31 C
Phnom Penh

អាមេរិក​ប្រកាស​កំណត់​ថ្ងៃ​បើក​កិច្ចប្រជុំ​កំពូល​អាមេរិក-អាស៊ាន​នៅ​ចុង​ខែ​មីនា​ខាងមុខ

ដោយ ឌឹ ខេមបូឌា ដេលី

បទវិភាគ

សហរដ្ឋ​អាមេរិក​ប្រកាស​កំណត់​ថ្ងៃ​បើក​កិច្ចប្រជុំ​កំពូល​អាមេរិក-អាស៊ាន នៅ​ថ្ងៃ​ទី​២៨-២៩ ខែ​មីនា ឆ្នាំ​២០២២ ខាងមុខ​នេះ ដើម្បី​បើក​កិច្ចប្រជុំ​កំពូល​អាមេរិក-អាស៊ាន​ក្នុង​ការ​ពង្រឹង​ទំនាក់ទំនង​អាមេរិក ជាមួយ​នឹង​អាស៊ាន​ឱ្យ​កាន់តែ​មាន​ប្រសិទ្ធភាព​បន្ថែម​ទៀត​ក្នុង​ការ​ដោះស្រាយ​បញ្ហា​ប្រឈម​នានា​ដែល​កំពុង​រាំងស្ទះ និង​ជា​ការ​រំឭក​ខួប ៤៥​ឆ្នាំ​នៃ​ទំនាក់ទំនង​អាមេរិក-អាស៊ាន​ផង​ដែរ។

អ្នក​នាំពាក្យ​សេតវិមាន អ្នកស្រី Jen Psaki បាន​ប្រាប់​អ្នក​សារព័ត៌មាន កាលពី​ថ្ងៃ​ទី​២៨ ខែ​កុម្ភៈ ឆ្នាំ​២០២២ នេះ​ថា កិច្ចប្រជុំ​កំពូល​នេះ​គឺ​ដើម្បី​ពង្រឹង​ទំនាក់ទំនង​អាមេរិក​ជាមួយ​នឹង​អាស៊ាន​ឱ្យ​កាន់តែ​មាន​ប្រសិទ្ធភាព​បន្ថែម​ទៀត ក្នុង​ការ​ដោះស្រាយ​បញ្ហា​ប្រឈម​នានា​ដែល​កំពុង​រាំង​ស្ទះ​នៅ​ពេលនេះ។

អ្នកស្រី​អះអាង​ថា សេតវិមាន​យល់​ថា​កិច្ចប្រជុំ​កំពូល​នេះ​នឹង​ពង្រឹង​ការចូលរួម​របស់​លោក​ប្រធានាធិបតី ចូ បៃដិន (Joe Biden) កាលពី​ខែ​តុលា ឆ្នាំ​២០២១ របស់​អាស៊ាន-អាមេរិក ដែល​ជា​គុណតម្លៃ និង​ចក្ខុវិស័យ​រួម​សម្រាប់​តំបន់​យ៉ាង​ធំធេង ក្នុង​នោះ​ក៏​បញ្ជាក់​ពី​ការ​ប្ដេជ្ញា​ចិត្ត​រួម​ក្នុង​ការ​ជំរុញ​ឥណ្ឌូ-ប៉ាស៊ីហ្វិក​ឱ្យ​មាន​លក្ខណៈ​សេរី និង​បើកចំហ សុវត្ថិភាព និង​ស៊ូ​ធន់​ផង​ដែរ។

ការ​ប្រកាស​បើក​កិច្ចប្រជុំ​កំពូល​អាមេរិក-អាស៊ាន​នេះ ធ្វើឡើង​បន្ទាប់ពី​ប្រធានាធិបតី​សហរដ្ឋ​អាមេរិក លោក ចូ បៃដិន បាន​ផ្ញើ​លិខិត​អញ្ជើញ​មេដឹកនាំ​កម្ពុជា លោក ហ៊ុន សែន ដែល​ជា​ប្រធាន​អាស៊ាន​ប្ដូរ​វេន​ឆ្នាំ​២០២២ ឱ្យ​ចូលរួម​កិច្ចប្រជុំ​កំពូល​អាស៊ាន-អាមេរិក កាលពី​ថ្ងៃ​ទី​១៤ ខែ​មករា ឆ្នាំ​២០២២ កន្លងទៅ។

អ្នកវិភាគ​នយោបាយ សង្គម និង​ជា​អនុប្រធាន​ក្រុមប្រឹក្សាភិបាល​នៃ​ចលនា​ពលរដ្ឋ​ដើម្បី​លទ្ធិប្រជាធិបតេយ្យ លោក គឹម សុខ បាន​ប្រាប់​សារព័ត៌មាន The Cambodia Daily នៅ​ថ្ងៃ​ទី​១ មីនា នេះ​ថា ក្រោយ​ពី​រុស្ស៊ី​ឈ្លានពាន​អ៊ុយក្រែន សហរដ្ឋ​អាមេរិក​កាន់តែ​មាន​ហេតុផល​បង្កើន​ការ​យកចិត្ត​ទុកដាក់​លើ​ភាព​ជា​ដៃគូ​ជាមួយ​អាស៊ាន​កាន់តែ​ខ្លាំង ពីព្រោះ​សហរដ្ឋ​អាមេរិក​ចង់​ពង្រឹង​កិច្ចសហប្រតិបត្តិការ​នៅ​ក្នុង​តំបន់​ឥណ្ឌូ-ប៉ាស៊ីហ្វិក ដែល​មាន​អាស៊ាន​ជា​ស្នូល ឬ​ជា​បេះដូង​នៃ​តំបន់​ភូមិសាស្ត្រ​នេះ។

អ្នកវិភាគ​រូប​នេះ​អះអាង​ថា កិច្ចប្រជុំ​សហរដ្ឋ​អាមេរិក-អាស៊ាន នឹង​ក្លាយ​ទៅជា​ប្រធានបទ​មួយ​ដែល​រំលេច​នូវ​វិញ្ញាសា​ពីរ គឺ៖

  • ទី​១ អាមេរិក​ចង់​ប្រាប់​ថា ខ្លួន​មាន​សម្ពន្ធមិត្ត​យុទ្ធសាស្ត្រ​គ្រប់​តំបន់​ភូមិសាស្ត្រ​នៅ​គ្រប់​កាលៈទេសៈ និង​ដាស់តឿន​គូប្រជែង​កុំ​ឲ្យ​ចេះ​តែ​ប្រថុយ​ប្រឆាំង​នឹង​ប្រយោជន៍​អាមេរិក និង​សម្ពន្ធមិត្ត​របស់​ខ្លួន។
  • ទី​២ ក៏​ជា​ការ​ព្រមាន​ចំៗ​ទៅ​កុម្មុយនីស្ត​ចិន ឲ្យ​ពិចារណា​ដកថយ​ពី​សមុទ្រ​ចិន​ខាងត្បូង និង​កោះ​តៃវ៉ាន់​ផង​ដែរ។

លោក គឹម សុខ បញ្ជាក់​ថា ករណី​ដែល​សហរដ្ឋ​អាមេរិក​អាច​ដក​ខ្លួន​មក​រៀបចំ​កិច្ចប្រជុំ​ចំ​ពេល​ប្រទេស​រុស្ស៊ី ឈ្លានពាន​ចូល​អ៊ុយក្រែន​នេះ អាច​ដោយសារតែ​សង្គ្រាម​នៅ​អ៊ុយក្រែន​មាន​សម្ពន្ធមិត្ត​អឺរ៉ុប​ដ៏​ខ្លាំង​មួយ​ជួយ​ទប់ទល់​ទៅ​ហើយ។ ម្យ៉ាង​ទៀត ក៏​ទំនង​ជា​អាមេរិក​សម្លឹង​ឃើញ​ប្រទេស​រុស្ស៊ី ហាក់ដូចជា​ជាប់​ផុង​ពិបាក​ទទួល​ជោគជ័យ​លើ​អ៊ុយក្រែន​ទៅ​ហើយ​នោះ។

អ្នកជំនាញ​កិច្ចការ​អន្តរជាតិ និង​ជា​ព្រឹទ្ធបុរស​រង​នៃ​សាកលវិទ្យាល័យ​រដ្ឋ​អារីហ្សូណា បណ្ឌិត អៀ សុផល ធ្លាប់​ប្រាប់​សារព័ត៌មាន ឌឹ ខេមបូឌា ដេលី ថា លោក ហ៊ុន សែន ពាក់​មួក​ដែល​មាន​ស្លាក​សញ្ញា​របស់​ប្រទេស​ចិន​នៅ​ពី​លើ​ក្បាល ដូច្នេះ​អាមេរិក​គួរ​ណែនាំ​ប្រទេស​កម្ពុជា​ឱ្យ​ឯករាជ្យ​ពី​ប្រទេស​ចិន។

ក្រុម​អ្នក​ឃ្លាំមើល​សង្គម លើកឡើង​ថា ការ​ទៅ​ចូលរួម​កិច្ចប្រជុំ​កំពូល​អាស៊ាន-អាមេរិក​នៅ​ពេល​ខាងមុខ​នេះ លោក ហ៊ុន សែន នឹង​ត្រូវ​ប្ដេជ្ញា​ជាមួយ​ប្រធានាធិបតី​អាមេរិក លោក ចូ បៃដិន ដោយ​ចៀស​មិន​ផុត​នោះ​ទេ​ថា ខ្លួន​ត្រូវតែ​រក្សា​អព្យាក្រឹត្យ​ក្នុង​ការ​គោរព​អធិបតេយ្យភាព​ជាតិ​ខ្លួនឯង និង​ត្រូវ​គោរព​លក្ខខណ្ឌ​របស់​អន្តរជាតិ​ឱ្យ​បាន​ត្រឹមត្រូវ ឬ​ក៏​បន្ត​ផ្ញើ​វាសនា​កម្ពុជា​លើ​កុម្មុយនីស្ត​ចិន ដូច​ដែល​ខ្លួន​ធ្លាប់​អះអាង​កន្លងមក​បន្ត​ទៀត៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស