25 C
Phnom Penh

លោក ស ខេង ព្រមាន​ចាត់​វិធានការ​ច្បាប់​លើ​គ្រូ​នគរបាល​ម្នាក់ បើ​មិន​ប្រគល់​ដី​សាលា​ជូន​រដ្ឋ​វិញ

ដោយ ឌឹ ខេមបូឌា ដេលី

បទវិភាគ

រដ្ឋមន្ត្រី​ក្រសួង​មហាផ្ទៃ លោក ស ខេង ព្រមាន​ដក​តំណែង និង​ចាត់​វិធានការ​ច្បាប់​លើ​អតីត​នាយក​សាលា​នគរបាល​ជាតិ​ភូមិភាគ​១ ខេត្ត​ស្ទឹងត្រែង លោក យស ផន និង​ជា​គ្រូ​នគរបាល​ជាតិ​នៃ​បណ្ឌិត្យសភា​នគរបាល​កម្ពុជា​បច្ចុប្បន្ន ក្នុង​ករណី​ដែល​អតីត​គ្រូ​នគរបាល​ជាតិ​រូប​នេះ​មិន​ព្រម​ប្រគល់​ដី​ដែល​ខ្លួន​កាន់កាប់​សព្វថ្ងៃ​នេះ​ជូន​សាលា​នគរបាល​ជាតិ​ភូមិ​ភាគ​១ ខេត្ត​ស្ទឹងត្រែង វិញ។

ថ្លែង​ក្នុង​ពិធី​ជួប​សំណេះសំណាល និង​សួរ​សុខទុក្ខ​សិស្ស​នគរបាល​ជាតិ​នៃ​សាលា​នគរបាល​ជាតិ​ភូមិ​ភាគ​១ នៅ​ខេត្ត​ស្ទឹងត្រែង កាលពី​ថ្ងៃទី​២៣ ខែ​សីហា ឆ្នាំ​២០២២ រដ្ឋមន្ត្រី​ក្រសួង​មហាផ្ទៃ លោក ស ខេង ថ្លែង​ថា បើ​ឧត្តមសេនីយ៍ យស ផន ចង់​រក្សា​តំណែង​ជា​គ្រូ​នគរបាល​ជាតិ​បន្ត​ទៀត ត្រូវ​ប្រគល់​ដី​ជូន​រដ្ឋ​វិញ ប៉ុន្តែ​បើ​មិន​ប្រគល់​ដី​នោះ​មក​វិញ​ទេ ត្រូវ​ដក​ចេញពី​ក្របខ័ណ្ឌ​នគរបាល ហើយ​ប្រឈម​នឹង​ផ្លូវ​ច្បាប់​ថែម​ទៀត​ផង។

លោក​បញ្ជាក់​ថា ទោះបីជា​ដី​នោះ​ត្រូវ​រដ្ឋ​យក​វិញ​ក៏​ពិត​មែន តែ​ក្រសួង​នឹង​កាត់​ឆ្វៀល​ដី​មួយ​ចំណែក​ប្រគល់​ឲ្យ​លោក យស ផន ដើម្បី​អាច​យក​ទៅ​ធ្វើ​ផ្ទះ​សម្រាប់​ស្នាក់នៅ​ដែរ ប៉ុន្តែ​បើ​ឧត្តមសេនីយ៍ យស ផន នៅ​រឹង​ទទឹង​ដោយ​មិន​ព្រម​ប្រគល់​ដី​ដែល​លោក​យក​នោះ​មក​ឲ្យ​រដ្ឋ​វិញ​ទេ នោះ​ឧត្ដមសេនីយ៍​រូប​នេះ​ត្រូវ​ដើរ​ចេញពី​ក្របខ័ណ្ឌ​នគរបាល ដោយសារ​បាន​រំលោភ​ដី​សាធារណៈ​របស់​រដ្ឋ។

ការ​ព្រមាន​នេះ ក្រោយពី​នាយក​សាលា​នគរបាល​ជាតិ​ភូមិភាគ​១ លោក អ៊ុក សារ៉ាយ បាន​បង្ហាញ​របាយការណ៍​ទៅ​លោក ស ខេង ថា ឧត្តមសេនីយ៍ យស ផន កំពុង​មាន​ទំនាស់​ដីធ្លី​ជាមួយ​សាលា ដែល​ទំនាស់​នេះ​បាន​កើតឡើង​តាំងពី​ឆ្នាំ​២០១៣ មក​ម្ល៉េះ ហើយ​រហូត​មក​ដល់​បច្ចុប្បន្ន​នេះ មិន​ទាន់​ដោះស្រាយ​ចប់​នៅឡើយ ខណៈ​វិវាទ​នេះ​ដោះស្រាយ​ទាំង​ផ្លូវ​រដ្ឋបាល​ផង និង​ផ្លូវ​តុលាការ​ផង។

បើ​តាម​នាយក​សាលា​នគរបាល​ជាតិ​ភូមិភាគ​១ លោក អ៊ុក សារ៉ាយ បញ្ជាក់​ថា ឧត្តមសេនីយ៍ យស ផន ជា​អតីត​នាយក​សាលា ហើយ​បច្ចុប្បន្ន​លោក​ជា​គ្រូ​នគរបាល​ជាតិ​នៅ​បណ្ឌិត្យសភា​នគរបាល​កម្ពុជា។

សាលា​នគរបាល​ជាតិ​ភូមិភាគ​១ ត្រូវ​បាន​បង្កើត​ឡើង​កាលពី​ឆ្នាំ​២០០១ និង​ចាប់ផ្ដើម​ការ​បណ្ដុះបណ្ដាល​នៅ​ឆ្នាំ​២០០២ ហើយ​ទទួល​បណ្ដុះបណ្ដាល​មន្ត្រី និង​សិស្ស​នគរបាល​មកពី​ខេត្ត​ស្ទឹងត្រែង ក្រចេះ រតនគិរី និង​ខេត្ត​មណ្ឌលគិរី ជា​បន្តបន្ទាប់ ក្នុង​នោះ​សាលា​បាន​បណ្ដុះបណ្ដាល​នគរបាល​សរុប​ចំនួន​ជិត ៦​ពាន់​នាក់​ហើយ (៥៨៧៦​នាក់) រហូត​ដល់​សព្វថ្ងៃ​នេះ។

កាលពី​ថ្ងៃទី​១៩ ខែ​សីហា កន្លងមក លោក ស ខេង ក៏​បាន​បញ្ចប់​មុខតំណែង​អនុរដ្ឋលេខាធិការ​ម្នាក់ ដើម្បី​ជំរុញ​ប្រសិទ្ធភាព​កំណែ​ទម្រង់​នគរបាល​ជាតិ ក្រោយ​រក​ឃើញ​ថា មន្ត្រី​រូប​នោះ​បាន​ប្រព្រឹត្ត​អំពើពុករលួយ​ដើរ​សន្យា​លក់​ក្របខ័ណ្ឌ​នគរបាល​ជាតិ​ជា​ថ្នូរ​នឹង​ទទួល​បាន​ប្រាក់​ក្នុង​តម្លៃ​ពី ១​ម៉ឺន​ទៅ ២​ម៉ឺន​ដុល្លារ ដែល​ទង្វើ​នេះ​បាន​ធ្វើ​ឱ្យ​ប៉ះពាល់​មុខមាត់​ក្រសួង។

សារព័ត៌មាន The Cambodia Daily នៅ​មិនទាន់​អាច​ទាក់ទង​អតីត​នាយក​សាលា​នគរបាល​ជាតិ​ភូមិភាគ​១ ខេត្ត​ស្ទឹងត្រែង លោក យស ផន ដើម្បី​សុំ​ការ​បំភ្លឺ​ជុំវិញ​បញ្ហា​នេះ​បាន​នៅឡើយ​ទេ​រហូត​ដល់​ម៉ោង​ផ្សាយ​នេះ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស