28 C
Phnom Penh

អ្នកវិភាគ៖ ការ​បោះឆ្នោត​ឃុំ-សង្កាត់​គឺ​មិន​មែន​ដើម្បី​ធ្វើ​បាប​ពលរដ្ឋ​ម្ចាស់​ឆ្នោត​នោះ​ទេ

ដោយ ឌឹ ខេមបូឌា ដេលី

បទវិភាគ

អ្នកវិភាគ​នយោបាយ និង​សង្គម​ព្រមាន​ថា ការ​បោះឆ្នោត​ឃុំ-សង្កាត់ គឺជា​កិច្ចការ​ដែល​ចាំបាច់​បំផុត​សម្រាប់​ដំណើរការ​ប្រជាធិបតេយ្យ​នៅ​មូលដ្ឋាន ក្នុង​ការ​បម្រើ​ពលរដ្ឋ​ដោយ​ពិតប្រាកដ មិន​មែន​ដើម្បី​ធ្វើ​បាប​ពលរដ្ឋ​ដែល​បាន​បោះឆ្នោត​ឱ្យ​ខ្លួន​នោះ​ទេ។

អ្នកវិភាគ​នយោបាយ និង​សង្គម បណ្ឌិត ឡៅ ម៉ុងហៃ បាន​សរសេរ​លើ​គណនី​ហ្វេសប៊ុក​របស់​លោក​កាលពី​ថ្ងៃ​ទី​៧ ឧសភា ថា ការ​បោះឆ្នោត និង​ការ​រៀបចំ​ឱ្យ​ឃុំ-សង្កាត់​មាន​អំណាច​ស្វ័យភាព​ក្នុង​ការ​បម្រើ​ពលរដ្ឋ​ដោយ​ពិតប្រាកដ នោះ​ទើប​ការ​បោះឆ្នោត​ក្រុមប្រឹក្សា​ឃុំ-សង្កាត់​មាន​ចាំបាច់​សម្រាប់​ដំណើរការ​ប្រជាធិបតេយ្យ​នៅ​មូលដ្ឋាន។

បណ្ឌិត ឡៅ ម៉ុងហៃ លើកឡើង​ថា ការ​ឈ្នះ​ឆ្នោត​ដែល​ទទួល​បាន​អំណាច​ពី​ប្រជាពលរដ្ឋ និង​បាន​អំណាច​ពី​រដ្ឋ​យក​ទៅ​ប្រើប្រាស់ គឺ​សម្រាប់​លើក​កម្ពស់​ជីវភាព​រស់នៅ និង​សុខមាលភាព​របស់​ប្រជាពលរដ្ឋ​ក្នុង​ការ​ដោះស្រាយ​បញ្ហា និង​ឧបសគ្គ​ដែល​ប៉ះពាល់​ដល់​ការ​រស់នៅ​របស់​ប្រជាពលរដ្ឋ​ប៉ុណ្ណោះ មិនមែន​ដើម្បី​ធ្វើ​បាប​ពលរដ្ឋ​ដែល​បាន​បោះឆ្នោត​ឱ្យ​ខ្លួន​នោះ​ទេ។

អ្នកវិភាគ​នយោបាយ និង​សង្គម​រូប​នេះ​លើកឡើង​ថា បើ​ក្រុមប្រឹក្សា​ឃុំ-សង្កាត់​ទាំងអស់​មាន​សមត្ថភាព និង​ចេះ​ទាក់ទាញ​ការ​សហការ​ពី​ពលរដ្ឋ និង​ពី​គ្រប់​មជ្ឈដ្ឋាន​ពាក់ព័ន្ធ​ដើម្បី​ជួយ​លើក​ឡើង​នូវ​បញ្ហា ស្វែងរក​ដោះស្រាយ នោះ​ការ​បោះឆ្នោត​ជ្រើស​អ្នក​តំណាង​នៅ​មូលដ្ឋាន​នេះ អាច​ចាត់ទុក​ថា​ជា​ការ​ធ្វើឡើង​ដោយ​ត្រឹមត្រូវ និង​មាន​ប្រយោជន៍​សម្រាប់​ប្រជាជន និង​សង្គម​ជាតិ​ទាំងមូល។

អ្នកវិភាគ​នយោបាយ សង្គម និង​ជា​អនុប្រធាន​ក្រុមប្រឹក្សាភិបាល​នៃ​ចលនា​ពលរដ្ឋ​ដើម្បី​ប្រជាធិបតេយ្យ លោក គឹម សុខ បាន​សរសេរ​លើ​គណនី​ហ្វេសប៊ុក​របស់​លោក​កាលពី​ថ្ងៃ​ទី​៨ ខែ​ឧសភា ឆ្នាំ​២០២២ ថា កម្ពុជា​គ្មាន​សេរីភាព​សារព័ត៌មាន​នោះ​ទេ។ កាលណា​សេរីភាព​សារព័ត៌មាន​នៅ​កម្ពុជា​ត្រូវ​បាន​រឹតត្បិត​កាន់តែ​ខ្លាំង​ដូច​សព្វថ្ងៃ​នេះ នោះ​ការ​បោះឆ្នោត​ដើម្បី​ធានា​នូវ​ការ​អនុវត្ត​ប្រព័ន្ធ​លទ្ធិប្រជាធិបតេយ្យ គ្រាន់តែ​ជា​វេទិកា​នយោបាយ​របស់​បក្ស​កាន់​អំណាច ធ្វើឡើង​ក្នុង​បំណង​បន្លំ​ភ្នែក​អន្តរជាតិ និង​បោកប្រាស់​ពលរដ្ឋ​ខ្មែរ​តែប៉ុណ្ណោះ។

ការ​អះអាង​នេះ ធ្វើឡើង​ស្រប​ពេល​ដែល​ការ​បោះឆ្នោត​ជ្រើសរើស​ក្រុមប្រឹក្សា​ឃុំ-សង្កាត់​អាណត្តិ​ទី​៥ កាន់តែ​ខិត​ជិត​មក​ដល់​នៅ​ខែ​មិថុនា ដ៏​ខ្លី​ខាងមុខ​នេះ។

កាលពី​ថ្ងៃ​ទី​១ ខែ​មីនា ឆ្នាំ​២០២១ ប្រមុខ​រដ្ឋាភិបាល​កម្ពុជា បាន​ចេញ​សេចក្តី​សម្រេច​ស្ដីពី​ការ​កំណត់​កាលបរិច្ឆេទ​នៃ​ការ​បោះឆ្នោត​ជ្រើសរើស​ក្រុមប្រឹក្សា​ឃុំ-សង្កាត់​អាណត្តិ​ទី​៥ ដោយ​កំណត់​យក​ថ្ងៃ​ទី​៥ ខែ​មិថុនា ឆ្នាំ​២០២២ ជា​កំណត់ ប៉ុន្តែ​ការ​បោះឆ្នោត​នេះ​ត្រូវ​គេ​មើល​ឃើញ​ថា គ្រាន់តែ​ជា​ដំណើរការ​បង្គ្រប់​កិច្ច​ឱ្យ​បក្ស​កាន់​អំណាច ដើម្បី​ឱ្យ​ពួកគេ​អាច​បន្ត​ការ​ដឹកនាំ​កម្ពុជា​នូវ​អាណត្តិ​ថ្មី​ទាំង​បំពាន​ច្បាប់​ប៉ុណ្ណោះ។

យ៉ាងណា​ក៏ដោយ រដ្ឋមន្ត្រី​ក្រសួង​មហាផ្ទៃ លោក ស ខេង បាន​អះអាង​កាលពី​ថ្ងៃ​ទី​២៩ ខែ​មេសា ឆ្នាំ​២០២២ ថា ការ​បោះឆ្នោត​អាណត្តិ​ទី​៥ ឆ្នាំ​២០២២ ខាងមុខ​នេះ គឺ​ដើម្បី​ពង្រឹង​លទ្ធិប្រជាធិបតេយ្យ ការ​គោរព​សិទ្ធិមនុស្ស ការ​ពង្រឹង​នីតិរដ្ឋ និង​ការ​អភិវឌ្ឍ​ប្រទេស​ជាតិ​ប្រកប​ដោយ​សេចក្ដី​ថ្លៃថ្នូរ ព្រមទាំង​លើក​កម្ពស់​កិត្យានុភាព​ជាតិ​នៅ​លើ​ឆាក​អន្តរជាតិ​ផង​ដែរ។

បែប​នេះ​ក្តី ក្រុម​អ្នក​សង្កេតការណ៍​លើកឡើង​ថា គណបក្ស​នយោបាយ​ក្រៅ​រដ្ឋាភិបាល​ទាំងអស់​ដែល​ចូលរួម​ការ​បោះឆ្នោត​ឃុំ-សង្កាត់​អាណត្តិ​ទី​៥ ឆ្នាំ​២០២២ ខាងមុខ​នេះ គឺ​ស្មើ​នឹង​សហការ​ជាមួយ​បក្ស​កាន់​អំណាច​រំលោភ​លើ​រដ្ឋ​ធម្មនុញ្ញ និង​កិច្ចព្រមព្រៀង​សន្តិភាព​ទីក្រុង​ប៉ារីស ដែល​បាន​ចែង​អំពី​ដំណើរការ​នៃ​ការ​បោះឆ្នោត​ដោយ​សេរី ត្រឹមត្រូវ និង​យុត្តិធម៌​ប៉ុណ្ណោះ។

ប្រភព​ដដែល​អះអាង​ថា ការ​បោះឆ្នោត​ក្រុមប្រឹក្សា​ឃុំ-សង្កាត់​អាណត្តិ​ទី​៥ ឆ្នាំ​២០២២ ខាងមុខ​នេះ គឺជា​ការ​បោះឆ្នោត​មួយ​ដែល​រៀបចំ​ឡើង​ដោយ​គណបក្ស​កាន់​អំណាច​របស់​លោក ហ៊ុន សែន ដែល​គ្មាន​ឯករាជភាព តម្លាភាព និង​កំពុង​អនុវត្ត​ផ្ទុយ​ពី​ខ្លឹមសារ​រដ្ឋធម្មនុញ្ញ​របស់​កម្ពុជា​ទាំងស្រុង៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស