 និងកិច្ចប្រជុំគណៈកម្មការព្រំដែនចម្រុះ (JBC) កម្ពុជា-ថៃ គឺជាលទ្ធផលដែលកម្ពុជា ចាញ់ប្រៀបថៃ ព្រោះកម្ពុជាបានទទួលយកសំណើថៃ ដែលប្រាសចាកពីសន្ធិសញ្ញាបារាំង-សៀម ឆ្នាំ១៩០៧។){kind=link}
អ្នកឃ្លាំមើលលើកឡើងថា លទ្ធផលនៃកិច្ចប្រជុំគណៈកម្មាធិការព្រំដែនទូទៅ (GBC) និងកិច្ចប្រជុំគណៈកម្មការព្រំដែនចម្រុះ (JBC) កម្ពុជា-ថៃ គឺជាលទ្ធផលដែលកម្ពុជា ចាញ់ប្រៀបថៃ ព្រោះកម្ពុជាបានទទួលយកសំណើថៃ ដែលប្រាសចាកពីសន្ធិសញ្ញាបារាំង-សៀម ឆ្នាំ១៩០៧។
ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត ប្រាប់សារព័ត៌មាន The Cambodia Daily នៅថ្ងៃទី២៣ តុលា នេះថា កិច្ចប្រជុំគណៈកម្មការព្រំដែនចម្រុះកម្ពុជា-ថៃ (JBC) ដែលបញ្ចប់នៅថ្ងៃនេះមានចំណុចខ្វះខាតជាច្រើនសម្រាប់កម្ពុជា ប៉ុន្តែបានផ្តល់ផលចំណេញទៅឱ្យថៃ ទៅវិញ។
ជាក់ស្តែង ការឯកភាពគ្នាជុំវិញការសាងសង់បង្គោលព្រំដែនឡើងវិញចំនួន ១៥បង្គោលតាមគំរូដើមបង្គោលជំនាន់បារាំង លុះត្រាតែកម្ពុជា និងថៃ ស្នើសុំកិច្ចសហការពីប្រទេសបារាំង ទាំងអ្នកជំនាញបច្ចេកទេស ទាំងផែនទីផ្ទៀងផ្ទាត់ និងឯកសារពាក់ព័ន្ធនានា ដូចជារបាយការណ៍លម្អិតអំពីទីតាំងបង្គោលព្រំដែននីមួយៗ រួមទាំងនិយាមកាបង្គោល ជាដើម។
ចំណែកការចុះវាស់វែង និងខណ្ឌសីមាព្រំដែននៅលើដីជាក់ស្តែងក្នុងកំណាត់ខ្សែព្រំដែនចន្លោះបង្គោលលេខ៤២ ដល់បង្គោលលេខ៤៧ នៅលើដីជាក់ស្តែងនៅក្នុងតំបន់ភូមិជោគជ័យ និងតំបន់ភូមិព្រៃចាន់ កម្ពុជាត្រូវប្រឈមនឹងការបាត់បង់ផ្នែកខ្លះទៀតទៅខាងភាគីថៃ ដោយថៃ សំអាងថា យោធាថៃ បានឈរជើងនៅលើទីតាំងជាក់ស្តែង ព្រោះកម្ពុជា មិនបានលើកឡើងពីការឈ្លានពានរបស់ថៃ នៅទីតាំងទាំងនោះទេ។
ចំណែកឯសកម្មភាពថៃ ដែលបានចូលទៅរាយលួសបន្លា ឈូសឆាយដី និងបំផ្លាញផ្ទះសម្បែងរបស់ពលរដ្ឋខ្មែរនៅភូមិព្រៃចាន់ និងភូមិជោគជ័យ ដោយបំពានច្បាប់ ក៏មិនត្រូវបានកម្ពុជា លើកឡើងដើម្បីឱ្យភាគីថៃ បញ្ឈប់ធ្វើសកម្មភាពក្នុងកិច្ចប្រជុំនេះដែរ។
លោក ម៉ែន ណាត លើកឡើងថា ចំណែកកិច្ចប្រជុំគណៈកម្មាធិការព្រំដែនទូទៅ (GBC) ក៏មានចំណុចសង្ស័យផ្តល់ផលចំណេញទៅឱ្យភាគីថៃ ដែរ ព្រោះការឯកភាពក្នុងការដោះមីននៅតំបន់ជម្លោះ និងការសហការបង្ក្រាបឧក្រិដ្ឋកម្មអនឡាញ គឺស្មើនឹងបើកផ្លូវឱ្យថៃ លុកលុយកម្ពុជាតាមឧបាយកលរបស់ពួកគេនៅថ្ងៃក្រោយបន្តទៀត។
ប្រធានក្រុមប្រឹក្សាឃ្លាំមើលកម្ពុជារូបនេះ ស្នើឱ្យរដ្ឋាភិបាលកម្ពុជា ច្រានចោលលក្ខខណ្ឌរបស់ថៃ ដែលបានលើកឡើងទាំងនោះ ព្រោះជាលក្ខខណ្ឌដែលប្រាសចាកពីខ្លឹមសារដើមនៃសន្ធិសញ្ញាបារាំង-សៀមឆ្នាំ១០៩៤ និងឆ្នាំ១៩០៧ និងផែនទីបារាំង ខ្នាត ១/២០០០០០ ស្ដីពីការកំណត់ព្រំដែនគោកកម្ពុជា-ថៃ។
លោកបញ្ជាក់ថា កម្ពុជាត្រូវតែពិនិត្យលិខិតុបករណ៍អន្តរជាតិពាក់ព័ន្ធ រួមទាំងកិច្ចព្រមព្រៀងទីក្រុងប៉ារីសឆ្នាំ១៩៩១ ផងដែរ ដើម្បីជាយន្តការដោះស្រាយរឿងព្រំដែនជាមួយប្រទេសថៃ នាពេលនេះ។ ជាងនេះទៀត កម្ពុជាត្រូវប្រញាប់ដាក់ពាក្យបណ្ដឹងប្តឹងថៃ ទៅតុលាការអន្តរជាតិ (ICJ) ដើម្បីការពារបូរណភាពទឹកដីខ្មែរ និងទាមទារយុត្តិធម៌ជូនពលរដ្ឋខ្មែរវិញ។
ចំណែកប្រធានគណបក្សជំនាន់ថ្មី លោក មាជ សុវណ្ណារ៉ា ក៏បានប្រាប់សារព័ត៌មាន The Cambodia Daily ដែរថា ប្រសិនបើកម្ពុជាឈរលើសន្ធិសញ្ញាបារាំង-សៀមឆ្នាំ១៩០៧ ឬអនុស្សរណៈ MoU ឆ្នាំ២០០០ និងឆ្នាំ២០០១ ផ្អែកលើផែនទីខ្នាត ១/២០០០០០ ដូច្នេះនៅពេលនេះ គឺមានតែរង់ចាំមើលគណៈកម្មាធិការកិច្ចការចម្រុះព្រំដែន JBC និង GBC នាំគ្នាដោះស្រាយបញ្ហានៅចំពោះមុខសិន។
លោកសង្ឃឹមថារដ្ឋាភិបាលកម្ពុជា នឹងប្រយ័ត្នប្រយែង ហើយមានភាពឆ្លាតវៃក្នុងការចរចាដែលមិនបាត់បង់ទឹកដីកម្ពុជា ហើយត្រូវបញ្ចប់ការប្រទាញប្រទង់គ្នាសម្រាប់អនាគតកម្ពុជានៃអ្នកជំនាន់ក្រោយៗ។
កម្ពុជា-ថៃ បានចេញសេចក្តីប្រកាសព័ត៌មានរួមគ្នានៅថ្ងៃទី២៣ តុលា នេះ ស្ដីពីកិច្ចប្រជុំគណៈកម្មការចម្រុះព្រំដែនគោកកម្ពុជា-ថៃ (JBC) ដែលត្រូវបានបញ្ចប់កាលពីថ្ងៃពុធ ថា ភាគីទាំងពីរបានឯកភាពគ្នាលើលក្ខខណ្ឌចំនួន ៧ចំណុច រួមមាន ការបោះបង្គោលតាមគំរូដើមពីជំនាន់បារាំង និងការចុះវាស់វែងពិនិត្យខណ្ឌសីមាជាក់ស្តែងក្នុងតំបន់ភូមិជោគជ័យ និងភូមិព្រៃចាន់ ជាដើម។ ភាគីទាំងពីរ បានឯកភាពគ្នាប្រគល់ភារកិច្ចជូនអនុគណៈកម្មការបច្ចេកទេសចម្រុះព្រំដែនកម្ពុជា-ថៃ (JTSC) ដើម្បីសាងសង់ឡើងវិញនូវបង្គោលព្រំដែនចំនួន ១៥ តាមគំរូដើមជំនាន់បារាំង។
បន្ថែមពីនេះ ភាគីទាំងពីរក៏បានលើកឡើងពាក់ព័ន្ធនឹងករណីចុះវាស់វែង និងខណ្ឌសីមាព្រំដែននៅលើដីជាក់ស្តែងនៅចន្លោះបង្គោលលេខ៤២ ដល់បង្គោលលេខ៤៧ នៅក្នុងតំបន់ភូមិជោគជ័យ ភូមិព្រៃចាន់ របស់កម្ពុជា និងភូមិណងចាន់ រួមទាំងភូមិណងយ៉ាកែវ របស់ថៃ ផងដែរ។
ចំណែករដ្ឋមន្ត្រីការពារជាតិកម្ពុជា លោក ទៀ សីហា ក៏បានចេញសេចក្តីប្រកាសព័ត៌មាន ស្ដីពីលទ្ធផលនៃកិច្ចប្រជុំគណៈកម្មាធិការព្រំដែនទូទៅ (GBC) នៅថ្ងៃទី២៣ តុលា នេះដែរថា ភាគីកម្ពុជា-ថៃ បានឯកភាពគ្នាសម្រួលអាវុធធុនធ្ងន់ និងយុទ្ធោបករណ៍ឱ្យត្រឡប់ទៅមូលដ្ឋានដើមវិញ។
ជាងនេះទៀត ភាគីទាំងពីរក៏បានឯកភាពសហប្រតិបត្តិការទប់ស្កាត់ និងបង្ក្រាបបទល្មើសឆ្លងដែន រួមបញ្ចូលទាំងការឆបោកតាមប្រព័ន្ធបច្ចេកវិទ្យា (Cyber scam) និងការជួញដូរមនុស្ស ព្រមទាំងឯកភាពសហការគ្នាដោះមីនមនុស្សធម៌តាមតំបន់ព្រំដែនដែលព្រមព្រៀងគ្នាផងដែរ៕
© 2025, ឌឹ ខេមបូឌា ដេលី. All rights reserved.