31 C
Phnom Penh

លោក ទៀ បាញ់ ថា​បន្ទាប់ពី​ទំនើបកម្ម​មូលដ្ឋាន​ជើងទឹក​រាម នឹង​មិន​ឱ្យ​នរណា​ចូល​មើល​ទៀត​ទេ

ដោយ ឌឹ ខេមបូឌា ដេលី

បទវិភាគ

រដ្ឋមន្ត្រី​ក្រសួង​ការពារ​ជាតិ​កម្ពុជា លោក ទៀ បាញ់ ថ្លែង​ថា ក្រោយពី​ធ្វើ​ទំនើបកម្ម «មូលដ្ឋាន​កងទ័ព​ជើងទឹក​រាម» រួចរាល់ នោះ​នឹង​មិន​អនុញ្ញាត​ឱ្យ​នរណា​ចូល​មើល​ទៀត​ទេ ដោយសារ​ទីនោះ​ជា​មូលដ្ឋាន​ទ័ព​ដែល​មិន​អាច​បង្ហាញ​ជា​សាធារណៈ​បាន​ទេ ខណៈ​រដ្ឋមន្ត្រី​ការបរទេស​កម្ពុជា អះអាង​ថា មិន​អនុញ្ញាត​ឱ្យ​មាន​មូលដ្ឋាន ឬ​វត្តមាន​កងទ័ព​បរទេស​ណា​មួយ​នៅ​លើ​ទឹកដី​របស់​ខ្លួន​ឡើយ។

ថ្លែង​ក្នុង​ពិធី​បើក​ការដ្ឋាន​សាងសង់​រោង​ជាង​ជួសជុល​នាវា ផែ​សំចត និង​ស្ដារ​ឃ្លង​នៅ​មូលដ្ឋាន​សមុទ្រ​រាម​ខេត្ត​ព្រះសីហនុ នា​ព្រឹក​ថ្ងៃទី​៨ ខែ​មិថុនា​នេះ លោក ទៀ បាញ់ អះអាង​ថា កន្លងមក​មាន​ការ​ចោទប្រកាន់​ម្ដង​ហើយ​ម្ដង​ទៀត​ថា ការ​ធ្វើ​ទំនើបកម្ម​មូលដ្ឋាន​ទ័ព​នៅ​សមុទ្រ​រាម គឺជា​ការ​ប្រគល់​មូលដ្ឋាន​នេះ​ដល់​កងទ័ព​រំដោះ​ប្រជាជន​ចិន ប្រើប្រាស់​ផ្ដាច់មុខ។ លោក​ច្រានចោល​ការ​ចោទប្រកាន់​នេះ ដោយ​ថា​គ្មាន​មូលដ្ឋាន​ទ័ព​បរទេស​ណា​មួយ​នៅ​ទីនោះ​ទេ។

លោក​បន្ត​ថា មូលដ្ឋាន​ទ័ព​នៅ​សមុទ្រ​រាម​ជា​ដែន​អធិបតេយ្យ​របស់​កម្ពុជា។ កម្ពុជា​មាន​សិទ្ធិ​ពេញលេញ​ក្នុង​ការ​សម្រេច​ធ្វើ​ទំនើបកម្ម​តាម​លទ្ធភាព កម្រិត និង​តាម​របៀប​របស់​ខ្លួន។

រដ្ឋមន្ត្រី​ការពារ​ជាតិ​រូប​នេះ​បន្ត​ទៀត​ថា អំឡុង​ពេល​ចាប់ផ្ដើម​បើក​ការដ្ឋាន​សាងសង់​នេះ អ្នក​ដែល​ចង់​មក​មើល​មូលដ្ឋាន​កងទ័ព​ជើងទឹក​រាម គឺ​អាច​ចូល​បាន តែ​បើ​ទៅ​ថ្ងៃ​អនាគត នឹង​មិន​អនុញ្ញាត​ឱ្យ​ចូល​មើល​ទេ ព្រោះ​ការងារ​បច្ចេកទេស​យោធា​ជា​កិច្ចការ​ផ្ទៃក្នុង​ដែល​មិន​អាច​បង្ហាញ​ជា​សាធារណៈ​បាន​ទេ។

លោក វ៉ាង វិនធាន ឯកអគ្គរដ្ឋទូត​ចិន​ប្រចាំ​កម្ពុជា ថ្លែង​នៅ​ក្នុង​ពិធី​បើក​ការដ្ឋាន​សាងសង់​នៅ​ថ្ងៃទី​៨ ខែ​មិថុនា ឆ្នាំ​២០២២ ថា ចិន​ជួយ​កសាង​មូលដ្ឋាន​ទ័ព​រាម​ដោយ​គោរព​ទៅ​តាម​ច្បាប់​ប្រទេស​កម្ពុជា និង​គោរព​តាម​ច្បាប់​របស់​ប្រទេស​ចិន ហើយ​គោរព​តាម​ច្បាប់​របស់​អន្តរជាតិ។ ចិន​ក៏​គ្មាន​បំណង​គ្រប់គ្រង​ប្រទេស​ណា​មួយ​ដែរ។

មូលដ្ឋាន​កងទ័ព​ជើងទឹក​សមុទ្រ​រាម ខេត្ត​ព្រះសីហនុ ថ្ងៃទី​៨ ខែ​មិថុនា ឆ្នាំ​២០២២។

ក្នុង​ជំនួប​ជាមួយ​អ្នកស្រី Penny Wong ដែល​ទើប​តែ​ត្រូវ​បាន​តែងតាំង​ជា​រដ្ឋមន្ត្រី​ការបរទេស​អូស្ត្រាលី រដ្ឋមន្ត្រី​ការបរទេស​កម្ពុជា លោក ប្រាក់ សុខុន បាន​ច្រានចោល​ចំពោះ​ការ​ចោទប្រកាន់​អំពី​មូលដ្ឋាន​កងទ័ព​ជើងទឹក​រាម ថា​កម្ពុជា​បាន​ប្រកាន់ខ្ជាប់​នូវ​រដ្ឋធម្មនុញ្ញ​របស់​ខ្លួន​ដែល​មិន​អនុញ្ញាត​ឱ្យ​មាន​មូលដ្ឋាន ឬ​វត្តមាន​កងទ័ព​បរទេស​ណា​មួយ​នៅ​លើ​ទឹកដី​របស់​ខ្លួន​ឡើយ។

រដ្ឋមន្ត្រី​ការបរទេស និង​សហប្រតិបត្តិការ​អន្តរជាតិ​កម្ពុជា បាន​ចេញ​លិខិត​ច្រានចោល​នូវ​ការ​ចោទប្រកាន់​អំពី​មូលដ្ឋាន​កងទ័ព​ជើងទឹក​រាម កាលពី​ថ្ងៃ​៧ ខែ​មិថុនា ឆ្នាំ​២០២២ បន្ទាប់ពី​ជួប​សន្ទនា​តាម​ទូរស័ព្ទ​ជាមួយ​រដ្ឋមន្ត្រី​ការបរទេស​អូស្ត្រាលី អ្នកស្រី Penny Wong ថា​ការ​កែលំអ​មូលដ្ឋាន​កងទ័ព​ជើងទឹក​រាម ធ្វើឡើង​ដើម្បី​ពង្រឹង​សមត្ថភាព​កងទ័ព​ជើងទឹក​របស់​កម្ពុជា និង​ដើម្បី​ការពារ​បូរណភាព​ដែន​សមុទ្រ​របស់​ខ្លួន ហើយ​ប្រយុទ្ធ​ប្រឆាំង​នឹង​ឧក្រិដ្ឋកម្ម​តាម​ដែន​សមុទ្រ​ប៉ុណ្ណោះ។

រដ្ឋមន្ត្រី​ការបរទេស​កម្ពុជា​រូប​នេះ​បញ្ជាក់​ថា ប្រមុខ​រដ្ឋាភិបាល​កម្ពុជា​ក៏​បាន​ប្ដេជ្ញា​ផង​ដែរ​កាលពី​កិច្ចប្រជុំ​កំពូល​អាស៊ាន-អាមេរិក​កាលពី​ពាក់កណ្តាល​ខែ​ឧសភា កន្លងទៅ​ថា កម្ពុជា​បាន​អនុវត្ត​យ៉ាង​ម៉ឺងម៉ាត់​នូវ​បទប្បញ្ញត្តិ​នានា​នៃ​រដ្ឋធម្មនុញ្ញ​កម្ពុជា ដែល​មិន​អនុញ្ញាត​ឱ្យ​មាន​មូលដ្ឋាន​កងទ័ព​បរទេស​ណា​មួយ​នៅ​លើ​ទឹកដី​កម្ពុជា​ឡើយ ដែល​ជា​ការ​ឆ្លើយតប​ទៅ​នឹង​កង្វល់​នានា​ពាក់ព័ន្ធ​នឹង​មូលដ្ឋាន​កងទ័ព​ជើងទឹក​រាម​នេះ។

ការ​អះអាង​នេះ ធ្វើឡើង​ស្រប​ពេល​ដែល​កម្ពុជា​ត្រូវ​បាន​គេ​សង្ស័យ​ថា​បាន​ផ្តល់​មូលដ្ឋាន​កងទ័ព​ជើងទឹក​រាម ឱ្យ​កងទ័ព​ចិន ធ្វើជា​មូលដ្ឋាន​យោធា​ក្នុង​កិច្ចសន្យា​សម្ងាត់​មួយ​ដែល​មាន​រយៈពេល ៣០​ឆ្នាំ​កាលពី​ពេល​កន្លងទៅ​នេះ។

អនុប្រធាន​វេទិកា​ពលរដ្ឋ លោក ម៉ែន ណាត ប្រាប់​សារព័ត៌មាន The Cambodia Daily នៅ​ថ្ងៃ​ទី​៨ មិថុនា ថា ប្រទេស​អូស្ត្រាលី​ក៏​មាន​ការ​ព្រួយបារម្ភ​ពី​បញ្ហា​នេះ​យ៉ាង​ខ្លាំង​ដែរ ព្រោះ​ថា​បើ​កម្ពុជា​លួច​ឃុបឃិត​ជាមួយ​ចិន​ឱ្យ​ដាក់​កងទ័ព​នៅ​តំបន់​រាម​មែន​នោះ នឹង​បង្ក​ការ​គំរាមកំហែង​ដល់​ដែន​អធិបតេយ្យ​របស់​អូស្ត្រាលី​យ៉ាង​ធ្ងន់ធ្ងរ ព្រោះ​ថា​ទំនាក់ទំនង​កម្ពុជា​ជាមួយ​ចិន​បច្ចុប្បន្ន​នេះ ទាំង​ទំនាក់ទំនង​ការទូត និង​ទំនាក់ទំនង​ផ្ទាល់​រវាង​មេដឹកនាំ និង​មេដឹកនាំ សុទ្ធតែ​បង្ហាញ​ភាព​ស្អិតល្មួត​លើស​ពី​ទំនាក់ទំនង​រវាង​រដ្ឋ​មួយ​ជាមួយ​នឹង​រដ្ឋ​មួយ​ទៀត។

អនុប្រធាន​វេទិកា​ពលរដ្ឋ​រូប​នេះ​បញ្ជាក់​ថា គេ​នៅតែ​មិន​អាច​ដឹង​ច្បាស់​ទេ​ថា​ជនជាតិ​ចិន​ដែល​សម្រុក​ចូល​ទៅ​ធ្វើ​ពាណិជ្ជកម្ម​រាប់​សិប​ម៉ឺន​នាក់​នៅ​កម្ពុជា​សព្វថ្ងៃ​នេះ ជា​ពាណិជ្ជករ​ធម្មតា ឬ​ជា​កងទ័ព ឬ​ជា​ចារកម្ម​របស់​រដ្ឋាភិបាល​ចិន​នោះ​ឡើយ។

ស្រប​ពេល​ដែល​កម្ពុជា​សុខចិត្ត​វាយកម្ទេច​អគារ​ដែល​ឧបត្ថម្ភ​ដោយ​សហរដ្ឋ​អាមេរិក តែ​បែរ​ជា​ជំនួស​ដោយ​អគារ​ដែល​សាងសង់​ក្រោម​ជំនួយ​របស់​ចិន​នៅ​ពេលនេះ ដែល​បញ្ហា​ទាំងនេះ​គឺ​សុទ្ធសឹងតែ​ជា​ចំណុច​សង្ស័យ​ទាំងអស់​ជុំវិញ​បញ្ហា​កងទ័ព​ជើងទឹក​ចិន​នៅ​តំបន់​រាម​នេះ។

ជុំវិញ​បញ្ហា​នេះ កាលពី​ឆ្នាំ​២០១៩ កាសែត​អាមេរិក The Wall Street Journal បាន​ចុះផ្សាយ​ថា កម្ពុជា និង​ចិន បាន​ចុះហត្ថលេខា​ជា​សម្ងាត់​លើ​កិច្ចព្រមព្រៀង​មួយ​ដែល​អនុញ្ញាត​ឱ្យ​ចិន​មាន​សិទ្ធិ​ផ្ដាច់មុខ​ចូល​ទៅ​ប្រើប្រាស់​មូលដ្ឋាន​កងទ័ព​ជើងទឹក​រាម​ក្នុង​រយៈពេល ៣០​ឆ្នាំ ដោយ​អាច​បន្ត​ឡើងវិញ​នៅ​រៀងរាល់ ១០​ឆ្នាំ​ម្ដង៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស