28 C
Phnom Penh

អ្នក​តស៊ូ​មតិ៖ គ.ជ.ប ជា​វាំងនន​ខ្មៅ​បិទ​បាំង​ទង្វើ​បំពាន​ច្បាប់​របស់​បក្ស​កាន់​អំណាច

ដោយ ឌឹ ខេមបូឌា ដេលី

បទវិភាគ

អ្នកវិភាគ​នយោបាយ និង​សង្គម លើកឡើង​ថា ដំណើរការ​នៃ​ការ​រៀបចំ​ការ​បោះឆ្នោត​នៅ​ដើម​ខែ​មិថុនា ឆ្នាំ​២០២២ ខាងមុខ​នេះ គឺជា​ការ​រៀបចំ​ឡើង​ដោយ​គណបក្ស​កាន់​អំណាច​ដែល​យក​គណៈកម្មាធិការ​ជាតិ​រៀបចំ​ការ​បោះឆ្នោត​ជា​វាំងនន​ខ្មៅ ដើម្បី​បិទ​បាំង​ទង្វើ​បំពាន​ច្បាប់​របស់​គណបក្ស​កាន់​អំណាច​តែប៉ុណ្ណោះ។

អ្នកវិភាគ​នយោបាយ សង្គម និង​ជា​អនុប្រធាន​ក្រុមប្រឹក្សាភិបាល​នៃ​ចលនា​ពលរដ្ឋ​ដើម្បី​ប្រជាធិបតេយ្យ លោក គឹម សុខ បាន​លើកឡើង​នៅ​ក្នុង​កម្មវិធី Idea Talk នៃ​សារព័ត៌មាន The Cambodia Daily កាលពី​រាត្រី​ថ្ងៃ​ទី​១៩ ខែ​មេសា ថា គណៈកម្មាធិការ​ជាតិ​រៀបចំ​ការ​បោះឆ្នោត​ដែល​ត្រូវ​ដឹកនាំ​ការ​បោះឆ្នោត​នៅ​ពេល​ខាងមុខ​នេះ គឺជា​គណៈកម្មាធិការ​មួយ​ដែល​ធ្លាប់​បាន​ប្លន់​យក​កៅអី​តំណាងរាស្ត្រ និង​កៅអី​ក្រុមប្រឹក្សា​ឃុំ-សង្កាត់​គណបក្ស​សង្គ្រោះ​ជាតិ​កន្លងមក។

លោក​បន្ត​ថា ការ​ចូលរួម​បោះឆ្នោត​ក្រោម​ការ​ដឹកនាំ​របស់​គណៈកម្មាធិការ​នេះ គ្រាន់តែ​ជា​ការ​ជួយ​លុបលាង​ទង្វើ​បំពាន​ច្បាប់​របស់​ពួកគេ និង​ជា​ការ​លើក​ទឹកចិត្ត​ឱ្យ​គណៈកម្មាធិការ​នេះ​អាច​ប្លន់​កៅអី​បក្ស​ប្រឆាំង​ក្រោយៗ​ទៀត​ប៉ុណ្ណោះ។

អ្នកវិភាគ​នយោបាយ និង​សង្គម​រូប​នេះ​ត្អូញត្អែរ​ថា កំហុស​ដ៏​ធំ​ដែល​គណបក្ស​ក្រៅ​រដ្ឋាភិបាល ជាពិសេស​មន្ត្រី​បក្ស​ប្រឆាំង​មិន​នាំគ្នា​ទាមទារ​ឱ្យ​រដ្ឋាភិបាល​ធ្វើ​កំណែ​ទម្រង់​ចំពោះ​ដំណើរការ​នៃ​ការ​បោះឆ្នោត មុន​នឹង​ខ្លួន​សម្រេច​ចិត្ត​ចូលរួម​ក្នុង​ការ​បោះឆ្នោត​ក្រុមប្រឹក្សា​ឃុំ-សង្កាត់​ឆ្នាំ​២០២២ ខាងមុខ​នេះ។

លោក គឹម សុខ បញ្ជាក់​ថា គ្មាន​គណបក្ស​ណា​មួយ ឬ​មេដឹកនាំ​នយោបាយ​ណា​ម្នាក់​ដែល​មាន​ការ​គាំទ្រ​ពី​ពលរដ្ឋ​ជិត​កន្លះ​នគរ​ដូច​គណបក្ស​សង្គ្រោះ​ជាតិ​នោះ​ទេ។ ដូច្នេះ​ការ​នាំគ្នា​ជួយ​ទាមទារ​យុត្តិធម៌​ឱ្យ​គណបក្ស​សង្គ្រោះ​ជាតិ មិន​ត្រឹមតែ​ជា​ការ​ផ្តល់​យុត្តិធម៌​ជូន​ពលរដ្ឋ​ខ្មែរ​ដែល​បាន​បោះឆ្នោត​ជូន​បក្ស​ប្រឆាំង​ប៉ុណ្ណោះ​ទេ ប៉ុន្តែ​ជា​ការ​ទាមទារ​រក​យុត្តិធម៌​ជូន​សង្គម​ជាតិ​កម្ពុជា​ទាំងមូល​ថែម​ទៀត។

ការ​អះអាង​នេះ ធ្វើ​ឡើង​ស្រប​ពេល​ដែល​គណបក្ស​នយោបាយ​នៅ​កម្ពុជា រួម​ទាំង​មន្ត្រី​បក្ស​ប្រឆាំង​មួយ​ចំនួន​ផង បាន​នាំគ្នា​ចូលរួម​ការ​បោះឆ្នោត​ទាំង​ដែល​គ្មាន​បក្ស​ប្រឆាំង គឺ​គណបក្ស​សង្គ្រោះ​ជាតិ​នៅ​ពេល​ដ៏​ខ្លី​ខាងមុខ​នេះ។

ចំណែក​ប្រធាន​គណៈកម្មាធិការ​នាយក​គណបក្ស​ប្រជាធិបតេយ្យ​មូលដ្ឋាន បណ្ឌិត យ៉ង សាំងកុមារ បាន​លើកឡើង​ក្នុង​កិច្ចពិភាក្សា​នេះ​ដែរ​ថា ដើម្បី​កែប្រែ​របៀប​ដឹកនាំ​របស់​រដ្ឋាភិបាល​បច្ចុប្បន្ន​នេះ ជាពិសេស​ការ​ដឹកនាំ​នៅ​មូលដ្ឋាន គណបក្ស​របស់​លោក​ត្រូវតែ​ចូលរួម​ការ​បោះឆ្នោត​នេះ ដើម្បី​ស្វែងរក​ការ​គាំទ្រ​ពី​ពលរដ្ឋ​ក្នុង​ការ​សម្រេច​ផែនការ​ដឹកនាំ​ឃុំ​គំរូ​ប្រកួតប្រជែង​ជាមួយ​គណបក្ស​កាន់​អំណាច​ទៅ​ថ្ងៃ​មុខ។

បណ្ឌិត យ៉ង សាំងកុមារ អះអាង​ថា ការ​បោះឆ្នោត​នេះ​គឺ​មាន​សារសំខាន់​ខ្លាំង​ណាស់ ដើម្បី​ផ្តល់​អ្នក​តំណាង​ជូន​ពលរដ្ឋ​ដើម្បី​បម្រើ​ពួកគាត់​នៅ​មូលដ្ឋាន ស្រប​ពេល​ដែល​ពលរដ្ឋ​តែងតែ​ត្អូញត្អែរ​ទូទាំង​ប្រទេស​អំពី​ការ​ដឹកនាំ​របស់​មេឃុំ និង​ចៅសង្កាត់​របស់​បក្ស​កាន់​អំណាច​កន្លងមក ដែល​មិន​អាច​បំពេញ​ការងារ​ឆ្លើយតប​នឹង​សេចក្តី​ត្រូវការ​របស់​ពលរដ្ឋ​នៅ​ឯ​មូលដ្ឋាន​បាន។

ការ​បោះឆ្នោត​ក្រុមប្រឹក្សា​ឃុំ-សង្កាត់​កាន់តែ​ខិត​ជិត​ចូល​មក​ដល់​ហើយ បើ​គិត​ត្រឹម​ថ្ងៃ​ទី​២០ ខែ​មេសា ឆ្នាំ​២០២២ នេះ រហូត​ដល់​ថ្ងៃ​បោះឆ្នោត គឺ​នៅ​ថ្ងៃ​ទី​៥ ខែ​មិថុនា ឆ្នាំ​២០២២ ខាងមុខ នៅ​សល់​តែ​រយៈពេល​ត្រឹមតែ ៤៦​ថ្ងៃ​ទៀត​ប៉ុណ្ណោះ ខណៈ​គណបក្ស​នយោបាយ​ដែល​ចូលរួម​ប្រកួត​មាន​ចំនួន ១៧​គណបក្ស ដែល​នឹង​ត្រូវ​ដាក់​បេក្ខជន​របស់​ខ្លួន​ទៅតាម​ឃុំ-សង្កាត់​ទូទាំង​ប្រទេស​ចំនួន ១៦៥២​ឃុំ​ក្នុង​ការ​ប្រកួត​នេះ។

ក្រុម​អ្នក​សង្កេតការណ៍​លើកឡើង​ថា ការ​ចូលរួម​បោះឆ្នោត​ជាមួយ​បក្ស​កាន់​អំណាច​ដោយ​មិន​ទាមទារ​ឱ្យ​មាន​ការ​កែប្រែ​នីតិវិធី​នៃ​ការ​បោះឆ្នោត​ឱ្យ​បាន​ត្រឹមត្រូវ មុន​នឹង​ចូលរួម​ការ​ប្រកួត​នេះ គឺជា​ការ​ជួយ​ឱ្យ​បក្ស​កាន់​អំណាច​អាច​បន្លំ​ភ្នែក​អន្តរជាតិ ដើម្បី​បន្ត​កាន់​អំណាច​ផ្ដាច់មុខ​ដូច​សព្វថ្ងៃ​បាន​យូរ​អង្វែង​ទៅ​ថ្ងៃ​មុខ​បន្ត​ទៀត​ប៉ុណ្ណោះ មិនមែន​ជា​ការ​ជួយ​លើកស្ទួយ​លទ្ធិប្រជាធិបតេយ្យ​នៅ​កម្ពុជា​នោះ​ទេ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស