រដ្ឋមន្ត្រីក្រសួងមហាផ្ទៃ លោក ស ខេង លើកឡើងថា ការតែងតាំងលោក សុន ឆ័យ ជាអនុប្រធានគណបក្សភ្លើងទៀន ធ្វើឡើងផ្ទុយនឹងលក្ខន្តិកៈគណបក្សដែលបានតម្កល់ទុកនៅក្រសួងមហាផ្ទៃ និងច្បាប់ស្ដីពីគណបក្សនយោបាយ។
យោងតាមលិខិតរបស់ក្រសួងមហាផ្ទៃ ចុះថ្ងៃទី២៥ ខែឧសភា ឆ្នាំ២០២២ បានស្នើទៅគណបក្សភ្លើងទៀន ឱ្យពិនិត្យឡើងវិញ និងអនុវត្តតាមលក្ខន្តិកៈ និងច្បាប់ស្ដីពីគណបក្សនយោបាយដែលបានតម្កល់ទុកនៅក្រសួងមហាផ្ទៃ។
ការស្នើឱ្យពិនិត្យមើលឡើងវិញបន្ទាប់ពីក្រសួងមហាផ្ទៃ អះអាងថា ការតែងតាំងលោក សុន ឆ័យ ជាអនុប្រធានគណបក្សភ្លើងទៀននោះ បានអនុវត្តផ្ទុយនឹងប្រការ២០ និងប្រការ៣៣ នៃលក្ខន្តិកៈគណបក្សដែលបានតម្កល់ទុកនៅក្រសួងមហាផ្ទៃ ព្រមទាំងបញ្ញត្តិមាត្រា២៦ថ្មី នៃច្បាប់ស្ដីពីគណបក្សនយោបាយផងដែរ។
ទោះជាយ៉ាងណាក៏ដោយ លោក សុន ឆ័យ ប្រាប់សារព័ត៌មាន The Cambodia Daily នៅមុនការផ្សាយនេះបន្តិចថា លោកនឹងរៀបចំបែបបទឯកសារបន្ថែមដាក់ជូនក្រសួងមហាផ្ទៃ នៅពេលដែលលោកត្រឡប់មកពីបំពេញបេសកកម្មក្នុងខេត្តមណ្ឌលគិរី វិញហើយនោះ។
ប្រការ២០ ក្នុងលក្ខន្តិកៈរបស់គណបក្សភ្លើងទៀន ចែងថា សមាជបោះឆ្នោតជ្រើសតាំងសមាជិកគណៈកម្មាធិការនាយកគណបក្ស ដោយមតិភាគច្រើនដាច់ខាត (៥០% +១) នៃសមាជិកដែលមានវត្តមាន។ ចំណែកប្រការ៣៣ ចែងថា ប្រធានគណបក្សតែងតាំងអនុប្រធានយ៉ាងតិច ១រូបក្នុងចំណោមសមាជិកគណៈកម្មាធិការនាយក បន្ទាប់ពីមានការយល់ព្រមពីមតិភាគច្រើនដាច់ខាតនៃគណៈកម្មាធិការនាយក។
លោក សុន ឆ័យ ជាតំណាងរាស្ត្រនៃអតីតគណបក្សសង្គ្រោះជាតិ ត្រូវបានព្រះមហាក្សត្រចេញព្រះរាជក្រឹត្យមួយផ្តល់នីតិសម្បទាធ្វើនយោបាយ កាលពីថ្ងៃទី០៣ ខែកញ្ញា ឆ្នាំ២០២០ បន្ទាប់ពីមានសំណើលោក ហ៊ុន សែន។
ក្រោយពីទទួលបាននីតិសម្បទាធ្វើនយោបាយឡើងវិញ នៅថ្ងៃទី១ ខែមីនា ឆ្នាំ២០២២ លោក សុន ឆ័យ បានប្រកាសចូលរួមជីវភាពនយោបាយជាមួយគណបក្សភ្លើងទៀន ដែលជាអតីតគណបក្ស សម រង្ស៊ី៕