អនុប្រធានគណបក្សប្រជាជនកម្ពុជា និងជាប្រធានសមាគមមិត្តភាពកម្ពុជា-វៀតណាម អ្នកស្រី ម៉ែន សំអន អះអាងថា រយៈពេល ៥៥ឆ្នាំមកនេះ កម្ពុជាតែងតែចាត់ទុកវៀតណាម ជាមិត្តជិតស្និទ្ធ ហើយជាអ្នកជិតខាងល្អ និងស្មោះត្រង់ផងដែរ។
ការអះអាងនេះ ធ្វើឡើងបន្ទាប់ពីរដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ចនៃព្រះរាជាណាចក្រកម្ពុជា ជាអនុប្រធានគណបក្សប្រជាជនកម្ពុជា ផង និងជាប្រធានសមាគមមិត្តភាពកម្ពុជា-វៀតណាម ផង គឺអ្នកស្រី ម៉ែន សំអន ទៅចូលរួមក្នុងពិធីរំឭកខួបលើកទី៥៥ នៃការបង្កើតទំនាក់ទំនងការទូតវៀតណាម-កម្ពុជា ដែលរៀបចំនៅទីក្រុងហាណូយ ប្រទេសវៀតណាម កាលពីថ្ងៃទី២៤ ខែមិថុនា ឆ្នាំ២០២២។
តាមហ្វេសប៊ុកស្ថានទូតវៀតណាម ប្រចាំកម្ពុជា ថាក្នុងពិធីនោះ អ្នកស្រី ម៉ែន សំអន បាននិយាយថា កម្ពុជា-វៀតណាម បានកសាងចំណងមិត្តភាព កិច្ចសហប្រតិបត្តិការជាប្រពៃណីដ៏រឹងមាំ និងកិច្ចសហប្រតិបត្តិការរួមក្នុងនាមជាបងប្អូន មិត្តរួមក្រុម អ្នកជិតខាង និងសម្រេចបានជោគជ័យដ៏ធំធេងជាច្រើនក្នុងកិច្ចសហប្រតិបត្តិការលើគ្រប់វិស័យ។ អ្នកស្រីបន្តថា ក្នុងរយៈពេល ៥៥ឆ្នាំកន្លងមកនេះ កម្ពុជា-វៀតណាម តែងតែជាមិត្តជិតស្និទ្ធ ជាអ្នកជិតខាងល្អ និងស្មោះត្រង់។
ការអះអាងរបស់អ្នកស្រី ម៉ែន សំអន ឆ្លើយតបនឹងឧបនាយករដ្ឋមន្ត្រី លោក Le Minh Khai ដែលស្នើឱ្យរដ្ឋាភិបាលកម្ពុជាដឹកនាំដោយលោក ហ៊ុន សែន ពង្រឹងទំនាក់ទំនងនៃប្រទេសទាំងពីរ ដោយថាកម្ពុជា-វៀតណាមជាមិត្តល្អ អ្នកជិតខាងល្អ និងស្មោះត្រង់។
នាយករដ្ឋមន្ត្រីវៀតណាម លោក ផាម មិញជីញ (Pham Minh Chinh) ក្នុងពិធីប្រារព្ធ «ខួបលើកទី៤៥ នៃទិវានៃការចងចាំដំណើរឆ្ពោះទៅការផ្ដួលរំលំរបបប្រល័យពូជសាសន៍ ប៉ុល ពត ២០ មិថុនា ឆ្នាំ១៩៧៧-២០ មិថុនា ឆ្នាំ២០២២» លើទឹកដីកម្ពុជា ខេត្តត្បូងឃ្មុំ ក្នុងសុន្ទរកថាជិត ១ម៉ោង បានលើកឡើងថា វៀតណាមជាប្រទេសជិតខាងកម្ពុជាដែលមានទំនាក់ទំនងជិតស្និទ្ធ និងយូរអង្វែងជាមួយកម្ពុជា ហើយប្រទេសទាំងពីរចេះជួយគ្នាក្នុងគ្រាលំបាកទៅវិញទៅមក ជាពិសេសការរួមគ្នាប្រឆាំងរបបអាណានិគមចាប់តាំងពីឆ្នាំ១៩៤៥ មក។
បើតាមស្ថានទូតវៀតណាម បញ្ជាក់ថា រដ្ឋាភិបាលនៃប្រទេសទាំងពីរក៏បានបង្កភាពងាយស្រួលដល់ពលរដ្ឋកម្ពុជា-វៀតណាម ដែលរស់នៅលើទឹកដីរបស់ខ្លួនឱ្យស្របតាមច្បាប់ផងដែរ។
យ៉ាងណាក៏ដោយ ការអះអាងនេះត្រូវបានអ្នកឃ្លាំមើលចាត់ទុកថាមិនបានឆ្លុះបញ្ចាំងពីការពិតឡើយ ព្រោះវៀតណាម មិនដែលមានភាពស្មោះត្រង់នឹងកម្ពុជានោះទេ ជាពិសេសរឿងទឹកដី និងការហូរចូលនៃជនជាតិវៀតណាមចូលកម្ពុជា។
មេដឹកនាំវៀតណាម តែងតែស្នើសុំឱ្យរដ្ឋាភិបាលកម្ពុជាជួយផ្ដល់ភាពស្របច្បាប់ដល់ពលរដ្ឋវៀតណាម ដែលកំពុងរស់នៅកម្ពុជាដោយខុសច្បាប់ ខណៈដែលវៀតណាមតែងតែធ្វើទុក្ខបុកម្នេញ និងចាប់ខ្លួននៅពេលដែលយុវជន និងព្រះសង្ឃ រួមទាំងពលរដ្ឋខ្មែរក្រោមនៅពេលដែលពួកគេនាំគ្នាសិក្សា និងឈ្វេងយល់ពីសិទ្ធិសេរីភាព និងវប្បធម៌របស់ខ្លួននោះ៕