27 C
Phnom Penh

មន្ត្រី​បក្ស​ប្រឆាំង​ជំរុញ​ឱ្យ​រដ្ឋាភិបាល​ជួយ​កសិករ​លើ​វិស័យ​ផលិតកម្ម​អំបិល​ដើម្បី​បញ្ចៀស​ការ​នាំចូល​ពី​ប្រទេស​ជិតខាង

ដោយ ឌឹ ខេមបូឌា ដេលី

បទវិភាគ

មន្ត្រី​ជាន់ខ្ពស់​របស់​បក្ស​ប្រឆាំង ជំរុញ​ឱ្យ​រដ្ឋាភិបាល​កម្ពុជា​ដាក់​ចេញ​នូវ​គោលនយោបាយ​ជួយ​កសិករ​លើ​វិស័យ​ផលិតកម្ម​អំបិល​នៅ​តាម​ខេត្ត​ជាប់​មាត់សមុទ្រ ដើម្បី​ជួយ​កសិករ​ឱ្យ​មាន​និរន្តរភាព​លើ​មុខរបរ​ផលិត​អំបិល និង​បញ្ចៀស​នូវ​ការ​នាំចូល​អំបិល​ពី​ប្រទេស​ជិតខាង។

អតីត​អ្នកទោស​នយោបាយ និង​ជា​មន្ត្រី​ជាន់ខ្ពស់​បក្ស​ប្រឆាំង លោក មាជ សុវណ្ណារ៉ា បាន​ប្រាប់ The Cambodia Daily នៅ​ថ្ងៃទី​១៥ សីហា នេះ​ថា អំបិល​របស់​កម្ពុជា​ដែល​មាន​មូលដ្ឋាន​នៅ​ខេត្ត​កំពត និង​ខេត្ត​កែប សព្វថ្ងៃ​នេះ អាច​នឹង​ឈាន​ទៅ​រក​ការ​បាត់បង់​ស្រែអំបិល​នៅ​ថ្ងៃ​ណា​មួយ​ជាមិនខាន ដោយសារតែ​រង​ឥទ្ធិពល​ពី​ការ​នាំចូល​ពី​ប្រទេស​ជិតខាង ដូចជា​វៀតណាម ចិន និង​ឥណ្ឌា ដែល​កំពុង​វាយលុក​ទីផ្សារ​កម្ពុជា​នៅ​ពេលនេះ។

លោក​បន្ត​ថា រដ្ឋាភិបាល​គួរតែ​ពិនិត្យ​លើ​តម្លៃ​ពន្ធ​នាំចូល​ពី​បរទេស​ចំពោះ​ផលិតផល​ទាំងឡាយ​ណា​ដែល​កម្ពុជា​អាច​ផលិត​បាន​ដោយ​ខ្លួនឯង ដើម្បី​រក្សា​តម្លៃ​ផលិតផល​ក្នុង​ស្រុក ចៀសវាង​ធ្វើ​ឱ្យ​ផលិតផល​របស់​ខ្លួន​ក្ស័យ​ធន ដែល​អាច​ប៉ះពាល់​ដល់​សេដ្ឋកិច្ច​របស់​ខ្លួន ដែល​នឹង​ឈាន​ទៅ​រក​វិបត្តិ​ការងារ​កាន់តែ​ច្រើន​ឡើង​ថែម​ទៀត ស្រប​ពេល​ដែល​កម្ពុជា​កំពុងតែ​ប្រឈម​នឹង​វិបត្តិ​រាប់​រយ​ជំពូក​ស្រាប់​ទៅ​ហើយ​នោះ។

លោក មាជ សុវណ្ណារ៉ា បញ្ជាក់​ថា ផលិតកម្ម​អំបិល​ក្នុង​ស្រុក​បាន​ធ្លាក់​ចុះ​យ៉ាង​គំហុក ត្បិត​ទីតាំង​ស្រែអំបិល​ដែល​មាន​ប្រមាណ ២០០​កន្លែង បាន​បន្ត​ផលិត​អំបិល​មិន​ដល់ ១០០​កន្លែង​ផង​សព្វថ្ងៃ​នេះ។ បញ្ហា​នៃ​ការ​ធ្លាក់​ចុះ​នេះ គឺ​ដោយសារតែ​បញ្ហា​អំបិល​គ្មាន​ទីផ្សារ ក្នុង​នោះ អំបិល​ដែល​ផលិត​បាន​មាន​តម្លៃ​ត្រឹមតែ​ជាង ១០០​រៀល​ប៉ុណ្ណោះ​ក្នុង​មួយ​គីឡូក្រាម។

កាលពី​ថ្ងៃទី​៥ ខែ​សីហា ឆ្នាំ​២០២២ កម្ពុជា​បាន​ចាប់ផ្ដើម​នាំចូល​អំបិល​ពី​ប្រទេស​ឥណ្ឌា​ជា​លើកដំបូង​ចំនួន ៦​ម៉ឺន​តោន ដើម្បី​ផ្គត់ផ្គង់​លើ​តម្រូវការ​ទីផ្សារ​នៅ​ក្នុង​ស្រុក និង​បំពេញ​ការ​ខ្វះខាត​អំបិល​សម្រាប់​ការ​បរិភោគ​របស់​ពលរដ្ឋ​ខ្មែរ​ក្នុង​ឆ្នាំ​២០២២ នេះ។

កម្ពុជា​មាន​ផ្ទៃដី​សម្រាប់​ធ្វើ​ស្រែអំបិល​ជាង ៤៧០០​ហិកតារ ដែល​ស្ថិត​ក្នុង​ខេត្ត​កំពត ជិត ៤​ពាន់​ហិកតារ (៣៧២៦​ហិកតារ) និង​ខេត្ត​កែប មាន​ចំនួន​ជាង ១​ពាន់​ហិកតារ​ផង​ដែរ ដែល​អាច​ផលិត​អំបិល​បាន​ជាង ១០​ម៉ឺន​តោន​ក្នុង​មួយ​ឆ្នាំៗ ប៉ុន្តែ​ក្នុង​រយៈពេល ៣​ឆ្នាំ​ចុង​ក្រោយ​នេះ ការ​ផលិត​អំបិល​របស់​កម្ពុជា​បាន​ធ្លាក់​ចុះ​ជា​បន្តបន្ទាប់។

កាលពី​ដើម​ខែ​មិថុនា ឆ្នាំ​២០២២ រដ្ឋាភិបាល​កម្ពុជា​បាន​បង្ហាញ​របាយការណ៍​របស់​ខ្លួន​ថា កាលពី​ឆ្នាំ​២០១៤ ឆ្នាំ​២០១៥ និង​ឆ្នាំ​២០១៦ កម្ពុជា​ប្រមូល​ផល​អំបិល​ជាង ១០​ម៉ឺន​តោន​ក្នុង​មួយ​ឆ្នាំៗ ប៉ុន្តែ​នៅ​ឆ្នាំ​២០១៧ ឆ្នាំ​២០១៨ និង​ឆ្នាំ​២០១៩ បាន​ធ្លាក់​ចុះ​ជា​បន្តបន្ទាប់ ដែល​កម្ពុជា​ត្រូវតែ​បញ្ជា​ទិញ​អំបិល​ពី​ប្រទេស​ឥណ្ឌា ចិន និង​ថៃ ជាដើម ដើម្បី​បំពេញ​តម្រូវការ​របស់​ខ្លួន។

របាយការណ៍​ដដែល​បញ្ជាក់​ថា កាលពី​ឆ្នាំ​២០២០ កន្លងទៅ កម្ពុជា​ផលិត​អំបិល​បាន​ត្រឹមតែ ៨​ម៉ឺន ៤​ពាន់​តោន​ប៉ុណ្ណោះ ខណៈ​ឆ្នាំ​២០២១ ការ​ផលិត​បាន​ធ្លាក់​ចុះ​មួយ​កម្រិត​ទៀត គឺ​នៅ​ត្រឹម ៦​ម៉ឺន ៧​ពាន់​តោន។ ដោយឡែក​រយៈពេល ៤​ខែ​ក្នុង​ឆ្នាំ​២០២២ មក​នេះ កសិករ​ផលិត​អំបិល​បាន​ត្រឹមតែ​ជិត ២​ម៉ឺន​តោន​ប៉ុណ្ណោះ ដោយសារតែ​បញ្ហា​អាកាសធាតុ ជាពិសេស​ភ្លៀង​ធ្លាក់​ច្រើន​អំឡុង​ខែ​កុម្ភៈ និង​ខែ​មីនា ដែល​ជា​រដូវ​សំខាន់​នៃ​ការ​ប្រមូល​អំបិល។

ជុំវិញ​បញ្ហា​នេះ កាលពី​ដើម​ខែ​កុម្ភៈ ឆ្នាំ​២០២១ រដ្ឋមន្ត្រី​ក្រសួង​ឧស្សាហកម្ម វិទ្យាសាស្ត្រ បច្ចេកវិទ្យា និង​នវានុវត្តន៍ លោក ចម ប្រសិទ្ធ បាន​លើកឡើង​ថា ក្រសួង​កំពុង​រៀបចំ​ឡើងវិញ​នូវ​យុទ្ធសាស្ត្រ​អភិវឌ្ឍន៍​វិស័យ​អំបិល​នៅ​កម្ពុជា​រយៈពេល ៥​ឆ្នាំ ចាប់ពី​ឆ្នាំ​២០២២ ដល់​ឆ្នាំ​២០២៦ ដោយ​សហការ​ជាមួយ​នឹង​ក្រសួង​សេដ្ឋកិច្ច និង​ហិរញ្ញវត្ថុ។

ទោះជា​យ៉ាងណា​ក៏ដោយ នៅ​ពេល​នេះ វិស័យ​ផលិតកម្ម​អំបិល​នៅ​កម្ពុជា​កាន់តែ​បន្ត​ធ្លាក់​ចុះ​បន្ថែម​ទៀត៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស