ស្ត្រីជនជាតិថៃម្នាក់ដែលអះអាងថាខ្លួនប្រឈមគ្រោះថ្នាក់នៃការជួញដូរសរីរាង្គនៅកម្ពុជា បានសារភាពដល់សមត្ថកិច្ចថា ករណីនេះគឺនាងប្រឌិតឡើងដោយសារតែនាងបានចូលមកកម្ពុជាខុសច្បាប់ ហើយបារម្ភខ្លាចមិនអាចវិលត្រឡប់ទៅប្រទេសកំណើតវិញបាន។
សារព័ត៌មានពីររបស់ថៃ គឺ Thai Examiner និង Thai PBS World បានស្រង់សម្ដីរបស់នគរបាលកម្ពុជា និងនគរបាលថៃ នៅក្នុងសន្និសីទកាសែតមួយកាលពីថ្ងៃទី១៨ ខែមីនា ឆ្នាំ២០២២ ក្នុងប្រទេសថៃ ថាស្ត្រីថៃរូបនោះបានចូលកម្ពុជាដោយខុសច្បាប់ ដូច្នេះនាងបារម្ភខ្លាចសមត្ថកិច្ចកម្ពុជាមានចំណាត់ការផ្លូវច្បាប់លើនាង ដែលធ្វើឲ្យនាងមិនអាចវិលត្រឡប់ទៅប្រទេសកំណើតវិញបានឆាប់។
បើតាមសារព័ត៌មានថៃទាំងពីរនេះ មូលហេតុដែលនាងប្រឌិតរឿងឡើង ដើម្បីនាងអាចរួចផុតពីចំណាត់ការផ្លូវច្បាប់ពីសមត្ថកិច្ចកម្ពុជា ហើយអាចទៅកាន់ប្រទេសថៃវិញបានលឿន។ នាងត្រូវកាត់ទោសឲ្យជាប់ពន្ធនាគារ ៦ខែ។
ករណីស្ត្រីថៃខាងលើបានផ្ទុះឡើងតាមរយៈការផ្សាយរបស់សារព័ត៌មាន Thai Examiner នៅថ្ងៃទី១២ ខែមីនា ឆ្នាំ២០២២។ ពេលទៅដល់ប្រទេសថៃវិញ នាងបានប្រាប់សមត្ថកិច្ចថា នាងត្រូវបានគេលួងលោមឲ្យទៅធ្វើការនៅក្រុមហ៊ុនចិន ក្នុងខេត្តព្រះសីហនុ ប្រទេសកម្ពុជា។ នាងបន្ថែមទៀតថា ក្រោយមក នាងក៏ត្រូវក្រុមជនសង្គមងងឹតជនជាតិចិន ប្រើឧបករណ៍ឆក់ឲ្យសន្លប់ និងបានបូមឈាមនាងដើម្បីត្រៀមវះកាត់យកសរីរាង្គរបស់នាង។ តែប្រតិបត្តិការវះកាត់យកសរីរាង្គរបស់នាង ត្រូវបានបរាជ័យដោយសារសមត្ថកិច្ចកម្ពុជាចុះទៅដល់កន្លែងនោះ។
លោក ជួន ណារិន្ទ ស្នងការនគរបាលខេត្តព្រះសីហនុ ថ្លែងប្រាប់សារព័ត៌មានក្នុងស្រុកថា លោកមានការសោកស្តាយ និងពិបាកនឹងទទួលយកចំពោះការប្រឌិតរឿងអកុសលបែបនេះ បើទោះជាស្ត្រីថៃរូបនោះបានសារភាពពីការពិតហើយក៏ដោយ។ លោកថា រឿងនេះប៉ះពាល់ធ្ងន់ធ្ងរដល់កិត្តិយស សេចក្តីថ្លៃថ្នូរ និងសីលធម៌សង្គមកម្ពុជា។
ករណីរបស់ស្ត្រីជនជាតិថៃ វ័យ ២៥ឆ្នាំខាងលើ គឺស្រដៀងនឹងករណីបុរសចិន វ័យ ៣១ឆ្នាំកាលពីអំឡុងខែកុម្ភៈ ឆ្នាំ២០២២ បានអះអាងថា គាត់ត្រូវគេចាប់បូមឈាមស្ទើរអស់ពីខ្លួនក្នុងខេត្តព្រះសីហនុ។ ក្រោយមក គាត់សារភាពប្រាប់សមត្ថកិច្ចកម្ពុជាថា គាត់បានប្រឌិតរឿងនេះឡើង។
ថ្លែងក្នុងពិធីសម្ពោធដាក់ឲ្យប្រើប្រាស់ជាផ្លូវការនូវមន្ទីរពេទ្យមិត្តភាពកម្ពុជា-ចិន ព្រះកុសុមៈ (ពេទ្យលោកសង្ឃ) នាព្រឹកថ្ងៃទី២១ មីនា លោក ហ៊ុន សែន បានប្រាប់ឱ្យក្រសួងសុខាភិបាល ពិនិត្យលទ្ធភាពវះកាត់ប្តូរក្រលៀនឱ្យអ្នកជំងឺនៅក្នុងប្រទេសកម្ពុជាឱ្យទៅជាភាពស្របច្បាប់។
លោក ហ៊ុន សែន បញ្ជាក់ថា ក្រុមគ្រូពេទ្យនៅកម្ពុជាក៏មានសមត្ថភាពវះកាត់ប្ដូរក្រលៀន និងសរីរាង្គខាងក្នុងអ្នកជំងឺបានយ៉ាងល្អ ដោយមិនចាញ់ប្រទេសដទៃឡើយ ប៉ុន្តែអ្វីដែលគួរឱ្យបារម្ភនោះ គឺផ្លាស់ប្ដូរក្រលៀន និងសរីរាង្គនេះវាអាចក្លាយជាជំនួញរបស់ជនខិលខូច៕