តុលាការបានដោះលែងអតីតស្នងការរងខេត្តកណ្តាល លោក ស្រេង សុខា ភ្លាមៗវិញបន្ទាប់ពីសាលាឧទ្ធរណ៍បានចេញដីកាបង្គាប់ឱ្យបញ្ឈប់ការតាមចាប់ខ្លួន។
កាលពីថ្ងៃទី១២ ខែមិថុនា ឆ្នាំ២០២២ សមត្ថកិច្ចខេត្តកណ្ដាល បានចាប់ខ្លួនលោក ស្រេង សុខា ហៅ ទ្រី មកដាក់ពន្ធនាគារ ប៉ុន្តែការចាប់ខ្លួនយកទៅពន្ធនាគារខេត្តកណ្តាល បានមួយភ្លែត ហើយលោកក៏ត្រូវបានសមត្ថកិច្ចដោះលែងវិញ បន្ទាប់ពីសាលាឧទ្ធរណ៍បានចេញដីកាបង្គាប់ឱ្យបញ្ឈប់ការតាមចាប់ខ្លួន។
លោក ស្រេង សុខា ត្រូវចៅក្រមសាលាដំបូងខេត្តកណ្ដាល បានសម្រេចផ្ដន្ទាទោសដាក់ពន្ធនាគារជាង ១ឆ្នាំកាលថ្ងៃទី២៩ ខែវិច្ឆិកា ឆ្នាំ២០២១ ករណីប្រព្រឹត្តអំពើហិង្សាលើអ្នកកាន់កាប់អចលនវត្ថុដោយសុចរិត នៅភូមិកោះគរ សង្កាត់រកាខ្ពស់ ក្រុងតាខ្មៅ ខេត្តកណ្តាល កាលពីខែកក្កដា ឆ្នាំ២០២០។ ក្រៅពីផ្ដន្ទាទោសហើយ តុលាការក៏បានចេញដីកាបង្គាប់ឱ្យសមត្ថកិច្ចតាមចាប់ខ្លួនលោក ស្រេង សុខា ដើម្បីយកទៅឃុំក្នុងពន្ធនាគារតាមកាលកំណត់របស់ច្បាប់។
ប៉ុន្តែចាប់តាំងពីចៅក្រមសាលាដំបូងខេត្តកណ្ដាល ប្រកាសសាលក្រមកាលពីខែវិច្ឆិកា ឆ្នាំ២០២១ ដល់ថ្ងៃទី១៣ ខែមិថុនា ឆ្នាំ២០២២ លោក ស្រេង សុខា ពុំបានជាប់ឃុំក្នុងពន្ធនាគារនោះទេ។
កាលពីខែមេសា ឆ្នាំ២០២០ រដ្ឋមន្ត្រីក្រសួងមហាផ្ទៃ លោក ស ខេង បានសម្រេចដកតំណែងលោក ស្រេង សុខា ចេញពីស្នងការរងខេត្តកណ្តាល ដែលមានឋានន្តរស័ក្តិជាឧត្តមសេនីយ៍ត្រី (ផ្កាយ១) ដោយថាអតីតស្នងការរងរូបនេះបានធ្វើខុសវិន័យ។
យ៉ាងណាក៏ដោយ កាលពីថ្ងៃទី២៧ ខែកុម្ភៈ ឆ្នាំ២០១៩ អង្គភាពប្រឆាំងអំពើពុករលួយ ហៅកាត់ថា ACU បានប្រកាសបើកការស៊ើបអង្កេតទ្រព្យសម្បត្តិស្នងការរងខេត្តកណ្ដាល លោក ស្រេង សុខា ក្រោយពីមានព័ត៌មានចែករំលែកតាមបណ្ដាញសង្គមហ្វេសប៊ុកករណីស្នងការរងរូបនេះបានភ្ជាប់ពាក្យជាមួយស្ត្រីម្នាក់ និងបានជូនថ្លៃបណ្ណាការចំនួន ១០ម៉ឺនដុល្លារ ចិញ្ចៀនពេជ្រ និងរថយន្តលុច្សស៊ីស ៥៧០ (Luxus 570) មួយគ្រឿងដែលមានតម្លៃ ២២ម៉ឺនដុល្លារ។
ការស៊ើបអង្កេតរបស់អង្គភាពប្រឆាំងអំពើពុករលួយ បន្ទាប់ពីរងការរិះគន់ពីអ្នកប្រើប្រាស់បណ្ដាញសង្គមពាក់ព័ន្ធនឹងការជូនថ្លៃបណ្ណាការដល់ខាងស្រីក្នុងថ្ងៃភ្ជាប់ពាក្យរាប់ម៉ឺនដុល្លារ ប៉ុន្តែក្រោយពីបើកការស៊ើបអង្កេតរួច ប្រធានអង្គភាពប្រឆាំងអំពើពុករលួយ លោក ឱម យ៉ិនទៀង បានប្រកាសជាសាធារណៈថា ករណីលោក ស្រេង សុខា មិនជាប់ពាក់ព័ន្ធនឹងរឿងអំពើពុករលួយឡើយ៕