 ទៅកម្រិតបី ដែលជាកម្រិតដ៏អាក្រក់មួយ និងអាចរងទណ្ឌកម្ម ក្រោមហេតុផលកម្ពុជាមានកិច្ចខិតខំតិចតួច និងមិនបានគោរពតាមស្តង់ដារនៃការលុបបំបាត់ការជួញដូរមនុស្ស។){kind=link}
សហរដ្ឋអាមេរិក បានទម្លាក់កម្ពុជា វៀតណាម ទីក្រុងម៉ាកាវ និងប្រទេសផ្សេងទៀតពីបញ្ជីស្ថិតក្រោមការឃ្លាំមើលនៅកម្រិតពីរ (Tier 2 Watch List) ទៅកម្រិតបី ដែលជាកម្រិតដ៏អាក្រក់មួយ និងអាចរងទណ្ឌកម្ម ក្រោមហេតុផលកម្ពុជាមានកិច្ចខិតខំតិចតួច និងមិនបានគោរពតាមស្តង់ដារនៃការលុបបំបាត់ការជួញដូរមនុស្ស។
ក្រសួងការបរទេសអាមេរិក នៅថ្ងៃទី១៩ ខែកក្កដា បានបញ្ចេញរបាយការណ៍ប្រចាំឆ្នាំ២០២២ ស្ដីពីការជួញដូរមនុស្ស ដោយក្នុងនោះ អាមេរិកបានទម្លាក់កម្ពុជា វៀតណាម តំបន់ម៉ាកាវ និងប្រទេសផ្សេងទៀតពីបញ្ជីស្ថិតក្រោមការឃ្លាំមើលនៅកម្រិតពីរ (Tier 2 Watch List) ទៅកម្រិតបី ដែលជាកម្រិតដ៏អាក្រក់មួយ និងអាចរងទណ្ឌកម្ម។
ការទម្លាក់កម្ពុជាមកកម្រិតបីនេះ ធ្វើឡើងក្រោមហេតុផលកម្ពុជាមានកិច្ចខិតខំតិចតួច និងមិនបានគោរពតាមស្តង់ដារនៃការលុបបំបាត់ការជួញដូរមនុស្ស។
របាយការណ៍ដដែលឲ្យដឹងថា កម្ពុជាស្ថិតនៅក្នុងចំណាត់ថ្នាក់ទី៣ ដែលអាចធ្វើឱ្យមានការរឹតត្បិតលើជំនួយបរទេស បើទោះបីជានេះមិនមែនជាការចាំបាច់ និងជាការសម្រេចចិត្តផ្នែកនយោបាយរបស់ប្រធានាធិបតីសហរដ្ឋអាមេរិកក៏ដោយ។
ក្នុងករណីវៀតណាម វិញ អាមេរិកអះអាងថា រដ្ឋាភិបាលក្រុងហាណូយ មិនបានចាត់វិធានការលើមន្ត្រីទូត និងបុគ្គលិកស្ថានទូតនៅអារ៉ាប៊ីសាអូឌីត ដែលមានពាក់ព័ន្ធនឹងការជួញដូរមនុស្សនោះទេ។
បើតាមលោកស្រី Kari Johnstone មន្ត្រីជាន់ខ្ពស់នៃក្រសួងការបរទេសអាមេរិក ដែលទទួលបន្ទុកលើការប្រយុទ្ធប្រឆាំងសិទ្ធិមនុស្សឲ្យដឹងថា រដ្ឋាភិបាលអាស៊ីមួយចំនួនត្រូវបានដាក់ក្នុងកម្រិត៣ ដោយសារពួកគេធ្លាប់ស្ថិតក្នុងបញ្ជីឃ្លាំមើលកម្រិតពីរ ដោយសារពួកគេមិនបានកែខ្លួន។
របាយការណ៍សហរដ្ឋអាមេរិកក៏បានសង្ខេបអំពីប្រតិបត្តិការឆបោក ដោយរៀបរាប់លម្អិតអំពីការរំលោភសិទ្ធិការងារ និងបញ្ហាជួញដូរមនុស្សដែលកំពុងតែកើតឡើងនៅកម្ពុជា ដូចជាការងារដើម្បីដោះបំណុលនៅឡឥដ្ឋ ការជួញដូរកូនស្រីដែលកំពុងមានការកើនឡើងនៅបរទេស និងការរំលោភបំពានប្រជាជនចំណាកស្រុកផងដែរ។
របាយការណ៍នេះក៏បានលាតត្រដាងដែរថា មានមន្ត្រីមួយចំនួនក្នុងជួររដ្ឋាភិបាលកម្ពុជាបានសមគំនិតក្នុងប្រតិបត្តិការឆបោក និងអំពាវនាវឱ្យមានការបង្កើនការកាត់ទោសដោយអាជ្ញាធរដែលប្រព្រឹត្តឡើងដោយខុសច្បាប់ ខណៈអង្គការមិនមែនរដ្ឋាភិបាលក៏បានចោទប្រកាន់នគរបាល និងមន្ត្រីផ្សេងទៀតថា បានសមគំនិតក្នុងប្រតិបត្តិការឆបោកតាមអ៊ីនធឺណិត ដោយបង្ខំឱ្យប្រជាជនចិន នៅតំបន់អាស៊ីអាគ្នេយ៍ និងជនបរទេសរាប់រយនាក់ធ្វើការនៅក្នុងវិស័យសេវាបម្រើអតិថិជននៅក្រុងព្រះសីហនុ និងទីតាំងផ្សេងៗទៀតដែរ។
សហរដ្ឋអាមេរិកក៏អំពាវនាវទៅរដ្ឋាភិបាល និងអាជ្ញាធរកម្ពុជា ត្រូវបង្កើនកិច្ចខិតខំប្រឹងប្រែងអនុវត្តច្បាប់ប្រឆាំងនឹងប្រតិបត្តិការឆបោកតាមអ៊ីនធឺណិត និងប្រឆាំងមន្ត្រីដែលសមគំនិតក្នុងប្រតិបត្តិការឆបោកនេះ រួមទាំងឧក្រិដ្ឋកម្មជួញដូរផ្សេងទៀតដែលពាក់ព័ន្ធ។
កាលពីខែមេសា ឆ្នាំ២០២២ សមត្ថកិច្ចថៃ បានសហការជាមួយកម្ពុជា ដើម្បីជួយសង្គ្រោះជនជាតិថៃ ជាង ៣ពាន់នាក់ចេញពីប្រតិបត្តិការឆបោកនៅខេត្តព្រះសីហនុ ខណៈជនជាតិម៉ាឡេស៊ី និងចិន ជាដើម ត្រូវបានសមត្ថកិច្ចជួយសង្គ្រោះជាបន្តបន្ទាប់ផងដែរ។
ទោះបីជាសមត្ថកិច្ចបានជួយសង្គ្រោះជនរងគ្រោះជាបន្តបន្ទាប់ចេញពីក្រុមប្រតិបត្តិការឆបោក និងបានបញ្ជូនពួកគេទៅប្រទេសកំណើតវិញក្ដី តែយ៉ាងណា នគរបាលកម្ពុជានៅតែបដិសេធយ៉ាងដាច់អហង្ការថាមិនមានការកើនឡើងនៃករណីទាំងនេះឡើយ។
បើតាមរបាយការណ៍របស់ក្រសួងការបរទេសសហរដ្ឋអាមេរិក ឱ្យដឹងថា ក្នុងរយៈពេល ៣ឆ្នាំចុងក្រោយនេះ កម្ពុជាត្រូវបានដាក់ឱ្យស្ថិតក្នុងបញ្ជីតាមដានក្នុងចំណាត់ថ្នាក់ទី២។ ដោយសារក្នុងរយៈពេលប៉ុន្មានឆ្នាំមកនេះ រដ្ឋាភិបាលដែលដឹកនាំដោយលោក ហ៊ុន សែន មិនបានធ្វើឲ្យមានភាពប្រសើរឡើង ហើយក៏ត្រូវបានទម្លាក់ចំណាត់ថ្នាក់ដោយស្វ័យប្រវត្តិទៅចំណាត់ថ្នាក់ទី៣ បន្ទាប់ពីរយៈពេល ២ឆ្នាំនៅក្នុងបញ្ជីតាមដាន។
របាយការណ៍ដដែលបញ្ជាក់ថា «រាជធានី-ខេត្តទាំង ២៥ របស់កម្ពុជា គឺជាប្រភពនៃការជួញដូរមនុស្ស៕