សង្គមស៊ីវិលទាមទារឱ្យរដ្ឋាភិបាលជំរុញឱ្យស្ត្រីបានចូលរួមប្រឡូកក្នុងកិច្ចការដឹកនាំនយោបាយឲ្យកាន់តែច្រើន ដោយគ្មានការរើសអើង ខណៈវត្តមានស្ត្រីចូលរួមក្នុងកិច្ចការនយោបាយនៅតែមានតិចតួចនៅឡើយ។
ថ្លែងនៅក្នុងសន្និសីទសារព័ត៌មានរបស់ក្រុមសង្គមស៊ីវិលដែលមានអង្គការខុមហ្វ្រែល អង្គការសីលការកម្ពុជា ហ្គេតស៊ី អ្នកសម្របសម្រួលកម្មវិធីអប់រំ និងយេនឌ័រនៃគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា (Comfrel) អ្នកស្រី សឺនកេត សិរីលក្ខណ៍ ថ្លែងថា គម្លាតរវាងបុរស និងស្ត្រីនៅតែមានទំហំធំ ហើយរឿងនេះនៅតែជាកង្វល់ដែលទាមទារឱ្យមានការគិតគូរបន្ថែម។
អ្នកស្រីថា រដ្ឋាភិបាលក្នុងនាមជាអ្នកដឹកនាំ ត្រូវតែមានការប្ដេជ្ញាខ្ពស់បង្កើនឆន្ទៈនយោបាយគាំទ្រស្ត្រីឱ្យមានប្រសិទ្ធភាព ដូចជាធ្វើវិសោធនកម្មច្បាប់ស្ដីពីការបោះឆ្នោតដើម្បីឱ្យស្ត្រីបានចូលរួមក្នុងកិច្ចការដឹកនាំ និងបេក្ខភាពឈរឈ្មោះក្នុងបក្សនយោបាយ ជាដើម។ ក្រៅពីនោះ ត្រូវតែប្រាកដថា ពួកគេទទួលបានសិទ្ធិអំណាចពេញលេញក្រោយបានកាន់តំណែង ដោយគ្មានការរើសអើង ឬប្រកាន់ភេទ។
អ្នកស្រីបានថ្លែងឲ្យដឹងបន្តទៀតថា នៅជិតដល់ការបោះឆ្នោត លោកនាយករដ្ឋមន្ត្រី ហ៊ុន សែន តែងតែស្នើ និងប្រកាសទៅបក្សនយោបាយឱ្យដាក់ស្ត្រីឱ្យបានច្រើននៅលេខរៀងចន្លោះពីទី១ ដល់ទី៣ ដោយថាធ្វើយ៉ាងណាឱ្យមានបរិមាណស្ត្រីចូលរួមកុះករ។ អ្នកស្រីថា ដើម្បីឱ្យការប្ដេជ្ញា និងការអនុវត្តស៊ីសង្វាក់គ្នាទៅនឹងការប្រកាសនោះ លុះណាតែរដ្ឋាភិបាលមានឆន្ទៈនយោបាយពិតប្រាកដ។
អ្នកនាំពាក្យគណបក្សកាន់អំណាច លោក ឈឹម ផលវរុណ បានប្រាប់សារព័ត៌មានក្នុងស្រុកថា ការលើកឡើងរបស់អង្គការសង្គមស៊ីវិលជាការបញ្ចេញមតិឱ្យតែពីរោះស្តាប់ ដោយគ្មានការទទួលខុសត្រូវ។ លោកថា មិនមែនជាហេតុផលដែលគណបក្សត្រូវរុញឱ្យនារីឈរឈ្មោះទេ ពោលគឺអាស្រ័យលើការស្ម័គ្រចិត្ត និងស្ថានភាពរបស់នារី ហើយនិងគោលនយោបាយនារី និងយេនឌ័រ ទើបជារឿងសំខាន់។
បើតាមសង្គមស៊ីវិល ចំនួនស្ត្រីជាប់ជាមេឃុំ-ចៅសង្កាត់នៅក្នុងអាណត្តិទី៥ នេះ មានចំនួន ១៧៣នាក់ (១០,៥%) ពោលគឺកើនឡើង ៣២នាក់ (ឬស្មើ ២%) បើធៀបនឹងអាណត្តិទី៤ ឆ្នាំ២០១៧ ដែលមានចំនួន ១៤១នាក់ ស្មើនឹង ៨,៥% (ចុងអាណត្តិ)។ ស្ត្រីជាប់ជាក្រុមប្រឹក្សាឃុំ-សង្កាត់មានចំនួន ២៥៦២នាក់ ស្មើនឹង ២២% នៃចំនួនក្រុមប្រឹក្សាឃុំ-សង្កាត់សរុប ១១៦២២នាក់។
បើធៀបនឹងអាណត្តិទី៤ ឆ្នាំ២០១៧ ស្ត្រីជាប់ឆ្នោតមានភាគរយប្រហាក់ប្រហែលគ្នា ២១,៨% (២៥២២នាក់) នៅចុងអាណត្តិទី៤ និង ២២% (២៥៦២នាក់) នៅអាណត្តិទី៥ ឆ្នាំ២០២២ នេះ។ ចំណែកឯភាគរយសរុបនៃស្ត្រី និងបុរសជាប់ឆ្នោតមានគម្លាតយេនឌ័រខ្លាំង គឺស្ត្រីជាប់ឆ្នោត ២២% និងបុរសជាប់ឆ្នោត ៧៨%៕