32 C
Phnom Penh

រដ្ឋបាល​ខេត្ត​សៀមរាប​ស្នើ​អាជ្ញាធរ​អប្សរា​ផ្អាក​សកម្មភាព​រុះរើ​សំណង់​ពលរដ្ឋ

ដោយ ឌឹ ខេមបូឌា ដេលី

បទវិភាគ

រដ្ឋបាល​ខេត្ត​សៀមរាប ស្នើ​ទៅ​ថ្នាក់ដឹកនាំ​អាជ្ញាធរ​ជាតិ​អប្សរា ផ្អាក​ជា​បណ្ដោះអាសន្ន​នូវ​សកម្មភាព​រុះរើ​សំណង់​របស់​ពលរដ្ឋ​ក្នុង​តំបន់​១ និង​តំបន់​២ ដើម្បី​ពិភាក្សា និង​ដោះស្រាយ​ចំពោះ​សំណង់​ខុស​ច្បាប់ និង​បញ្ហា​ដីធ្លី​ក្នុង​តំបន់​រមណីយដ្ឋាន​អង្គរ។

អភិបាល​រង​ខេត្ត​សៀមរាប លោក ប្រាក់ សោភ័ណ្ឌ បាន​ចេញ​លិខិត​ស្ដីពី​ការ​សុំ​ផ្អាក​នូវ​សកម្មភាព​រុះរើ​សំណង់​ក្នុង​តំបន់​រមណីយដ្ឋាន​អង្គរ​ទៅ​កាន់​អាជ្ញាធរ​ជាតិ​អប្សរា កាលពី​ថ្ងៃទី​២៧ ខែ​មិថុនា ឆ្នាំ​២០២២ ថា កន្លងមក​បញ្ហា​សំណង់​ដែល​ពលរដ្ឋ​បាន​សាងសង់​ក្នុង​តំបន់​១ និង​តំបន់​២ នៃ​តំបន់​រមណីយដ្ឋាន​អង្គរ គឺ​ត្រូវតែ​ពិភាក្សា​ក្នុង​គណៈកម្មាធិការ​ចម្រុះ ដើម្បី​សម្របសម្រួល និង​ដោះស្រាយ​រវាង​រដ្ឋបាល​ខេត្ត និង​អាជ្ញាធរ​ជាតិ​អប្សរា។

លោក ប្រាក់ សោភ័ណ្ឌ លើកឡើង​ថា ក្នុង​អំឡុង​មុន​ពេល និង​ក្រោយ​បោះឆ្នោត​ជ្រើសរើស​ក្រុមប្រឹក្សា​ឃុំ-សង្កាត់​អាណត្តិ​ទី​៥ ឆ្នាំ​២០២២ នេះ អាជ្ញាធរ​ជាតិ​អប្សរា​បាន​ចុះ​អនុវត្ត​ការងារ​ដោយ​គ្មាន​ការ​ពិភាក្សា​គ្នា​ឱ្យ​បាន​ច្បាស់លាស់​ក្នុង​កិច្ចប្រជុំ​គណៈកម្មាធិការ​ចម្រុះ ដើម្បី​ទប់ស្កាត់​សំណង់​ខុស​ច្បាប់​ឈាន​ទៅ​រៀបចំ​សណ្ដាប់ធ្នាប់​ក្នុង​តំបន់​រមណីយដ្ឋាន​អង្គរ​នោះ​ទេ។

រដ្ឋបាល​ខេត្ត​សៀមរាប បញ្ជាក់​ថា ដើម្បី​អនុវត្ត​កិច្ចការ​នេះ​ប្រកប​ដោយ​តម្លាភាព និង​ស្រប​តាម​ការ​ណែនាំ​របស់​រដ្ឋាភិបាល​កម្ពុជា ក៏ដូចជា​ច្បាប់ និង​លិខិត​បទដ្ឋាន​គតិយុត្តិ​ជា​ធរមាន រដ្ឋបាល​ខេត្ត​ស្នើ​ថ្នាក់​ដឹកនាំ​អាជ្ញាធរ​ជាតិ​អប្សរា​ផ្អាក​បណ្ដោះអាសន្ន​នូវ​សកម្មភាព​រុះរើ​សំណង់​របស់​ប្រជាពលរដ្ឋ​ក្នុង​តំបន់​១ និង​តំបន់​២ សិន ដើម្បី​ពិភាក្សា និង​ដោះស្រាយ​ចំពោះ​សំណង់​ខុស​ច្បាប់ និង​បញ្ហា​ដីធ្លី​ក្នុង​តំបន់​រមណីយដ្ឋាន​អង្គរ និង​តំបន់​ដទៃ​ទៀត​ដែល​ស្ថិត​ក្រោម​ការ​គ្រប់គ្រង​របស់​អាជ្ញាធរ​ជាតិ​អប្សរា​ក្នុង​ពេល​បច្ចុប្បន្ន​នេះ។

ការ​ចេញ​លិខិត​នេះ ធ្វើឡើង​បន្ទាប់ពី​អាជ្ញាធរ​ជាតិ​អប្សរា​បាន​ចុះ​អនុវត្ត​រុះរើ​សំណង់​ដែល​ប្រជាពលរដ្ឋ​បាន​សាងសង់​ក្នុង​តំបន់​រមណីយដ្ឋាន​អង្គរ​ដោយ​មិន​មាន​ការ​ឯកភាព​ពី​រដ្ឋបាល​ខេត្ត​សៀមរាប កាលពី​ពេល​កន្លង​ទៅ​នោះ។

កាលពី​ចុងខែ​មេសា ឆ្នាំ​២០២២ អាជ្ញាធរ​ជាតិ​អប្សរា​បាន​បង្ហាញ​របាយការណ៍​របស់​ខ្លួន​ថា បច្ចុប្បន្ន​នេះ តំបន់​រមណីយដ្ឋាន​អង្គរ​មាន​ប្រជាពលរដ្ឋ​រស់នៅ​ប្រមាណ​ជា ១​ពាន់​គ្រួសារ ក្នុង​នោះ​ក្រុង​សៀមរាប មាន ២៩០​គ្រួសារ ស្រុក​ប្រាសាទបាគង មាន ១៩៦​គ្រួសារ ស្រុក​បន្ទាយស្រី មាន ២០២​គ្រួសារ ស្រុក​ពួក មាន ១៩៣​គ្រួសារ និង​ស្រុក​អង្គរធំ មាន ១២៣​គ្រួសារ​ផង​ដែរ។

ទាក់ទិន​នឹង​បញ្ហា​នេះ អគ្គនាយករង និង​ជា​អ្នក​នាំពាក្យ​នៃ​អាជ្ញាធរ​ជាតិ​អប្សរា លោក ឡុង កុសល ត្រូវ​សារព័ត៌មាន​ថ្មីៗ​ស្រង់​សម្ដី​កាលពី​អំឡុង​ខែ​ឧសភា ឆ្នាំ​២០២២ ថា ក្នុង​ត្រីមាស​ទី​១ នៃ​ឆ្នាំ​២០២២ នេះ​មាន​ពលរដ្ឋ​ជិត ១​ពាន់​គ្រួសារ​ហើយ​ដែល​បាន​ស្នើសុំ​សាងសង់​លំនៅឋាន និង​សំណង់​នានា​នៅ​ក្នុង​តំបន់​រមណីយដ្ឋាន​អង្គរ ក្នុង​នោះ​ក្រុម​ការងារ​នៃ​អាជ្ញាធរ​ជាតិ​អប្សរា​បាន​ចុះ​ទៅ​ពិនិត្យ​គ្រប់​ករណី ដើម្បី​ធានា​ការ​សាងសង់​ស្រប​តាម​ការ​អនុញ្ញាត​របស់​អាជ្ញាធរ​ជាតិ​អប្សរា ប៉ុន្តែ​លោក ឡុង កុសល មិន​បាន​បញ្ជាក់​ថា​ការ​សម្រេច​នេះ​មាន​ការ​ឯកភាព​ពី​រដ្ឋបាល​ខេត្ត​សៀមរាប ឬ​ក៏​អត់​នោះ​ទេ។

ពលរដ្ឋ​ដែល​រស់នៅ​ក្នុង​ភូមិ​ព្រៃគុយ ឃុំ​អំពិល ស្រុក​ប្រាសាទបាគង ខេត្ត​សៀមរាប បាន​ប្រាប់​សារព័ត៌មាន The Cambodia Daily ក្នុង​លក្ខខណ្ឌ​មិន​បញ្ចេញ​ឈ្មោះ​កាលពី​ពេល​ថ្មីៗ​នេះ​ថា ការ​ចុះ​រុះរើ​សំណង់​ពី​សំណាក់​អាជ្ញាធរ​ជាតិ​អប្សរា​ដែល​ប្រជាពលរដ្ឋ​សាងសង់ ដែល​គេ​ចាត់ទុក​ថា​ស្ថិត​ក្នុង​តំបន់​អប្សរា បាន​ធ្វើ​ឱ្យ​ប្រជាពលរដ្ឋ​ដែល​បាន​តាំង​ទីលំនៅ​រាប់​សិប​ឆ្នាំ​ក្នុង​ទីតាំង​ដី​ដែល​ជា​កម្មសិទ្ធិ​របស់​ខ្លួន​នោះ បាន​រង​នូវ​ការ​ចាប់​ឃុំ​ខ្លួន និង​ការ​បណ្តេញ​ពី​លំនៅឋាន​យ៉ាង​ព្រៃផ្សៃ។

ប្រភព​ដដែល​អះអាង​ថា ការ​អនុវត្ត​ចុះ​រុះរើ​របស់​អាជ្ញាធរ​អប្សរា​នេះ ធ្វើឡើង​ដោយ​គ្មាន​តម្លាភាព​នោះ​ទេ ព្រោះ​ថា​ប្រជាពលរដ្ឋ​ដែល​រស់នៅ​ភូមិ​ព្រៃគុយ ខ្លះ​ដែល​មាន​ដី​ចំនួន ២​ឡូត៍​ជាប់​គ្នា ត្រូវ​បាន​អាជ្ញាធរ​អប្សរា​ចែក​ឱ្យ​កាន់កាប់​មួយ​ឡូត៍​ធ្វើជា​កម្មសិទ្ធិ និង​មួយ​ឡូត៍​ទៀត​ត្រូវ​អាជ្ញាធរ​អប្សរា​ដកហូត​ក្រោម​ហេតុផល​ថា ស្ថិត​ក្នុង​តំបន់​គ្រប់គ្រង​ដោយ​អាជ្ញាធរ​ជាតិ​អប្សរា​ទៅវិញ។

តំបន់​១ និង​តំបន់​២ នៃ​រមណីយដ្ឋាន​អង្គរ ត្រូវ​បាន​កំណត់​ក្នុង​ព្រះរាជក្រឹត្យ​លេខ​០០១​នស ទុក​ជា​តំបន់​ដែល​ត្រូវ​ការពារ​ក្នុង​កម្រិត​ខ្ពស់​បំផុត ព្រោះ​ថា​តំបន់​ទាំង​ពីរ​នេះ​បាន​ក្រាល​គ្របដណ្ដប់​ដោយ​ប្រាសាទ​បុរាណ​នានា និង​សំណល់​បុរាណវិទ្យា​ជាច្រើន​ទៀត​ផង​ដែរ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស