មន្ត្រីជាន់ខ្ពស់នៃក្រសួងសាធារណការ និងដឹកជញ្ជូន កំពុងរង់ចាំប្រាក់កម្ចីសម្បទានពីភាគីចិន ដើម្បីជួសជុលកំណាត់ផ្លូវមួយខ្សែពីខេត្តកំពត ទៅវាលរេញនៃខេត្តព្រះសីហនុ ដែលមានប្រវែង ២០គីឡូម៉ែត្រ ដែលត្រូវចំណាយថវិកាប្រមាណពី ៦០ ទៅ ៧០លានដុល្លារអាមេរិក ដើម្បីឱ្យមានភាពប្រសើរជាងមុន។
រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល បានលើកឡើងលើទំព័រហ្វេសប៊ុកនៃក្រសួងរបស់លោកកាលពីថ្ងៃទី២៩ ខែមីនា ឆ្នាំ២០២២ ថា ក្នុងផ្លូវប្រវែង ២០គីឡូម៉ែត្រនេះមានដីប្រវែង ៥គីឡូម៉ែត្រជាប្រភេទដីស្អុយចុះទៅផ្នែកខាងក្រោមប្រវែង ១៨ម៉ែត្រ។ ដូច្នេះ ដើម្បីស្ថាបនាផ្លូវនេះឱ្យមានគុណភាពត្រឹមត្រូវតាមបច្ចេកទេស គឺត្រូវប្រើសសរគ្រឹះប្រវែង ១៨ម៉ែត្រដាក់តម្រៀបគ្នាលើផ្លូវ ៥គីឡូម៉ែត្រនេះ។ ចំណែកកំណាត់ផ្លូវ ១៥គីឡូម៉ែត្រទៀត ត្រូវពង្រឹងគ្រឹះ រួចចាក់បេតុងពីលើបន្ថែមទៀត ទើបអាចធានាគុណភាពមិនបាក់ស្រុតទៅថ្ងៃក្រោយ។
រដ្ឋមន្ត្រីក្រសួងសាធារណការ និងដឹកជញ្ជូនរូបនេះអះអាងថា ធនាគារពិភពលោកកន្លងមកធ្លាប់បានផ្តល់ប្រាក់កម្ចីដល់កម្ពុជាដើម្បីស្ថាបនា និងថែទាំផ្លូវដែលមានប្រវែង ៥៤គីឡូម៉ែត្រនេះម្តងរួចមកហើយក្នុងទំហំទឹកប្រាក់ប្រមាណជា ១៤លានដុល្លារអាមេរិក ប៉ុន្តែទំហំទឹកប្រាក់នេះមិនអាចកសាង និងថែទាំផ្លូវថ្នល់នេះឱ្យបានជាប់រឹងមាំតាមស្តង់ដារបច្ចេកទេសបានទេ។
លោក ស៊ុន ចាន់ថុល បញ្ជាក់ថា នៅពេលដែលក្រសួងសាធារណការ និងដឹកជញ្ជូនទទួលបានថវិកាពីធនាគារពិភពលោកសម្រាប់ស្ថាបនាផ្លូវនេះ ខ្លួនមិនបានសិក្សាឱ្យបានច្បាស់លាស់លើគុណភាពដីនៅតំបន់នេះទេ ដូច្នេះហើយបានជាផ្លូវនេះក្រោយសាងសង់រួចចេះតែរងការខូចខាតបន្ទាប់ពីប្រើប្រាស់បានមួយរយៈ ប៉ុន្តែម្តងនេះ ក្រសួងបានសិក្សារួចរាល់អស់ហើយ។
ការអះអាងនេះ ធ្វើឡើងបន្ទាប់ពីផ្លូវជាតិលេខ៣ ពីឃុំវាលរេញ ខេត្តព្រះសីហនុ ឆ្ពោះទៅកាន់ទីរួមខេត្តកំពត បានរងការខូចខាតដដែលៗដោយសារក្រសួងសាធារណការមិនបានសិក្សាឱ្យបានហ្មត់ចត់។
ផ្លូវជាតិលេខ៣ ពីឃុំវាលរេញ ស្រុកព្រៃនប់ ខេត្តព្រះសីហនុ ឆ្ពោះទៅកាន់ទីរួមខេត្តកំពត មានប្រវែងសរុប ៥៤,៣គីឡូម៉ែត្រ ក្នុងនោះប្រវែងផ្លូវ ២០គីឡូម៉ែត្រតែងតែរងការខូចខាតជាប្រចាំ បើទោះបីជាផ្លូវនេះធ្លាប់បានទទួលការសាងសង់ចំនួន ៤លើករួចមកហើយក៏ដោយ។
ក្នុងដំណើរទស្សនកិច្ចនៅកម្ពុជារបស់លោក វ៉ាង យី ទីប្រឹក្សារដ្ឋ និងជារដ្ឋមន្ត្រីការបរទេសនៃសាធារណរដ្ឋប្រជាមានិតចិន កាលពីខែកញ្ញា ឆ្នាំ២០២១ បញ្ជាក់ថា ចិននឹងបញ្ជូនអ្នកបច្ចេកទេសជំនាញមកសិក្សាផ្លូវជាតិលេខ៣ កំពត-វាលរេញ ដែលមានការខូចខាតខ្លាំងប្រវែង ២០គីឡូម៉ែត្រដែលជាតំបន់ដីស្អុយពិបាកក្នុងការសាងសង់។
ក្រុមអ្នកសង្កេតការណ៍ត្អូញត្អែរថា ការប្រកាសចំណាយថវិកាច្រើនសន្ធឹកសន្ធាប់ដើម្បីស្ថាបនាផ្លូវដែលមានប្រវែងត្រឹមតែ ២០គីឡូម៉ែត្របែបនេះ ហាក់មិនសមទំនងទាល់តែសោះ ព្រោះថាបើទោះបីជាត្រូវអភិវឌ្ឍផ្លូវថ្នល់ក្នុងកម្រិតស្តង់ដារកម្រិតខ្ពស់បំផុតនោះ ក៏មិនត្រូវចំណាយថវិកាដល់ទៅ ៦០ ឬ ៧០លានដុល្លារអាមេរិកក្នុងប្រវែងផ្លូវ ២០គីឡូម៉ែត្រដូច្នេះដែរ។ ដូច្នេះ ទំហំទឹកប្រាក់ដ៏ច្រើនសន្ធឹកសន្ធាប់អាចមានការសង្ស័យអំពីការពាក់ព័ន្ធនឹងអំពើពុករលួយជាប្រព័ន្ធ។
យ៉ាងណាក៏ដោយ ជុំវិញការស្ថាបនាផ្លូវជាតិដែលរងការខូចខាតប្រវែង ២០គីឡូម៉ែត្រនេះ រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល បានបញ្ជាក់ហើយកាលពីថ្ងៃអង្គារ ដើមសប្តាហ៍នេះថា ប្រមុខរដ្ឋាភិបាលកម្ពុជា លោក ហ៊ុន សែន និងរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន បានដាក់លិខិតស្នើសុំកម្ចីថវិកាពីមិត្តចិនជាផ្លូវការរួចហើយ ដើម្បីយកមកស្ថាបនាផ្លូវនេះឱ្យត្រឹមត្រូវតាមស្តង់ដារបច្ចេកទេសឡើងវិញ៕