មន្ត្រីជាន់ខ្ពស់គណបក្សសង្គ្រោះជាតិ អះអាងថា គណបក្សភ្លើងទៀនដែលបានដកខ្លួនចេញពីស្មារតីគណបក្សសង្គ្រោះជាតិ ទៅចូលរួមបោះឆ្នោតមួយដែលគ្មានតម្លាភាពជាមួយគណបក្សកាន់អំណាច គឺជាការបំបែកកម្លាំងអ្នកប្រជាធិបតេយ្យខ្លាំងបំផុត ក្នុងពេលដែលគណបក្សកាន់អំណាចកំពុងតែត្រដរខ្យល់ដោយសារតែសហគមន៍អន្តរជាតិមិនទទួលស្គាល់ការបោះឆ្នោតនេះ។
មន្ត្រីជាន់ខ្ពស់បក្សប្រឆាំង លោក មាជ សុវណ្ណារ៉ា បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីរាត្រីថ្ងៃទី២៤ ឧសភា ថា កម្លាំងដែលគាំទ្រគណបក្សសង្គ្រោះជាតិ ដូចជាអ្នកគាំទ្រគណបក្សសិទ្ធិមនុស្ស និងកម្លាំងដែលមិនមែនជាអ្នកគាំទ្រគណបក្សភ្លើងទៀន ព្រមទាំងកម្លាំងមិនគាំទ្រគណបក្សសិទ្ធិមនុស្ស នឹងមិនទៅបោះឆ្នោតឱ្យគណបក្សភ្លើងទៀននោះទេ ព្រោះគណបក្សដែលពួកគាត់ផ្តល់ក្តីសង្ឃឹមក្នុងការផ្លាស់ប្ដូរជាវិជ្ជមាននោះ គឺមានតែគណបក្សសង្គ្រោះជាតិតែមួយប៉ុណ្ណោះ។
លោក មាជ សុវណ្ណារ៉ា អះអាងថា មន្ត្រីជាន់ខ្ពស់របស់គណបក្សភ្លើងទៀនមួយភាគធំមិនមែនស្មោះស្ម័គ្រនឹងគណបក្សភ្លើងទៀននោះទេ ប៉ុន្តែពួកគេចូលទៅបង្កប់ខ្លួនបម្រើឱ្យគណបក្សកាន់អំណាចប៉ុណ្ណោះ។ លោកថា ចំណុចនេះបង្ហាញឱ្យឃើញថា កុំថាឡើយកម្លាំងពលរដ្ឋមិនគាំទ្របក្សភ្លើងទៀន សូម្បីមន្ត្រីជាន់ខ្ពស់បក្សភ្លើងទៀនខ្លួនឯងក៏មិនគាំទ្រគណបក្សខ្លួនឯងដែរ ដូច្នេះអ្នកទទួលជ័យជម្នះពិតប្រាកដក្នុងការបោះឆ្នោតនេះ គឺមានតែបក្សកាន់អំណាចតែមួយគត់។
មន្ត្រីជាន់ខ្ពស់បក្សប្រឆាំងរូបនេះបញ្ជាក់ថា បើចង់ដឹងថាការបោះឆ្នោតអាណត្តិនេះត្រឹមត្រូវ ឬមិនត្រឹមត្រូវ គឺពលរដ្ឋខ្មែរគ្រាន់តែពិនិត្យទៅលើសហគមន៍អន្តរជាតិ ដែលមិនចូលរួមសង្កេតការណ៍ចំពោះការបោះឆ្នោតនេះ ឬពិនិត្យទៅលើសមាសភាព គ.ជ.ប ដែលគណបក្សកាន់អំណាចបានរៀបចំ និងការបង្ខាំងមេបក្សប្រឆាំង លោក កឹម សុខា មិនឱ្យចូលរួមការបោះឆ្នោត នោះពលរដ្ឋម្ចាស់ឆ្នោតនឹងដឹងថាការបោះឆ្នោតនេះដើម្បីបង្គ្រប់កិច្ចឱ្យបក្សកាន់អំណាចតែប៉ុណ្ណោះ។
ការអះអាងនេះ ធ្វើឡើងស្របពេលដែលការឃោសនាបោះឆ្នោតអាណត្តិទី៥ កំពុងតែដំណើរការដោយមានគណបក្សនយោបាយចំនួន ១៧ ចូលរួម ក្នុងនោះក៏មានគណបក្សភ្លើងទៀនដែលគេសង្ស័យថាមានលោក សម រង្ស៊ី នៅពីក្រោយ។
អតីតប្រធានចលនានិស្សិតដើម្បីលទ្ធិប្រជាធិបតេយ្យ (SMD) លោក សារ៉ូ សុវិជ័យ បានលើកឡើងក្នុងកិច្ចពិភាក្សានេះដែរថា ការចូលរួមរបស់គណបក្សភ្លើងទៀន នៅពេលនេះ នឹងមានប្រយោជន៍កាន់តែខ្លាំងសម្រាប់បក្សកាន់អំណាចនៅពេលបោះឆ្នោតជ្រើសរើសតំណាងរាស្ត្រឆ្នាំ២០២៣ ព្រោះគណបក្សកាន់អំណាចមិនអាចយកឈ្នះឆ្នោតមួយដែលអន្តរជាតិមិនទទួលស្គាល់បន្តទៀតនោះទេ ដូច្នេះពួកគេមានតែពឹងគណបក្សភ្លើងទៀន ឱ្យជួយផ្តល់ភាពស្របច្បាប់ឱ្យខ្លួនទៅថ្ងៃមុខ ទើបជាជម្រើសដែលល្អប្រសើរ។
កាលពីឆ្នាំ២០១២ គណបក្ស សម រង្ស៊ី និងគណបក្សសិទ្ធិមនុស្ស បានរួមបញ្ចូលគ្នាបង្កើតទៅជាគណបក្សសង្គ្រោះជាតិ ប៉ុន្តែក្រោយពីគណបក្សសង្គ្រោះជាតិត្រូវបានរំលាយកាលពីឆ្នាំ២០១៧ គណបក្ស សម រង្ស៊ី បានប្តូរឈ្មោះរបស់ខ្លួនទៅជាគណបក្សភ្លើងទៀនវិញ។
កាលពីថ្ងៃទី២៧ ខែវិច្ឆិកា ឆ្នាំ២០២១ កន្លងទៅ គណបក្សភ្លើងទៀន បានប្រកាសបើកពិធីសមាជរបស់ខ្លួនដើម្បីធ្វើវិសោធនកម្មបទបញ្ជាផ្ទៃក្នុង និងសមាសភាពថ្នាក់ដឹកនាំដើម្បីចូលរួមការបោះឆ្នោតខាងមុខនេះ ហើយដែលត្រូវគេសង្ស័យថាជាផែនការដែលរៀបចំដោយលោក សម រង្ស៊ី៕