ក្រុមប្រជាសហគមន៍ឧត្តមស្រែពស់ ស្នើទៅអភិបាលខេត្តកំពង់ស្ពឺ ឲ្យដកទាហានចេញពីដីព្រៃសហគមន៍ «ឧត្ដមស្រែពស់ និងព្រៃមេត្តាធម្មជាតិ» និងបើកឲ្យសហគមន៍ចូលការពារដោយគ្មានការគំរាមកំហែង។
ការស្នើរបស់ប្រជាសហគមន៍នេះ ធ្វើឡើងខណៈអភិបាលខេត្តកំពង់ស្ពឺ លោក វ៉ី សំណាង បានចុះទៅពិនិត្យទីតាំងឈូសឆាយដីនៅសហគមន៍ឧត្តមស្រែពស់ នាព្រឹកថ្ងៃទី៩ ខែសីហា ឆ្នាំ២០២។
ក្នុងជំនួបរវាងអភិបាលខេត្តកំពង់ស្ពឺ ក្រុមប្រជាសហគមន៍ឧត្តមស្រែពស់ រៀបរាប់ថា កន្លងមកក្រុមទាហានបានគំរាមដេញកាប់ ហើយថែមទាំងយកកាំភ្លើងបាញ់ទៀត នៅពេលពួកគាត់ចុះពិនិត្យមើលដីព្រៃសហគមន៍ «ឧត្ដមស្រែពស់ និងព្រៃមេត្តាធម្មជាតិ»។
ក្រៅពីការស្នើឲ្យដកទាហានចេញ ពលរដ្ឋក៏បានស្នើទៅអភិបាលខេត្តកំពង់ស្ពឺ ជួយការពារដីព្រៃសហគមន៍ «ឧត្ដមស្រែពស់ និងព្រៃមេត្តាធម្មជាតិ» និងបើកឲ្យសហគមន៍ចូលការពារដោយមិនមានការគំរាមកំហែងដូចពេលកន្លងមក។
ជាការឆ្លើយតប អភិបាលខេត្តកំពង់ស្ពឺ លោក វ៉ី សំណាង បានលើកឡើងថា រូបលោកនឹងខិតខំធ្វើការងារទៅតាមសំណើរបស់ពលរដ្ឋ។ លោកក៏បានស្នើដល់ពលរដ្ឋកុំឲ្យជឿតាមអង្គការសង្គមស៊ីវិលដែលមានចេតនាញុះញង់ឲ្យប្រជាពលរដ្ឋឲ្យស្អប់រដ្ឋាភិបាល និងអាជ្ញាធរ។
ព្រៃឈើក្នុងសហគមន៍ «ឧត្ដមស្រែពស់ និងព្រៃមេត្តាធម្មជាតិ» រងការកាប់បំផ្លាញ និងឈូសឆាយពីសំណាក់ក្រុមទាហាន «រថក្រោះកងទ័ពជើងគោក» និងពលរដ្ឋមួយចំនួនតាំងពីអំឡុងខែសីហា ឆ្នាំ២០២១ ក្រោយពួកគេទទួលបានដីសម្បទានសង្គមកិច្ចពីរដ្ឋាភិបាលជាង ២៦០ហិកតារនៅតំបន់នោះ។
ក្រោយទទួលបានដីសម្បទានសង្គមកិច្ចនេះ ក្រុមទាហានបានដាក់គ្រឿងចក្រឈូសឆាយ និងប្រើកម្លាំងកម្មករឲ្យកាប់រុករានព្រៃឈើនៅតំបន់នោះ ដែលបច្ចុប្បន្ន ដីព្រៃសហគមន៍នេះនៅសល់ប្រហែលតែ ៩០០ហិកតារប៉ុណ្ណោះ ខណៈព្រៃសហគមន៍ទាំងពីរនេះជាប្រភេទតំបន់ព្រៃស្រោង ជាជម្រកសត្វព្រៃជាច្រើនប្រភេទកំពុងរស់នៅ ជាពិសេសប្រភេទសត្វព្រៃជិតផុតពូជ ដែលពលរដ្ឋ និងព្រះសង្ឃបានការពារជាង ២០ឆ្នាំទៅហើយ។
កន្លងមក ប្រជាសហគមន៍បាននាំគ្នាទៅរកកិច្ចអន្តរាគមន៍ពីកូនប្រុសរបស់លោក ហ៊ុន សែន គឺលោក ហ៊ុន ម៉ានី ដែលជាតំណាងរាស្ត្រមណ្ឌលខេត្តកំពង់ស្ពឺ ដើម្បីឲ្យជួយទប់ស្កាត់សកម្មភាពកាប់បំផ្លាញព្រៃឈើក្នុងសហគមន៍ពីសំណាក់ក្រុមទាហានកងទ័ពជើងគោក និងពលរដ្ឋមួយចំនួន។
បើតាមខ្លឹមសារញត្តិកាលពីឆ្នាំ២០០៣ ផ្ទៃដីព្រៃសហគមន៍ឧត្ដមស្រែពស់ មានទំហំ ២៤៣៣ហិកតារ ដោយមានពលរដ្ឋអាស្រ័យផលចំនួន ២៥៣គ្រួសារ ហើយនៅចន្លោះឆ្នាំ២០០៨ និងឆ្នាំ២០១៧ អាជ្ញាធរបានកាត់ឆ្វៀលដីព្រៃសហគមន៍នេះទៅឲ្យក្រុមហ៊ុនឯកជន និងក្រុមគ្រួសារទាហាន «ង៧០» អស់ជាច្រើនហិកតារ៕