29 C
Phnom Penh

អ្នក​នាំពាក្យ​ក្រសួង​មហាផ្ទៃ​ថា​លោក សៀម ភ្លុក មិន​អាច​គេចវេស​ពី​ផ្លូវច្បាប់​បាន​ឡើយ

ដោយ ឌឹ ខេមបូឌា ដេលី

បទវិភាគ

អ្នក​នាំពាក្យ​ក្រសួង​មហាផ្ទៃ ព្រមាន​ថា លោក សៀម ភ្លុក ដែល​ជា​ស្ថាបនិក​គណបក្ស​បេះដូង​ជាតិ នឹង​មិន​អាច​គេចវេស​ពី​ការ​ប្រឈម​មុខ​នឹង​ផ្លូវ​ច្បាប់​របស់​កម្ពុជា​បាន​ឡើយ បើ​ទោះជា​បាន​អះអាង​ថា​នឹង​ចូល​ខ្លួន​ទៅ​បំភ្លឺ​បន្ទាប់ពី​ទទួល​បាន​ឯកសារ​ពាក់ព័ន្ធ​លើ​សំណុំរឿង​របស់​លោក​ពី​តុលាការ។

អ្នក​នាំពាក្យ​ក្រសួង​មហាផ្ទៃ លោក ខៀវ សុភ័គ ត្រូវ​បាន​សារព័ត៌មាន​ក្នុង​ស្រុក VOD ដកស្រង់​សម្ដី​ថា លោក សៀម ភ្លុក នឹង​មិន​អាច​គេច​ខ្លួន​ទៅ​ណា​បាន​ឡើយ ហើយ​អាជ្ញាធរ​បាន​ចាត់​វិធានការ​ខ្លះៗ​ហើយ​ដើម្បី​ទប់ស្កាត់​កុំ​ឱ្យ​ស្ថាបនិក​គណបក្ស​បេះដូង​ជាតិ​រូប​នេះ​ចេញ​ទៅ​ក្រៅ​ប្រទេស។

ប្រភព​ដដែល​អះអាង​ថា វិធានការ​បន្ត​គឺ​ក្រសួង​មហាផ្ទៃ​កំពុងតែ​រង់ចាំ​អនុវត្ត​តាម​ការ​បញ្ជា​របស់​ស្ថាប័ន​អយ្យការ​ប៉ុណ្ណោះ បើ​ទោះជា​លោក សៀម ភ្លុក បាន​ព្យាយាម​គេចវេស​មិន​ចូល​បំភ្លឺ​នៅ​តុលាការ​តាម​ដីកា​ក៏ដោយ ប៉ុន្តែ​ករណី​នេះ លោក សៀម ភ្លុក បាន​បដិសេធ​ការ​ចូល​បំភ្លឺ​នៅ​តុលាការ​ដោយ​សំអាង​ថា លោក​មិន​ទទួល​បាន​ដីកា​កោះ​ពី​តុលាការ​នោះ​ទេ​នា​ពេល​កន្លងមក។

ការ​អះអាង​នេះ ធ្វើឡើង​បន្ទាប់ពី​លេចឮ​នូវ​ព័ត៌មាន​ថា ស្ថាបនិក​គណបក្ស​បេះដូង​ជាតិ លោក សៀម ភ្លុក បាន​គេច​ខ្លួន​ទៅ​រក​កន្លែង​មាន​សុវត្ថិភាព​បន្ទាប់ពី​តុលាការ​បាន​ចេញ​ដីកា​ឲ្យ​នាំ​ខ្លួន​លោក​កាលពី​ពេល​ថ្មីៗ​នេះ។

កាលពី​ថ្ងៃ​ទី​៤ ខែ​មេសា ឆ្នាំ​២០២២ ចៅក្រម​ស៊ើបសួរ​សាលាដំបូង​រាជធានី​ភ្នំពេញ បាន​ចេញ​ដីកា​បង្គាប់​ឱ្យ​នាំ​ខ្លួន​លោក សៀម ភ្លុក ទៅកាន់​សាលាដំបូង​រាជធានី​ភ្នំពេញ ឱ្យ​បាន​មុន​ថ្ងៃ​ទី​២៥ ខែ​មេសា ឆ្នាំ​២០២២ នេះ ពាក់ព័ន្ធ​នឹង​បទ​ចោទ «ក្លែង​បន្លំ និង​ប្រើប្រាស់​លិខិត​ក្លែង» ក្នុង​ការ​បង្កើត​គណបក្ស​បេះដូង​ជាតិ នា​ពេល​កន្លងមក។

ជុំវិញ​បញ្ហា​នេះ កាលពី​ថ្ងៃ​ទី​១៩ ខែ​មេសា ឆ្នាំ​២០២២ អ្នក​នាំពាក្យ​គណបក្ស​ប្រជាជន​កម្ពុជា លោក សុខ ឥសាន បាន​អះអាង​ថា ការ​គេច​ខ្លួន​របស់​លោក សៀម ភ្លុក ដែល​ជា​ស្ថាបនិក​គណបក្ស​បេះដូង​ជាតិ គឺជា​អំពើ​ទុច្ចរិត​ដែល​អាច​បញ្ជាក់​ថា លោក​ពិតជា​បាន​ប្រព្រឹត្ត​ខុស​នឹង​ផ្លូវច្បាប់​ប្រាកដ​មែន។ លោក សុខ ឥសាន បញ្ជាក់​ថា បើ​ពិតជា​មាស​សុទ្ធ លោក សៀម ភ្លុក មិន​ចាំបាច់​គេច​ខ្លួន​នោះ​ទេ ព្រោះ​ថា​ការ​គេច​ខ្លួន​នេះ គឺជា​ការ​បញ្ជាក់​យ៉ាង​ច្បាស់​នូវ​អំពើ​ទុច្ចរិត​របស់​គាត់។ អ្នក​នាំពាក្យ​រូប​នេះ​បន្ត​ថា បើ​ខ្លួន​អះអាង​ថា​មិន​បាន​បន្លំ​ស្នាម​មេដៃ ហេតុ​អ្វី​ចាំបាច់​រត់​គេច​ខ្លួន។

ដោយឡែក​នាយិកា​ប្រតិបត្តិ​នៃ​មជ្ឈមណ្ឌល​សិទ្ធិមនុស្ស​កម្ពុជា (CCHR) អ្នកស្រី ចក់ សុភាព បាន​លើកឡើង​កាល​ពី​ពេល​ថ្មីៗ​នេះ​ថា អាជ្ញាធរ​គួរតែ​ធ្វើការ​ដោយ​យុត្តិធម៌ ហើយ​មិន​គួរ​រើសអើង​និន្នាការ​នយោបាយ​ខុសគ្នា​នោះ​ទេ។

យ៉ាងណាក៏ដោយ​ក្ដី ស្ថាបនិក​គណបក្ស​បេះដូង​ជាតិ លោក សៀម ភ្លុក បាន​ចេញ​សេចក្តី​ប្រកាស​ព័ត៌មាន​នៅ​ថ្ងៃ​ទី​២០ ខែ​មេសា ឆ្នាំ​២០២២ ថា លោក​មិន​ដែល​មាន​បំណង​គេចវេស​ពី​ការ​កោះហៅ​របស់​តុលាការ​ម្តង​ណា​ឡើយ ប៉ុន្តែ​ដោយសារតែ​កន្លងមក លោក​មិន​ដែល​បាន​ទទួល​ដីកា​កោះហៅ​ជា​ផ្លូវការ​ពី​តុលាការ​ទាល់តែសោះ។

ស្ថាបនិក​គណបក្ស​បេះដូង​ជាតិ លោក សៀម ភ្លុក អះអាង​ថា លោក​នឹង​ចូល​ខ្លួន​ទៅ​បំភ្លឺ​នៅ​ចំពោះ​មុខ​ចៅក្រម​ស៊ើបសួរ បន្ទាប់ពី​លោក​ពឹងពាក់​មេធាវី និង​ទទួល​បាន​ឯកសារ​ពាក់ព័ន្ធ​លើ​សំណុំរឿង​របស់​លោក​ពី​តុលាការ​រួចរាល់ ព្រោះ​លោក​មិន​មាន​ចេតនា​គេច​ពី​ការ​កោះហៅ​របស់​តុលាការ​នោះ​ទេ។

កាលពី​ថ្ងៃ​ទី​៨ ខែ​វិច្ឆិកា ឆ្នាំ​២០២១ រដ្ឋមន្ត្រី​ក្រសួង​មហាផ្ទៃ លោក ស ខេង អះអាង​ថា ស្នាម​មេដៃ​របស់​សមាជិក​គណបក្ស​បេះដូង​ជាតិ​ចំនួន​ជាង ៤៧០០​នាក់ គឺ​សុទ្ធសឹងតែ​ជា​ស្នាម​មេដៃ​មាន​ភាព​មិន​ប្រក្រតី​ទាំងអស់៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស