27 C
Phnom Penh

លោក ស ខេង ថា​កម្ពុជា​មិន​ដកថយ​ចំពោះ​ការ​ប្រយុទ្ធ​ប្រឆាំង​អំពើ​ជួញដូរ​មនុស្ស ទោះបីជា​អាមេរិក​ទម្លាក់​មក​កម្រិត​អាក្រក់

ដោយ ឌឹ ខេមបូឌា ដេលី

បទវិភាគ

រដ្ឋមន្ត្រី​ក្រសួង​មហាផ្ទៃ លោក ស ខេង សម្ដែង​ការ​ភ្ញាក់ផ្អើល​នៅ​ពេល​ដែល​សហរដ្ឋ​អាមេរិក​បាន​ដាក់​ប្រទេស​កម្ពុជា​ក្នុង​ចំណាត់ថ្នាក់​អាក្រក់ ពាក់ព័ន្ធ​នឹង​ការ​ជួញដូរ​មនុស្ស​អន្តរជាតិ ប៉ុន្តែ​កម្ពុជា​នៅ​តែ​មាន​ឆន្ទៈ​មិន​ដកថយ​ចំពោះ​ការ​ប្រយុទ្ធ​ប្រឆាំង​អំពើ​ជួញដូរ​មនុស្ស ដោយ​នឹង​ខិតខំ​រក​ឱ្យ​ឃើញ​អំពី​ចំណុច​ខ្សោយ​ដើម្បី​ដោះស្រាយ។

ក្នុង​ពិធី​សម្ពោធ​ដាក់​ឲ្យ​ប្រើប្រាស់​ជា​ផ្លូវការ​អគារ​សិក្សា​សាលា​បឋមសិក្សា​មួយ និង​សមិទ្ធផល​នានា​នៅ​ខេត្ត​កណ្តាល កាលពី​ថ្ងៃទី​២៣ ខែ​កក្កដា ឆ្នាំ​២០២២ រដ្ឋមន្ត្រី​ក្រសួង​មហាផ្ទៃ លោក ស ខេង ថ្លែង​ថា ក្នុង​ឋានៈ​ជា​ប្រធាន​គណៈកម្មាធិការ​ជាតិ​ប្រយុទ្ធ​ប្រឆាំង​អំពើ​ជួញដូរ​មនុស្ស រូបលោក​តែង​សហការ​ជាមួយ​ដៃគូ​អន្តរជាតិ ជាពិសេស​អង្គការ​សហប្រជាជាតិ និង​សហរដ្ឋ​អាមេរិក​តែម្ដង ដើម្បី​ប្រយុទ្ធ​ប្រឆាំង​ការ​ជួញដូរ​មនុស្ស។

លោក​បង្ហាញ​ការ​ព្រួយបារម្ភ និង​ភ្ញាក់ផ្អើល​នៅ​ពេល​ដែល​រដ្ឋាភិបាល​អាមេរិក​សម្រេច​ដាក់​កម្ពុជា​ក្នុង​ចំណាត់ថ្នាក់​លេខ​៣ នៃ​ប្រទេស​ដែល​មាន​ឈ្មោះ​អាក្រក់​ខាង​អំពើ​ជួញដូរ​មនុស្ស។ លោក​ចាត់ទុក​ការ​ដាក់​ចំណាត់ថ្នាក់​នេះ ចង់​ឆ្លុះបញ្ចាំង​ឱ្យ​ឃើញ​ថា កម្ពុជា​គ្មាន​ឆន្ទៈ​ក្នុង​ការ​ទប់ស្កាត់ និង​ដោះស្រាយ។ លោក​បញ្ជាក់​ថា ប្រទេស​ខ្លះ​មក​ជួយ​ឱ្យ​កម្ពុជា​ល្អ តែ​បើ​ធ្វើ​មិន​បាន​ល្អ នោះ​អ្នក​ឯង​ក៏​អាក្រក់​ដែរ ខណៈ​ប្រទេស​ខ្លះ​ដូចជា​ធ្វើ​ការងារ​នេះ​មិន​បាន​ល្អ​ទេ តែ​បែរ​ជា​បាន​ពិន្ទុ​ល្អ​ទៅវិញ។

លោក ស ខេង បន្ត​ថា ទោះបីជា​រូបលោក​មាន​ការ​ព្រួយបារម្ភ​លើ​លក្ខខណ្ឌ​នៃ​ការ​វាយតម្លៃ ឬ​មនោសញ្ចេតនា​នៃ​ការ​វាយតម្លៃ​ក្តី ប៉ុន្តែ​ទោះបី​យ៉ាងណា កម្ពុជា​នៅ​តែ​មាន​ឆន្ទៈ និង​នៅតែ​បន្ត​ធ្វើ​ការងារ​នេះ ហើយ​នៅតែ​បន្ត​ជំរុញ​កិច្ច​សហប្រតិបត្តិការ​ជាមួយ​ដៃគូ​ទាំងអស់​ដោយ​ស្មោះ​ជាមួយ​គ្នា ព្រោះ​កម្ពុជា​នឹង​មិន​ដកថយ​ចំពោះ​ការ​ប្រយុទ្ធ​ប្រឆាំង​អំពើ​ជួញដូរ​មនុស្ស ដោយ​នឹង​ខិតខំ​រក​ឱ្យ​ឃើញ​ចំណុច​ខ្សោយ​ដើម្បី​ដោះស្រាយ។

កាលពី​ថ្ងៃទី​១៩ ខែ​កក្កដា ឆ្នាំ​២០២២ ក្រសួង​ការបរទេស​អាមេរិក បាន​បញ្ចេញ​របាយការណ៍​ប្រចាំ​ឆ្នាំ​២០២២ ស្ដីពី​ការ​ជួញដូរ​មនុស្ស ដោយ​ក្នុង​នោះ អាមេរិក​បាន​ទម្លាក់​កម្ពុជា វៀតណាម តំបន់​ម៉ាកាវ និង​ប្រទេស​ផ្សេង​ទៀត​ពី​បញ្ជី​ស្ថិត​ក្រោម​ការ​ឃ្លាំមើល​នៅ​កម្រិត​ពីរ (Tier 2 Watch List) ទៅ​កម្រិត​៣ ដែល​ជា​កម្រិត​ដ៏​អាក្រក់​មួយ និង​អាច​រង​ទណ្ឌកម្ម។

ការ​ទម្លាក់​កម្ពុជា​មក​កម្រិត​៣ នេះ ធ្វើឡើង​ក្រោម​ហេតុផល​ថា កម្ពុជា​មាន​កិច្ច​ខិតខំ​តិចតួច និង​មិន​បាន​គោរព​តាម​ស្តង់ដារ​នៃ​ការ​លុបបំបាត់​ការ​ជួញដូរ​មនុស្ស។ បើ​តាម​របាយការណ៍​ក្រសួង​ការបរទេស​អាមេរិក​បញ្ជាក់​ថា ប្រទេស​កម្ពុជា​ស្ថិត​នៅ​ក្នុង​ចំណាត់ថ្នាក់​ទី​៣ ដែល​អាច​ធ្វើ​ឱ្យ​មាន​ការ​រឹតត្បិត​លើ​ជំនួយ​បរទេស បើ​ទោះបីជា​នេះ​មិន​មែន​ជា​ការ​ចាំបាច់ និង​ជា​ការ​សម្រេច​ចិត្ត​ផ្នែក​នយោបាយ​របស់​ប្រធានាធិបតី​សហរដ្ឋ​អាមេរិក​ក៏ដោយ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស