29 C
Phnom Penh

ក្រសួង​លុប​អាជ្ញាប័ណ្ណ​អង្គភាព​សារព័ត៌មាន​៣ បន្ទាប់ពី​រាយការណ៍​អំពើ​ពុករលួយ​របស់​ក្រុមហ៊ុន​ពីរ

ដោយ ឌឹ ខេមបូឌា ដេលី

បទវិភាគ

ក្រសួង​ព័ត៌មាន សម្រេច​មិន​បន្ត​អាជ្ញាប័ណ្ណ​អាជីវកម្ម​ឱ្យ​អង្គភាព​សារព័ត៌មាន​ចំនួន​៣ ដោយ​ថា​អង្គភាព​នៃ​សារព័ត៌មាន​នោះ​បាន​បំពាន​លើ​ក្រម​សីលធម៌​វិជ្ជាជីវៈ​សារព័ត៌មាន និង​កិច្ចសន្យា​ដែល​តម្កល់​ទុក​នៅ​ក្រសួង បន្ទាប់ពី​ស្ថាប័ន​ទាំងនោះ​បាន​ធ្វើ​សេចក្តី​រាយការណ៍​អំពី​សកម្មភាព​ពុករលួយ​របស់​ក្រុមហ៊ុន​ពីរ​នៅ​ក្រសួង​ការងារ។

អង្គភាព​សារព័ត៌មាន​ដែល​ត្រូវ​បាន​ក្រសួង​លុបចោល​នោះ រួម​មាន អង្គភាព​សារព័ត៌មាន Bayongtimes (www.bayongtimes.com) អង្គភាព​សារព័ត៌មាន KCTV (www.khmercovertv.com) និង​អង្គភាព​សារព័ត៌មាន​កម្ពុជា​រាល់ថ្ងៃ (www.cambodiatoday.news)។

ក្នុង​លិខិត​របស់​ក្រសួង​ព័ត៌មាន ចុះ​ថ្ងៃ​ទី​១៥ ខែ​មីនា ឱ្យ​ដឹង​ថា មូលហេតុ​ដែល​ក្រសួង​មិន​បន្ត​អាជ្ញាប័ណ្ណ​ឱ្យ​ក្រោយ​ពី​គណៈកម្មាធិការ​នីតិកម្ម​នៃ​ក្រសួង​ព័ត៌មាន បាន​រក​ឃើញ​ថា អង្គភាព​សារព័ត៌មាន​ទាំង​៣ នោះ បាន​ធ្វើការ​ផ្សព្វផ្សាយ​ព័ត៌មាន​បំពាន​លើ​ក្រម​សីលធម៌​វិជ្ជាជីវៈ​សារព័ត៌មាន និង​កិច្ចសន្យា​អាជីវកម្ម​ដែល​សាមី​ខ្លួន​បាន​តម្កល់​ទុក​នៅ​ក្រសួង។ ជាមួយ​គ្នា​នេះ ក្រសួង​ព័ត៌មាន​ប្រាប់​ទៅ​ប្រធាន​មន្ទីរ​ព័ត៌មាន​ទាំង ២៥​រាជធានី-ខេត្ត កុំ​ឱ្យ​បន្ត​អាជ្ញាប័ណ្ណ​ដល់​អង្គភាព​សារព័ត៌មាន​ទាំង​៣ នោះ​ទៀត។

ចាងហ្វាង​សារព័ត៌មាន​កម្ពុជា​រាល់ថ្ងៃ លោក ទូច យុទ្ធា ប្រាប់​សារព័ត៌មាន The Cambodia Daily នៅ​ថ្ងៃ​ទី​១៦ មីនា ថា មូលហេតុ​ដែល​ក្រសួង​មិន​បន្ត​អាជ្ញាប័ណ្ណ​ឱ្យ​អង្គភាព​សារព័ត៌មាន​របស់​លោក ដោយសារតែ​កាលពី​ដើម​ខែ​កុម្ភៈ លោក​បាន​ផ្សព្វផ្សាយ​អត្ថបទ​មួយ​ពាក់ព័ន្ធ​នឹង​មន្ត្រី​រាជការ​សំណូមពរ​ទៅ​លោក ហ៊ុន សែន និង​ប្រធាន​អង្គភាព​ប្រឆាំង​អំពើពុករលួយ ស៊ើប​អង្កេត​ក្រុមហ៊ុន​ពីរ​នៅ​ក្រសួង​ការងារ ដែល​បាន​កិបកេង​លុយ​រដ្ឋ​រាប់​លាន​ដុល្លារ​ក្នុង​មួយ​ឆ្នាំៗ​ពី​គម្រោង​ដេញថ្លៃ​សម្ភារ​សម្រាប់​យក​ទៅ​ផ្គត់ផ្គង់​នៅ​ក្រសួង​ការងារ នា​ពេល​កន្លងមក។

លោក​បន្ថែម​ទៀត​ថា ក្រុមហ៊ុន​នោះ​បាន​ទាក់ទង​មក​ស្ថាប័ន​របស់​លោក​ឲ្យ​ដក​រឿង​នោះ​ចេញ ប៉ុន្តែ​ពួក​លោក​ពុំ​ព្រម​ដក​ចេញ ដោយសារ​ប្រកាន់​នូវ​វិជ្ជាជីវៈ។ លោក​ថា ក្រុមហ៊ុន​អាច​ទាមទារ​ឲ្យ​ស្ថាប័ន​លោក​កែតម្រូវ ប្រសិនបើ​រក​ឃើញ​ថា​ពួក​លោក​បាន​ធ្វើ​ខុស។ លោក​យល់​ថា ការ​សម្រេច​របស់​ក្រសួង​ជា​ការ​បិទ​សិទ្ធិ​សេរីភាព និង​ជា​ការ​បំភិតបំភ័យ​ទៅលើ​អ្នក​សារព័ត៌មាន ខណៈ​ការ​ផ្សព្វផ្សាយ​ព័ត៌មាន​របស់​អង្គភាព​លោក​នា​ពេល​កន្លងមក ធ្វើ​ទៅ​តាម​វិជ្ជាជីវៈ និង​មាន​ក្រម​សីលធម៌។

លោក​បន្ត​ថា តាមពិត ក្រសួង​គួរតែ​ធ្វើ​ការ​ស៊ើប​អង្កេត​ទៅលើ​អត្ថបទ​ដែល​បាន​ចុះផ្សាយ​នោះ មុន​នឹង​ធ្វើការ​សម្រេច​ចិត្ត​បិទ​អង្គភាព​របស់​លោក។ ទោះជាយ៉ាងណា លោក​នៅតែ​បន្ត​ធ្វើ​ការងារ និង​ស្វែងរក​ការ​សម្របសម្រួល​ណាមួយ​ពី​ក្រសួង​ព័ត៌មាន។

យោង​ទៅ​តាម​សន្ទស្សន៍​នៃ​ការ​យល់ឃើញ​ពី​អំពើពុករលួយ​ឆ្នាំ​២០២០ ចេញផ្សាយ​ដោយ​អង្គការ​តម្លាភាព​អន្តរជាតិ (Transparency International) រក​ឃើញ​ថា ក្នុង​ចំណោម ១៨០​ប្រទេស​នៅ​ទូទាំង​ពិភពលោក កម្ពុជា​គឺជា​ប្រទេស​មួយ​ក្នុង​ចំណោម ២០​ប្រទេស​ដែល​ប្រព្រឹត្ត​អំពើពុករលួយ​ខ្លាំង​ជាងគេ​បំផុត។ នៅ​ក្នុង​តំបន់​អាស៊ាន កម្ពុជា​គឺជា​ប្រទេស​ដែល​ប្រព្រឹត្ត​អំពើពុករលួយ​ខ្លាំង​ជាងគេ ពោល​គឺ​អន់​ជាង​ប្រទេស​មីយ៉ាន់ម៉ា (Myanmar) ឬ​ភូមា វៀតណាម (Vietnam) និង​ឡាវ (Laos)។

អង្គការ​អ្នកកាសែត​គ្មាន​ព្រំដែន កាលពី​ពេល​ថ្មីៗ​នេះ បាន​បន្ត​ផ្ដល់​ចំណាត់ថ្នាក់​សេរីភាព​សារព័ត៌មាន​នៅ​កម្ពុជា ឆ្នាំ​២០២១ ស្ថិតនៅ​ក្នុង​រូបភាព​អាក្រក់​ដដែល ដោយ​នៅ​លេខ​រៀង​ទី​១៤៤ ក្នុង​ចំណោម ១៨០​ប្រទេស​នៅ​លើ​ពិភពលោក។ សេរីភាព​សារព័ត៌មាន​ដែល​អង្គការ​នេះ​វាយតម្លៃ បង្ហាញ​ថា កម្ពុជា​បាន​ធ្លាក់​ចុះ ៣​ឆ្នាំ​ជាប់ៗ​គ្នា​ចាប់តាំង​ពី​ឆ្នាំ​២០១៧ មក៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស