 ដែលមានថៅកែតែមួយជាជនជាតិម៉ាឡេស៊ី នៅខណ្ឌពោធិ៍សែនជ័យ រាជធានីភ្នំពេញ បាននាំគ្នាដើរថ្មើរជើងយកញត្តិទៅដាក់នៅក្រសួងការងារ ដើម្បីជំរុញឱ្យមានការដោះស្រាយវិវាទការងារ ក្រោយថៅកែបិទទ្វាររោងចក្រមិនទូទាត់សំណងតាមផ្លូវច្បាប់។){kind=link}
កម្មករកម្មការិនីបម្រើការងារក្នុងរោងចក្រ ឃែនធើរេន អីភែរឹល ខេ និងរោងចក្រ ខ្វលីធី តេក្សស្ទីល (QUALITY TEXTILES) ដែលមានថៅកែតែមួយជាជនជាតិម៉ាឡេស៊ី នៅខណ្ឌពោធិ៍សែនជ័យ រាជធានីភ្នំពេញ បាននាំគ្នាដើរថ្មើរជើងយកញត្តិទៅដាក់នៅក្រសួងការងារ ដើម្បីជំរុញឱ្យមានការដោះស្រាយវិវាទការងារ ក្រោយថៅកែបិទទ្វាររោងចក្រមិនទូទាត់សំណងតាមផ្លូវច្បាប់។
ការដើរហែក្បួនរបស់កម្មករកម្មការិនីប្រហែល ២០០នាក់ដែលបម្រើការងារនៅរោចក្រ ឃែនធើរេន នៅថ្ងៃអង្គារ នេះ បានធ្វើឡើងក្រោយថៅកែបិទទ្វាររោងចក្រដោយមិនបានដោះស្រាយសំណងតាមផ្លូវច្បាប់ដល់ពួកគេ។
កម្មករផ្នែកជាងម៉ាស៊ីនដេរនៅ ឃែនធើរេន លោក ឈិម ឃន បានរៀបរាប់ថា ថៅកែរោងចក្រ ឃែនធើរេន បានបិទទ្វាររោងចក្រដោយមិនបានជូនដំណឹង និងទូទាត់ប្រាក់ឈ្នួល រួមទាំងអត្ថប្រយោជន៍ផ្សេងៗឱ្យកម្មករឡើយ។ លោកអំពាវនាវឱ្យក្រសួងជួយដោះស្រាយវិវាទការងារនេះ ដោយធ្វើយ៉ាងណាឱ្យថៅកែរោងចក្រទូទាត់សំណងតាមផ្លូវច្បាប់ ដោយថាពួកគាត់ភាគច្រើនចាស់ៗជួបការលំបាកច្រើន និងអត់មានចំណូល ខណៈអ្នកខ្លះទៀតកំពុងជាប់បំណុលធនាគារថែមទៀត។
លោក ឈិម ឃន បន្តថា បើសិនជារដ្ឋាភិបាល និងក្រសួងការងារមិនជួយដោះស្រាយទេ ពួកគាត់គ្មានប្រាក់ដើម្បីផ្គត់ផ្គង់គ្រួសារ និងសងបំណុលធនាគារឡើយ។
បើតាមក្រុមកម្មករ ឱ្យដឹងថា ញត្តិដែលក្រុមកម្មករដាក់ទៅក្រសួងការងារ កាលពីថ្ងៃទី២៣ ខែឧសភា កន្លងមក ឱ្យដឹងថា រោងចក្រ ឃែនធើរេន អីភែរឹល ខេមបូឌា (CANTERANAPPAREL Cambodia Co.,Ltd) និងរោងចក្រ ខ្វលីធី តេក្សស្ទីល (QUALITY TEXTILES) មានថៅកែតែមួយជាជនជាតិម៉ាឡេស៊ី ឈ្មោះ CHHOONG WEIPIAU ហើយបច្ចុប្បន្ននេះ រោងចក្របានបើកដំណើរការអាជីវកម្មធម្មតា។
ប្រធានសហជីពចលនាកម្មករប្រចាំរោងចក្រ ឃែនធើរេន អ្នកស្រី សាន់ សុផា ប្រាប់អ្នកសារព័ត៌មានថា ការជួបប្រជុំរកដំណោះស្រាយជុំវិញវិវាទការងារនៅព្រឹកមិញនេះមានការចូលរួមពីសំណាក់តំណាងកម្មករ តំណាងក្រសួងការងារ អាជ្ញាធរខណ្ឌពោធិ៍សែនជ័យ និងអតីតមេធាវីរោងចក្រ ឃែនធើរេន។ អ្នកស្រីបន្តថា ក្នុងកិច្ចប្រជុំនេះ គឺតំណាងក្រសួង និងអាជ្ញាធរខណ្ឌមិនបានបង្ហាញពីវិធានការ ឬចំណាត់ការបែបណាទៅលើថៅកែរោងចក្រ ដើម្បីឱ្យទទួលខុសត្រូវឡើយ ខណៈអតីតមេធាវីរោងចក្រ ឃែនធើរេន លើកឡើងថា រោងចក្រ ឃែនធើរេន និងរោងចក្រ ខ្វលីធី តេក្សស្ទីល (QUALITY TEXTILES) មិនជាប់ពាក់ព័ន្ធគ្នា និងមានថៅកែតែមួយដូចការលើកឡើងរបស់កម្មករនាពេលកន្លងមកនោះឡើយ។ អ្នកស្រីបញ្ជាក់ថា ការជួបប្រជុំនៅព្រឹកនេះគ្មានលទ្ធផលអ្វីឡើយ ដែលករណីនេះ ក្រុមកម្មករគ្រោងដាក់ពាក្យបណ្តឹងទៅតុលាការបន្តទៀត។
កាលពីថ្ងៃទី១៩ ខែមេសា ឆ្នាំ២០២២ កម្មករជាង ៣០០នាក់របស់រោងចក្រកាត់ដេរ ឃែនធើរេន អីភែរឹល (ខេមបូឌា) បាននាំគ្នាតវ៉ាបិទកំណាត់ផ្លូវវេងស្រេង អស់រយៈពេលជិត ១ម៉ោង ក្នុងសង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ដើម្បីទាមទារឱ្យថៅកែទូទាត់ប្រាក់អតីតភាពការងារ និងប្រាក់អត្ថប្រយោជន៍ផ្សេងៗតាមច្បាប់ ក្រោយពួកគេឃើញថៅកែដឹកសម្ភារផ្សេងៗចេញពីរោងចក្រដោយមិនផ្ដល់ដំណឹងដល់កម្មករ៕