អាជីវករកំពុងលក់ដូរនៅផ្សារអូរឫស្សីរាប់រយនាក់ នៅថ្ងៃទី១៥ សីហា នេះ បាននាំគ្នាយកញត្តិទៅដាក់នៅខុទ្ទកាល័យលោក ហ៊ុន សែន ដើម្បីស្នើសុំឲ្យជួយអន្តរាគមន៍បញ្ចុះតម្លៃតូប ៥០% បន្ទាប់ពីរដ្ឋបាលផ្សារតម្រូវឲ្យបង់ថ្លៃជួលតូបសម្រាប់អាណត្តិថ្មី ១០០% ខណៈពួកគេរកចំណូលមិនសូវបានដោយប្រឈមនឹងការលក់ដូរអនឡាញបានវាយលុកខ្លាំងចាប់តាំងពីផ្ទុះជំងឺកូវីដ-១៩ មក។
អ្នកនាង ហេង សុគា បានប្រាប់ក្រុមអ្នកសារព័ត៌មានអំឡុងពេលដាក់ញត្តិថា ការស្វែងរកកិច្ចអន្តរាគមន៍នៅថ្ងៃនេះ ដើម្បីសុំឲ្យប្រមុខរដ្ឋាភិបាលជួយ។ អ្នកនាងបន្តថា ការស្នើសុំនេះក្រោយពីសាលារាជធានីភ្នំពេញទាមទារឲ្យអាជីវករបង់តម្លៃតូប ១០០% ទាំងដែលអាជីវករលក់ដូរមិនដាច់ ខណៈបច្ចុប្បន្នការលក់ដូរតាមអនឡាញបានវាយលុកខ្លាំង។
អាជីវកររូបនេះបញ្ជាក់ថា ពួកគាត់គ្មានប្រាក់បង់ទៅតាមអាជ្ញាធររាជធានីភ្នំពេញទាមទារឡើយ ដោយសារបច្ចុប្បន្ន ពួកគាត់លក់ដូរមិនដាច់ ខណៈផ្សារឯកជនក៏មានច្រើន ហើយការលក់ដូរតាមអនឡាញក៏បានវាយលុកខ្លាំងថែមទៀតនោះ។ ករណីនេះ ទើបពួកគាត់ដែលជាអាជីវករសម្រេចចិត្តមកស្នើសុំឲ្យលោកនាយករដ្ឋមន្ត្រី ហ៊ុន សែន ជួយអន្តរាគមន៍ដោយបញ្ចុះតម្លៃតូប ៥០%។
អាជីវករមួយរូបទៀតនិយាយថា កាលពី ២០ឆ្នាំមុននៅពេលមិនទាន់សាងសង់ផ្សារ អាជ្ញាធរបានយកតម្លៃតូបប្រភេទ «ក» តម្លៃ ៣៣០០ដុល្លារ និងតូបប្រភេទអក្សរ «ខ» តម្លៃ ២៨៦០ដុល្លារ។ ពួកគាត់ក៏ព្រមបង់ដើម្បីយកប្រាក់ទាំងនោះទៅសាងសង់ផ្សារ។ លោកស្រីបញ្ជាក់ថា ទោះបីជាផ្សារបានសាងសង់រួចហើយក្ដី ប៉ុន្តែនៅឆ្នាំ២០២០ អាជ្ញាធររាជធានីភ្នំពេញនៅតែទាមទារឲ្យអាជីវករបង់តម្លៃតូបដូចមុនទៀត ទាំងដែលពួកគាត់កំពុងជួបការលំបាក។
តំណាងអាជីវករ លោក តាំង គីមពា អះអាងថា កន្លងមក ពួកគាត់បានជួបសាលារាជធានីភ្នំពេញឲ្យជួយបញ្ចុះតម្លៃតូបដែរ ប៉ុន្តែមិនមានដំណោះស្រាយ។ លោកបន្តថា សាលារាជធានីភ្នំពេញនៅតែទាមទារឲ្យអាជីវករបង់តម្លៃតូបពេញ ១០០% ដដែល ទើបអាជីវករមិនសុខចិត្ត បាននាំគ្នាមកស្វែងរកកិច្ចអន្តរាគមន៍ពីលោកនាយករដ្ឋមន្ត្រីឲ្យជួយនោះ។
លោក តាំង គីមពា អះអាងថា មន្ត្រីខុទ្ទកាល័យបានទទួលយកញត្តិរបស់ពួកគាត់ហើយ និងបានសន្យាបញ្ជូនញត្តិដែលអាជីវករទាមទារនោះទៅថ្នាក់ដឹកនាំ។
លោក ហ៊ត វ៉ាន់ធី ជាអ្នកគ្រប់គ្រងផ្សារ ឱ្យដឹងនាពេលកន្លងមកថា រដ្ឋបាលផ្សារពិគ្រោះយោបល់ជាមួយមន្ត្រីមូលដ្ឋាន បានអះអាងថា វាមិនអាចទៅរួចទេក្នុងការបញ្ចុះថ្លៃ ៥០% ហើយអ្វីដែលលោកអាចធ្វើបាន គឺស្នើឱ្យសាលាខណ្ឌតម្រូវឱ្យអាជីវករបង់ប្រាក់ក្នុងតម្លៃមុន។
បើតាមក្រុមអាជីវករ អះអាងថា តូបនៅផ្សារអូរឫស្សីសរុបចំនួន ៥៧០៥តូប ដោយក្នុងមួយតូបតម្លៃចន្លោះពី ២ពាន់ទៅជាង ៣ពាន់ដុល្លារ ដែលតម្លៃនេះអាជីវករអាចលក់ដូរនៅក្នុងផ្សារបានរយៈពេល ២០ឆ្នាំ។
ចំពោះការបង់ប្រាក់ជួលអាណត្តិថ្មី គឺសម្រាប់រយៈពេល ២០ឆ្នាំ ដោយគិតចាប់ពីថ្ងៃទី១ ខែមករា ឆ្នាំ២០២១ រហូតដល់ថ្ងៃទី៣១ ខែធ្នូ ឆ្នាំ២០៤០។ រីឯកាលកំណត់សម្រាប់ការបង់ថ្លៃជួលតូប នឹងគិតចាប់ពីថ្ងៃទី១៥ ខែកក្កដា ឆ្នាំ២០២២ ដល់ថ្ងៃទី១៥ ខែតុលា ឆ្នាំ២០២២៕