប្រទេស​ចិន​ច្រើន​លំដាប់​លេង​រៀង​ទី​៦ ក្នុង​ចំណោម​ប្រទេស​៥០ លើ​ពិភពលោក ដែល​ជំពាក់​បំណុល​មាន​ហានិភ័យ​ខ្ពស់​ជាងគេ​បំផុត៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស