29 C
Phnom Penh

សង្គម​ស៊ីវិល​ស្នើ​ដោះលែង​អ្នកទោស​មនសិការ​ដើម្បី​លើក​កម្ពស់​សិទ្ធិមនុស្ស​និង​បន្ថយ​ភាព​តានតឹង​នយោបាយ

ដោយ ឌឹ ខេមបូឌា ដេលី

បទវិភាគ

ក្រុម​អង្គការ​សង្គម​ស៊ីវិល​ស្នើ​ទៅ​តុលាការ និង​រដ្ឋាភិបាល ដោះលែង​អ្នកទោស​មនសិការ​ទាំងអស់ ដើម្បី​លើក​កម្ពស់​សិទ្ធិ​ជា​មូលដ្ឋាន​ដែល​មាន​ចែង​ក្នុង​រដ្ឋធម្មនុញ្ញ​កម្ពុជា និង​បន្ថយ​ភាព​តានតឹង​នយោបាយ។

ការ​ស្នើ​នេះ ធ្វើឡើង​តាមរយៈ​សេចក្ដី​ថ្លែងការណ៍​រួមគ្នា​មួយ​ដែល​មាន​អង្គការ​សង្គម​ស៊ីវិល​ចំនួន ២០​ស្ថាប័ន​ចូលរួម ក្នុង​នោះ​រួម​មាន​មជ្ឈមណ្ឌល​សិទ្ធិមនុស្ស​កម្ពុជា (CCHR) មជ្ឈមណ្ឌល​សម្ព័ន្ធភាព​ការងារ និង​សិទ្ធិមនុស្ស (សង់ត្រាល់) សមាគម​ការពារ​សិទ្ធិមនុស្ស​អាដហុក (ADHOC) សហជីព​ទ្រទ្រង់​ការងារ​បុគ្គលិក​ខ្មែរ​នៃ​ក្រុមហ៊ុន​ណាហ្គា​វើលដ៍ (NAGA World) មជ្ឈមណ្ឌល​ប្រជាពលរដ្ឋ​ដើម្បី​អភិវឌ្ឍន៍ និង​សន្តិភាព ជាដើម។

អង្គការ​សង្គម​ស៊ីវិល​បាន​លើកឡើង​ក្នុង​សេចក្ដី​ថ្លែងការណ៍​ថា អ្នកទោស​មនសិការ​ត្រូវ​បាន​ចាប់​ដាក់​គុក​ដោយសារតែ​ការ​បញ្ចេញមតិ​ដោយ​សន្តិវិធី ទាក់ទង​នឹង​បញ្ហា​នយោបាយ សង្គម ជំនឿ​សាសនា ឬ​ជំនឿ​ផ្សេងៗ​ទៀត។ មួយ​វិញ​ទៀត អ្នកទោស​មនសិការ​ស្ទើរតែ​ទាំងអស់​បាន​ជាប់​ពន្ធនាគារ​ក្នុង​ប្រទេស​កម្ពុជា ប្រឈមមុខ​នឹង​បទ​ចោទប្រកាន់ និង​ដាក់​ទោស​ពី​បទ «ញុះញង់» ដូចៗ​គ្នា។

ប្រភព​ដដែល​អះអាង​ថា នៅ​សង្គម​សម័យ​ទំនើប ប្រទេស​កាន់​លទ្ធិប្រជាធិបតេយ្យ​ដែល​មាន​មេដឹកនាំ​បែប​នីតិរដ្ឋ ត្រូវ​ទទួលស្គាល់​ថា ឧក្រិដ្ឋកម្ម​ទាំងឡាយ​ដែល​អ្នកទោស​មនសិការ​ត្រូវ​បាន​ចោទប្រកាន់ ឬ​ត្រូវ​បាន​ផ្ដន្ទាទោស​ពី​បទ​ណា​មួយ​នោះ មិន​គួរ​ត្រូវ​បាន​ចាត់ទុក​ជា​ឧក្រិដ្ឋកម្ម​ឡើយ។ ផ្ទុយទៅវិញ បុគ្គល​អហិង្សា​ទាំងនេះ​គួរ​ត្រូវ​បាន​ចាត់ទុក​ជា​ពលរដ្ឋ​សកម្ម​ដែល​រួមចំណែក​ដល់​ការ​ធ្វើ​ឱ្យ​សង្គម​របស់​ពួកគេ​កាន់តែ​មាន​ភាព​ប្រសើរ​ឡើង។

សេចក្ដី​ថ្លែងការណ៍​ដដែល​អះអាង​ថា អ្នកទោស​មនសិការ​ទាំងអស់​បាន​ឆ្លង​កូវីដ-១៩ នៅ​ក្នុង​ពន្ធនាគារ ដែល​ករណី​នេះ​បាន​ជះ​ឥទ្ធិពល​ជា​អវិជ្ជមាន​ទាំង​សុខភាព​ផ្លូវចិត្ត និង​ផ្លូវ​កាយ ខណៈ​ដែល​ពួកគាត់​បាន​បាត់បង់​សិទ្ធិ​សេរីភាព​ជា​មូលដ្ឋាន ហើយ​ប្រឈម​នឹង​វិធានការ​តឹងរ៉ឹង​នៃ​ជំងឺ​កូវីដ-១៩ ធ្វើ​ឱ្យ​ពួកគេ​លំបាក​ក្នុង​ការ​អនុវត្ត​គោលការណ៍​ណែនាំ​របស់​ក្រសួង​សុខាភិបាល ដូចជា​ថែរក្សា​អនាម័យ និង​រក្សា​គម្លាត​សុវត្ថិភាព ដោយសារ​នៅ​ក្នុង​ពន្ធនាគារ​មាន​អ្នកទោស​ចង្អៀត​ណែន។

ករណី​នេះ អង្គការ​សង្គម​ស៊ីវិល​ទាំង ២០​ស្ថាប័ន ស្នើ​ទៅ​តុលាការ និង​រដ្ឋាភិបាល​ឱ្យ​ពិចារណា​ដោះលែង​អ្នកទោស​មនសិការ​ទាំងអស់​ឱ្យ​មាន​សេរីភាព​វិញ ដើម្បី​លើក​កម្ពស់​សិទ្ធិ​ជា​មូលដ្ឋាន​ដែល​មាន​ចែង​ក្នុង​រដ្ឋធម្មនុញ្ញ។

កាលពី​ថ្ងៃ​ទី​៧ ខែ​មីនា ឆ្នាំ​២០២២ អង្គការ​ឃ្លាំមើល​សិទ្ធិមនុស្ស​អន្តរជាតិ (Human Rights Watch) អំពាវនាវ​ឱ្យ​រដ្ឋាភិបាល និង​ប្រទេស​ម្ចាស់​ជំនួយ​ដាក់​សម្ពាធ​លើ​រដ្ឋាភិបាល​កម្ពុជា​ឱ្យ​ទម្លាក់​ចោល​ការ​ចោទប្រកាន់ និង​ដោះលែង​អ្នកទោស​នយោបាយ​កម្ពុជា​ដោយ​ឥត​លក្ខខណ្ឌ។ ក្រុម​នេះ​និយាយ​ថា ការ​ធ្លាក់ចុះ​យ៉ាង​គំហុក​នៃ​ការគោរព​សិទ្ធិមនុស្ស​នៅ​កម្ពុជា ក្នុង​រយៈពេល​ប៉ុន្មាន​ឆ្នាំ​ចុងក្រោយ​នេះ នៅតែ​បន្ត​កើតមាន​ជាមួយ​នឹង​រលក​នៃ​ការ​ចាប់​ខ្លួន និង​ការ​ឃុំ​ខ្លួន​នៅ​ក្រោម​ហេតុផល​នយោបាយ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស