ពលរដ្ឋដែលរស់នៅឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី បានរកឃើញសកម្មភាពដឹកជញ្ជូនឈើតាមម៉ូតូយកទៅលក់នៅប្រទេសវៀតណាម ទាំងយប់ទាំងថ្ងៃយ៉ាងអានាធិបតេយ្យ ក្រោយការបោះឆ្នោតឃុំ-សង្កាត់បានបញ្ចប់ ដោយពុំឃើញមានអាជ្ញាធរណាមួយហ៊ានចេញមុខធ្វើការទប់ស្កាត់នោះឡើយ។
ពលរដ្ឋរស់នៅភូមិឡំ បានប្រាប់សារព័ត៌មាន ឌឹ ខេមបូឌា ដេលី ក្នុងលក្ខខណ្ឌមិនបញ្ចេញឈ្មោះថា មានសកម្មភាពដឹកឈើប្រភេទសុក្រំ និងស្រឡៅ តាមម៉ូតូចំនួន ១០០គ្រឿងក្នុងមួយថ្ងៃយកទៅលក់នៅប្រទេសវៀតណាម ក្នុងតម្លៃមួយគីឡូក្រាម ៤០០រៀល ដោយមានការសម្របសម្រួលពីមន្ត្រីការពារព្រំដែនអូរក្រម៉ា។
ពលរដ្ឋដដែលបន្ថែមទៀតថា រូបលោកគ្មានអំណាចណាមួយអាចទៅទប់ស្កាត់បាននោះទេ ក្រៅតែពីពាក្យសោកស្ដាយព្រៃឈើខ្មែរដែលកំពុងតែបាត់បង់។ លោកបន្តថា សូម្បីរូបលោកផ្ទាល់ក៏ធ្លាប់ត្រូវបានគេគំរាមកំហែងចាប់ដាក់គុកថែមទៀតផង។
សកម្មជនការពារព្រៃឈើដែលធ្វើការលើបញ្ហានេះ លោក ហេង ស្រស់ បានប្រាប់ ឌឹ ខេមបូឌា ដេលី ថា នៅខេត្តរតនគិរី មានស្រុកចំនួនពីរដែលកំពុងតែមមាញឹកខ្លាំងក្នុងការរត់ពន្ធឈើឆ្លងដែនទៅក្រៅប្រទេស ក្នុងនោះមានស្រុកអូរយ៉ាដាវ និងស្រុកអណ្ដូងមាស។
លោកថា នេះមិនមែនជាលើកទីមួយទេដែលខេត្តមួយនេះបើកឲ្យមានការរកស៊ីឈើតាមបន្ទាត់ព្រំដែនកម្ពុជា-វៀតណាម។ លោកថា នៅចុងឆ្នាំ២០១៨ ខេត្តរតនគិរី ធ្លាប់មានរឿងអាស្រូវនាំឈើខុសច្បាប់ម្ដងរួចមកហើយ ដោយសមត្ថកិច្ចជំនាញនៅតំបន់នោះបានឃុបឃិតគ្នាលក់ព្រៃសហគមន៍ឲ្យទៅឈ្មួញវៀតណាម។
សារព័ត៌មាន ឌឹ ខេមបូឌា ដេលី នៅមិនទាន់អាចសុំការបំភ្លឺពីមន្ត្រីការពារព្រំដែនគោកអូរក្រម៉ា បាននៅឡើយទេរហូតមកដល់ម៉ោងផ្សាយនេះ។
ប្រជាសហគមន៍ជនជាតិដើមភាគតិចចារ៉ាយ បានសម្ដែងការសោកស្ដាយដែលអាជ្ញាធរភូមិ-ឃុំ មិនបានចូលរួមទប់ស្កាត់ ប៉ុន្តែបែរជានាំគ្នាដាក់ប៉ុស្តិ៍អង្គុយចាំយកលុយពីអ្នកដឹកឈើទៅវិញ។
ព្រៃសហគមន៍ «តូម» ស្ថិតក្នុងឃុំប៉ក់ញ៉ៃ ស្រុកអូរយ៉ាដាវ មានទំហំប្រមាណ ៧០០ហិកតារ កំពុងរងការកាប់បំផ្លាញ់ពីសំណាក់ក្រុមឈ្មួញខ្មែរ។ ព្រៃសហគមន៍នេះត្រូវបានអាស្រ័យផលដោយជនជាតិដើមភាគតិចចារ៉ាយ ចាប់តាំងពីឆ្នាំ១៩៩៣ មកម្ល៉េះ។
ថ្លែងក្នុងសន្និបាតបូកសរុបលទ្ធផលការងារឆ្នាំ២០២១ នៅខេត្តបាត់ដំបង កាលពីថ្ងៃទី១០ ខែមីនា ឆ្នាំ២០២២ លោក ស ខេង រដ្ឋមន្ត្រីក្រសួងមហាផ្ទៃ ធ្លាប់អះអាងថា កម្ពុជាបានបាត់បង់ព្រៃឈើយ៉ាងគំហុកនាពេលបច្ចុប្បន្ន។ លោកបន្តថា កាលពីដើមឡើយ កម្ពុជាសម្បូរព្រៃឈើហូរហៀរ មើលមេឃមើលថ្ងៃមិនឃើញផង តែឥឡូវរកកន្លែងជ្រកបាំងថ្ងៃសឹងតែមិនបាន។
កាលពីថ្ងៃទី២៨ ខែមករា ឆ្នាំ២០២២ អង្គការលើកលែងទោសអន្តរជាតិ បង្ហាញរបាយការណ៍ថ្មីមួយថា នៅក្នុងឆ្នាំ២០២១ នេះ ព្រៃឈើជាង ៦ពាន់ហិកតារក្នុងដែនជម្រកសត្វព្រៃចំនួនពីរនៅកម្ពុជា ត្រូវបានបំផ្លាញដោយសារដៃរបស់ក្រុមមន្ត្រីពុករលួយ។ អង្គការនេះបានចោទប្រកាន់ទៅលើអាជ្ញាធរពាក់ព័ន្ធ ជាពិសេសមន្ត្រីក្រសួងបរិស្ថាន ថាមិនបានអើពើ និងមិនខ្វល់ចំពោះការរាយការណ៍របស់ប្រជាពលរដ្ឋពាក់ព័ន្ធបទល្មើស។
នៅក្នុងវិស័យព្រៃឈើនេះ កម្ពុជាក៏បានបាត់បង់ការគាំទ្រពីទីភ្នាក់ងារសហរដ្ឋអាមេរិកសម្រាប់អភិវឌ្ឍន៍អន្តរជាតិ (USAID) នៅក្នុងការអនុវត្តគម្រោង «ព្រៃឡង់បៃតង» នៅតំបន់ដែនជម្រកសត្វព្រៃឡង់ ដែលមានរយៈពេល ៥ឆ្នាំ ចាប់ពីឆ្នាំ២០១៨ ដល់ឆ្នាំ២០២៣ ដោយមានទឹកប្រាក់ប្រមាណ ២១លានដុល្លារអាមេរិក៕