ធនាគារជាតិនៃកម្ពុជា កំពុងសហការជាមួយសមត្ថកិច្ចពាក់ព័ន្ធ ដើម្បីចាត់វិធានការលើអ្នកដែលផ្សព្វផ្សាយព័ត៌មាន និងផ្តល់កម្ចីខុសច្បាប់ ខណៈអង្គការលីកាដូរកឃើញថា ការផ្ដល់ប្រាក់កម្ចីតាមអនឡាញ និងការជំរិតទារប្រាក់ខុសច្បាប់កំពុងដាក់សម្ពាធលើស្ត្រីជាអ្នកខ្ចីនៅកម្ពុជា។
សេចក្តីជូនដំណឹងរបស់ធនាគារជាតិនៃកម្ពុជា បានចេញកាលពីថ្ងៃទី២៥ ខែសីហា ឆ្នាំ២០២២ ឲ្យដឹងថា ការផ្តល់ឥណទានដោយក្រុមហ៊ុន ឬបុគ្គលដោយគ្មានអាជ្ញាប័ណ្ណ គឺជាសកម្មភាពល្មើសច្បាប់ ជាពិសេសច្បាប់ស្ដីពីគ្រឹះស្ថានធនាគារ និងហិរញ្ញវត្ថុ។
ធនាគារជាតិនៃកម្ពុជា អះអាងថា បច្ចុប្បន្ន ជនខិលខូចមួយចំនួនបានផ្សព្វផ្សាយដោយបើកចំហចំពោះការផ្តល់ឥណទានដល់ពលរដ្ឋតាមរូបភាពផ្សេងៗជាច្រើន ដូចជាតាមប្រព័ន្ធអនឡាញ បណ្ដាញសង្គម ការផ្សព្វផ្សាយតាមខិត្តប័ណ្ណ និងការបិទផ្សាយតាមទីកន្លែងសាធារណៈជាដើម។
សេចក្តីជូនដំណឹងដដែលបញ្ជាក់ថា គ្រឹះស្ថានធនាគារ និងហិរញ្ញវត្ថុដែលទទួលបានអាជ្ញាប័ណ្ណធ្វើអាជីវកម្មពីធនាគារជាតិនៃកម្ពុជា ក្នុងនោះរួមមានធនាគារពាណិជ្ជ ធនាគារឯកទេស គ្រឹះស្ថានមីក្រូហិរញ្ញវត្ថុទទួលប្រាក់បញ្ញើ គ្រឹះស្ថានមីក្រូហិរញ្ញវត្ថុ និងគ្រឹះស្ថានឥណទានជនបទ ហើយគ្រឹះស្ថានទាំងនេះជាគ្រឹះស្ថានស្របច្បាប់ និងផ្លូវការដែលផ្តល់ឥណទាន ឬសេវាផ្សេងៗដល់ក្រុមហ៊ុន សហគ្រាស និងឯកជនបាន។
ធនាគារជាតិបន្តថា គ្រឹះស្ថានទាំងនេះបានស្ថិតនៅក្រោមការត្រួតពិនិត្យដោយធនាគារជាតិនៃកម្ពុជា ហើយអតិថិជនរបស់គ្រឹះស្ថានទាំងនោះក៏ត្រូវបានការពារដោយច្បាប់។
ធនាគារជាតិនៃកម្ពុជា បានថ្កោលទោសចំពោះការផ្សព្វផ្សាយព័ត៌មាន និងការផ្តល់ឥណទានក្រៅផ្លូវការដោយខុសច្បាប់គ្រប់រូបភាព។ ធនាគារជាតិកម្ពុជា ក៏បានអំពាវនាវដល់ពលរដ្ឋឲ្យប្រុងប្រយ័ត្នខ្ពស់ ដើម្បីជៀសវាងការចាញ់បោកតាមរូបភាពណាមួយ ឬផលលំបាកផ្សេងៗពីការទទួលបានសេវាផ្តល់ឥណទានក្រៅផ្លូវការនេះ ដោយធនាគារជាតិលើកទឹកចិត្តឲ្យពលរដ្ឋប្រើប្រាស់តែសេវារបស់គ្រឹះស្ថានណាដែលផ្លូវការ និងស្របច្បាប់។
ក្រៅពីថ្កោលទោស និងអំពាវនាវហើយ ធនាគារជាតិបញ្ជាក់ថា ខ្លួនកំពុងសហការជាមួយអាជ្ញាធរមានសមត្ថកិច្ចដែលពាក់ព័ន្ធ ដើម្បីចាត់វិធានការតាមផ្លូវច្បាប់ចំពោះក្រុមហ៊ុន ឬបុគ្គលដែលធ្វើសកម្មភាពល្មើសច្បាប់នានាតាមនីតិវិធីច្បាប់ជាធរមាន។
ប្រធាននាយកដ្ឋានទំនាក់ទំនង និងជាអ្នកនាំពាក្យសមាគមមីក្រូហិរញ្ញវត្ថុកម្ពុជា លោក កាំង តុងងី បានប្រាប់បណ្ដាញសារព័ត៌មានក្នុងស្រុកថា ការផ្តល់កម្ចីក្រៅប្រព័ន្ធនេះវាបានបង្កផលប៉ះពាល់ច្រើនទៅដល់សមាជិកមីក្រូហិរញ្ញវត្ថុកម្ពុជា ឬគ្រឹះស្ថានមីក្រូហិរញ្ញវត្ថុផ្លូវការ និងប៉ះពាល់ពលរដ្ឋធ្ងន់ធ្ងរ។ លោកបន្តថា កម្ចីមិនផ្លូវការ ឬខុសច្បាប់មានការប្រាក់ខ្ពស់ ហើយនៅពេលដែលអតិថិជនគ្មានលទ្ធភាពបង់សង គឺពួកគេតែងតែរងការគំរាមកំហែង និងការរឹបអូសទ្រព្យសម្បត្តិ ហើយករណីទាំងនេះបានកើតមានឡើងជាច្រើនណាស់មកហើយ។
ការប្រកាសរបស់ធនាគារជាតិនៃកម្ពុជា ស្របពេលដែលអង្គការលីកាដូ បានចេញរបាយការណ៍មួយកាលពីថ្ងៃទី១ ខែសីហា ឆ្នាំ២០២២ ក្រោមចំណងជើងថា «ត្រូវក្លាហាននិយាយពីប្រាក់កម្ចីអនឡាញ និងការជំរិតទារប្រាក់ខុសច្បាប់»។
របាយការណ៍នោះបានបង្ហាញថា កម្ចីប្រាក់អនឡាញដោយមានការប្រាក់ខ្ពស់ កំពុងដាក់គោលដៅលើស្ត្រីខ្មែរនៅលើបណ្ដាញសង្គមហ្វេសប៊ុក និងតេឡេក្រាម ដោយទាញអ្នកទាំងនោះឲ្យធ្លាក់ក្នុងបំណុលវ័ណ្ឌក និងការជំរិតទារប្រាក់តាមរយៈការប្រើប្រាស់រូបភាព និងវីដេអូអាក្រាតរបស់ជនរងគ្រោះ។
អង្គការការពារសិទ្ធិមនុស្ស ក៏បានស្នើទៅនាយកដ្ឋានប្រឆាំងបទល្មើសបច្ចេកវិទ្យានៃក្រសួងមហាផ្ទៃ ធ្វើការស៊ើបអង្កេតឱ្យបានហ្មត់ចត់ និងឆាប់រហ័ស ដើម្បីធានាយុត្តិធម៌ស្របតាមច្បាប់ជាធរមាន។
អង្គការលីកាដូចាត់ទុកករណីនេះថាជាការរំលោភសិទ្ធិមនុស្ស និងបានស្នើទៅអាជ្ញាធរចាត់វិធានការច្បាប់លើការផ្ដល់កម្ចីផ្លូវការ និងមិនផ្លូវការឲ្យបានត្រឹមត្រូវ និងផ្ដល់សេវាសង្គមជាមូលដ្ឋានពិតប្រាកដ ទើបបញ្ឈប់ការផ្ដល់កម្ចីខុសច្បាប់ទាំងអស់នោះបាន បើមិនដូច្នេះទេ ការផ្ដល់ប្រាក់កម្ចីបែបកេងប្រវ័ញ្ច នឹងបន្តកើតមាននៅក្នុងប្រទេសកម្ពុជា៕