 ដែលហៅកាត់ថាអ៊ុនតាក់ (UNTAC) កាលពីឆ្នាំ១៩៩២ រយៈពេល ១ខែនៅកម្ពុជា។){kind=link}
ស្ថានទូតអូស្ត្រាលី កំពុងរៀបចំការតាំងពិព័រណ៍រូបថតនានាដើម្បីរំឭកខួបលើកទី៣០ឆ្នាំនៃការចាប់ផ្តើមមានវត្តមានអាជ្ញាធរបណ្ដោះអាសន្នអង្គការសហប្រជាជាតិនៅកម្ពុជា (United Nation Transitional Authority in Cambodia) ដែលហៅកាត់ថាអ៊ុនតាក់ (UNTAC) កាលពីឆ្នាំ១៩៩២ រយៈពេល ១ខែនៅកម្ពុជា។
ស្ថានទូតអូស្ត្រាលីប្រចាំកម្ពុជា បានសរសេរលើទំព័រ Facebook របស់ខ្លួនកាលពីថ្ងៃទី២៥ ខែមេសា ឆ្នាំ២០២២ ថា ខ្លួនកំពុងរៀបចំការតាំងពិព័រណ៍រូបថតនានាដើម្បីរំឭកខួបលើកទី៣០ឆ្នាំនៃការចាប់ផ្តើមមានវត្តមានអាជ្ញាធរបណ្ដោះអាសន្ននៃអង្គការសហប្រជាជាតិនៅកម្ពុជា ចាប់ពីថ្ងៃទី២៩ ខែមេសា ដល់ថ្ងៃទី២៨ ខែឧសភា ឆ្នាំ២០២២ នៅសណ្ឋាគារ Raffle Hotel le Royal ក្នុងទីក្រុងភ្នំពេញ ដែលនឹងអនុញ្ញាតឲ្យសាធារណជនចូលទស្សនាជារៀងរាល់ថ្ងៃ។
ប្រភពដដែលអះអាងថា អាជ្ញាធរបណ្ដោះអាសន្នអង្គការសហប្រជាជាតិនៅកម្ពុជា (United Nation Transitional Authority in Cambodia ឬ UNTAC) គឺជាសម័យកាលប្រវត្តិសាស្ត្រមួយសម្រាប់កម្ពុជា និងជាគំរូដ៏ល្អបំផុតនៃកិច្ចសហប្រតិបត្តិការនយោបាយ និងសន្តិសុខពហុភាគីប្រកបដោយប្រសិទ្ធភាពនៅពេលនោះ។
ស្ថានទូតអូស្ត្រាលីបញ្ជាក់ថា អតីតអគ្គមេបញ្ជាការរបស់ UNTAC ឧត្តមសេនីយ៍ឯក John Sanderson របស់អូស្ត្រាលី បានបញ្ជាកងកម្លាំងយោធាដែលត្រូវប្រចាំការក្នុងការធានានូវសន្តិសុខសម្រាប់កម្ពុជានាពេលនោះមានចំនួន ១ម៉ឺន ៦ពាន់នាក់ រួមទាំងទាហានមកពីបណ្តាប្រទេសជាដៃគូក្នុងតំបន់ផងដែរ ខណៈអូស្ត្រាលីខ្លួនឯងក៏បានបញ្ជូនបុគ្គលិកជាង ១ម៉ឺន ២ពាន់នាក់មកជួយដល់ UNTAC ដើម្បីជំរុញឲ្យការងារកាន់តែមានប្រសិទ្ធភាពនៅពេលនោះថែមទៀត។
ការរៀបចំពិព័រណ៍នេះ ធ្វើឡើងដើម្បីរំឭកខួប ៣០ឆ្នាំនៃការចាប់ផ្តើមមានវត្តមាននៃអាជ្ញាធរបណ្ដោះអាសន្នអង្គការសហប្រជាជាតិនៅកម្ពុជា ក្រោមសន្ធិសញ្ញាកិច្ចព្រមព្រៀងសន្តិភាពទីក្រុងប៉ារីស ឆ្នាំ១៩៩១ ដែលជាហេតុនាំឲ្យកម្ពុជាបញ្ចប់ជម្លោះប្រដាប់អាវុធរហូតដល់សព្វថ្ងៃនេះ។
United Nation Transitional Authority in Cambodia ឬ UNTAC ត្រូវបានបង្កើតឡើងដោយអង្គការសហប្រជាជាតិ ក្នុងឆ្នាំ១៩៩២ ដើម្បីត្រួតពិនិត្យការអនុវត្តកិច្ចព្រមព្រៀងសន្តិភាពទីក្រុងប៉ារីស ការធ្វើមាតុភូមិនិវត្តន៍របស់ពលរដ្ឋកម្ពុជាដែលបានផ្លាស់ទីលំនៅដោយសារសង្គ្រាមស៊ីវិល និងដើម្បីធានានូវសន្តិសុខក្នុងការបោះឆ្នោតជាតិលើកដំបូងក្រោយចប់សង្គ្រាមក្នុងឆ្នាំ១៩៩៣ ផងដែរ។
ប្រធានក្រុមប្រឹក្សាភិបាលនៃចលនាពលរដ្ឋដើម្បីប្រជាធិបតេយ្យ លោក ម៉ែន ណាត បានប្រាប់សារព័ត៌មាន The Cambodia Daily នៅថ្ងៃទី២៨ មេសា ថា ការរៀបចំពិព័រណ៍រំឭកខួបនេះ គឺជាការឆ្លុះបញ្ចាំងពីចេតនារបស់រដ្ឋាភិបាលអូស្ត្រាលីយ៉ាងច្បាស់ពីការទាមទារដោយប្រយោល ឲ្យកម្ពុជាងាកទៅរកការអនុវត្តតាមខ្លឹមសារដើមនៃកិច្ចព្រមព្រៀងសន្តិភាពទីក្រុងប៉ារីស ដើម្បីឲ្យកម្ពុជាងាកទៅរកការដឹកនាំតាមបែបលទ្ធិប្រជាធិបតេយ្យដោយពិតប្រាកដ។
លោក ម៉ែន ណាត លើកឡើងថា ដំណើរការប្រជាធិបតេយ្យនៅកម្ពុជា ពិសេសការបោះឆ្នោតលើកដំបូងក្នុងឆ្នាំ១៩៩៣ ដែលមានវត្តមាន UNTAC ចូលរួមការពារសន្តិសុខនៅពេលនោះ កម្ពុជាបានទទួលនូវការបោះឆ្នោតមួយដែលស្របទៅតាមខ្លឹមសារនៃលទ្ធិប្រជាធិបតេយ្យយ៉ាងប្រាកដ ដូច្នេះការរៀបចំពិព័រណ៍មុនការបោះឆ្នោតឆ្នាំ២០២២ នៅកម្ពុជាខាងមុខនេះ ក៏ជាតឹកតាងមួយរំលេចនូវដំណើរការនៃការបោះឆ្នោតដោយសេរី ត្រឹមត្រូវ និងយុត្តិធម៌នៅពេលនោះដែរ។
ប្រធានក្រុមប្រឹក្សាភិបាលនៃចលនាពលរដ្ឋរូបនេះបញ្ជាក់ថា សហគមន៍អន្តរជាតិផ្ដោតការយកចិត្តទុកដាក់យ៉ាងខ្លាំងចំពោះកម្ពុជា ដើម្បីអនុវត្តឲ្យបានស្របតាមខ្លឹមសារនៃកិច្ចព្រមព្រៀងសន្តិភាពទីក្រុងប៉ារីស ទោះជាពួកគេធ្វើសកម្មភាពក្នុងរូបភាពណាក៏ដោយ ព្រោះថានៅពេលដែលកម្ពុជាអនុវត្តឃ្លាតឆ្ងាយពីខ្លឹមសារនៃកិច្ចព្រមព្រៀងនេះ កម្ពុជានឹងឃ្លាតឆ្ងាយពីលទ្ធិប្រជាធិបតេយ្យ និងការគោរពសិទ្ធិមនុស្សដូច្នោះដែរ។
ក្រុមអ្នកឃ្លាំមើលសង្គមលើកឡើងថា ក្រោយការបោះឆ្នោតឆ្នាំ១៩៩៣ ដែលមានវត្តមានរបស់ UNTAC មក កម្ពុជាបានធ្លាក់ចូលទៅក្នុងនយោបាយដណ្តើមអំណាចគ្នាយ៉ាងវក់វី ដែលផ្ទុយស្រឡះពីខ្លឹមសារដើមនៃកិច្ចព្រមព្រៀងសន្តិភាពក្រុងប៉ារីស និងខ្លឹមសាររដ្ឋធម្មនុញ្ញរបស់កម្ពុជា។ ជាក់ស្តែង ការបោះឆ្នោតស្ទើរតែរាល់អាណត្តិ គឺត្រូវរៀបចំដោយបក្សកាន់អំណាចគ្រប់ទម្រង់ និងគ្រប់រូបភាព ដូចជាការបោះឆ្នោតអាណត្តិទី៥ ឆ្នាំ២០២២ នាពេលខាងមុខនេះ ក៏ត្រូវគេមើលឃើញថាស្ថិតក្នុងការរៀបចំរបស់គណបក្សកាន់អំណាចដែរ៕