ពលរដ្ឋប្រមាណ ៣០នាក់តំណាងឲ្យ ២៥០គ្រួសារ រស់នៅជាប់បឹងតាមោក ខណ្ឌព្រែកព្នៅ រាជធានីភ្នំពេញ នាំគ្នាជំរុញទៅក្រសួងរៀបចំដែនដី និងស្ថាប័នពាក់ព័ន្ធផ្សេងទៀតដើម្បីពន្លឿនការដោះស្រាយវិវាទដីធ្លីជូនពួកគាត់។
ការជំរុញនេះ ធ្វើឡើងអំឡុងពេលពលរដ្ឋរស់នៅជាប់បឹងតាមោកប្រមាណ ៣០នាក់តំណាងឲ្យ ២៥០គ្រួសារ ប្រមូលផ្ដុំគ្នានៅមុខក្រសួងរៀបចំដែនដី ខុទ្ទកាល័យនាយករដ្ឋមន្ត្រី និងរដ្ឋសភា នៅថ្ងៃព្រហស្បតិ៍ នេះ ដើម្បីតាមដានញត្តិដែលពួកគេធ្លាប់បានដាក់ទៅស្ថាប័នទាំង៣ នេះឱ្យជួយអន្តរាគមន៍ជំរុញទៅអាជ្ញាធរពាក់ព័ន្ធដោះស្រាយបញ្ហាដីធ្លីជូនពួកគេ។
លោកស្រី ប្រាក់ សុភា ប្រាប់អ្នកសារព័ត៌មាននៅមុខក្រសួងដែនដីថា ពួកគាត់អស់ជំនឿលើអាជ្ញាធរថ្នាក់ក្រោម ទើបមករកក្រសួង និងស្ថាប័នពាក់ព័ន្ធឲ្យជួយដោះស្រាយ ទោះបីអ្នកខ្លះឈឺ និងខ្វះខាតក៏ដោយ។ ពួកគាត់បញ្ជាក់ថា ប្រជាពលរដ្ឋ ២៥០គ្រួសាររស់នៅលើដី ៥ហិកតារតាំងពីឆ្នាំ១៩៩០ មកម្ល៉េះ លោកស្រីស្នើទៅក្រសួងដែនដី រដ្ឋសភា និងខុទ្ទកាល័យលោកនាយករដ្ឋមន្ត្រី ហ៊ុន សែន ពន្លឿនការដោះស្រាយដោយចេញប្លង់កម្មសិទ្ធិដល់ពួកគាត់ទាំងអស់គ្នា ដើម្បីកុំឲ្យរស់នៅទាំងខ្លាចដោយសារការបណ្ដេញទាំងបង្ខំ។
លោកស្រីបញ្ជាក់ថា ដីបឹងតាមោក លោក ហ៊ុន សែន បានកាត់ និងផ្ដល់ឱ្យឧកញ៉ាចន្លោះ ៣០ ដល់ ១០០ហិកតារ ប៉ុន្តែដីដែលពួកគាត់ស្នើសុំនោះមានតែ ៥ហិកតារប៉ុណ្ណោះ។
អំឡុងពេលដែលពួកគាត់ទាមទារឲ្យមានដំណោះស្រាយដីធ្លីនេះ តំណាងពលរដ្ឋចំនួន ៧នាក់ត្រូវបានតំណាងអយ្យការអមសាលាដំបូងរាជធានីភ្នំពេញ លោក ទុង រតនា កោះហៅឱ្យចូលបំភ្លឺនៅតុលាការនាថ្ងៃទី៣ និងទី៤ ខែសីហា ឆ្នាំ២០២២ ខាងមុខនេះពីបទ «រារាំង ញុះញង់ បង្កើតសកម្មភាពអនាធិបតេយ្យតាមដងផ្លូវសាធារណៈ» តាមបណ្តឹងរបស់លោក មាស សម្បូរ ប្រធានសន្តិសុខខណ្ឌព្រែកព្នៅ។
តំណាងពលរដ្ឋចំនួន ៧នាក់ ក្នុងនោះមានលោកស្រី ប្រាក់ សុភា លោកស្រី ខេន សាអយ លោកស្រី ផន សុខុម លោកស្រី គង់ តឿ លោកស្រី ផន សុំ លោកស្រី តាន់ ខ្ទី និងលោកស្រី អំ ភឿន។
ការកោះហៅតំណាងពលរដ្ឋទាំង ៧នាក់នេះ ធ្វើឡើងក្រោយពីពួកគេនាំគ្នាតវ៉ាប្រឆាំងមិនឱ្យអាជ្ញាធរចាក់ដីលុបបឹងតាមោកប៉ះពាល់ដល់កន្លែងអាស្រ័យផល និងការតវ៉ាទាមទារសុំការអភិវឌ្ឍនៅនឹងកន្លែងក្រោយពេលអាជ្ញាធរចោទថា ពួកគាត់រស់នៅលើដីចំណីផ្លូវដោយខុសច្បាប់៕