រដ្ឋមន្ត្រីក្រសួងមហាផ្ទៃ លោក ស ខេង អះអាងថា សមត្ថកិច្ចបន្តរកឃើញឧក្រិដ្ឋជនជួញដូរមនុស្សនៅខេត្តព្រះសីហនុ សុទ្ធសឹងតែកាន់កាប់អាវុធដោយខុសច្បាប់ ខណៈជនរងគ្រោះដែលត្រូវបានចាប់បង្ខាំងរងការគំរាមកំហែង និងអំពើហិង្សា។
រដ្ឋមន្ត្រីក្រសួងមហាផ្ទៃ លោក ស ខេង បានសរសេរលើហ្វេសប៊ុករបស់លោកកាលពីថ្ងៃទី២៧ ខែសីហា ឆ្នាំ២០២២ ថា ប្រតិបត្តិការស្រាវជ្រាវនៅថ្ងៃទី២៣ ខែសីហា ឆ្នាំ២០២២ កម្លាំងសមត្ថកិច្ចបានឃាត់ខ្លួនជនសង្ស័យជនជាតិចិនចំនួន ៨នាក់ជាបន្តបន្ទាប់ ក្នុងនោះកម្លាំងសមត្ថកិច្ចបានដកហូតបានអាវុធខ្លីម៉ាក ZORAKI ចំនួន ១ដើម។ លោកបញ្ជាក់ថា ប្រតិបត្តិការ និងការស្រាវជ្រាវនេះ សមត្ថកិច្ចរំដោះបានជនរងគ្រោះម្នាក់ជាស្ត្រីជនជាតិម៉ាឡេស៊ី ចេញពីក្នុងក្រុមហ៊ុនមួយកន្លែងស្ថិតនៅភូមិគគីរ ឃុំបិតត្រាំង ស្រុកព្រៃនប់ ខេត្តព្រះសីហនុ។
លោកបន្តថា ជនរងគ្រោះដែលរំដោះនោះ បានប្រាប់សមត្ថកិច្ចថា ខ្លួនត្រូវបានគេចាប់បង្ខាំងដោយខុសច្បាប់ រងនូវការប្រើអំពើហិង្សា ព្រមទាំងរងនូវការគំរាមកំហែងយកជួញដូរកម្លាំងពលកម្ម និងកាន់កាប់អាវុធដោយខុសច្បាប់ថែមទៀត។
ទោះបីជាយ៉ាងណា សមត្ថកិច្ចបានបន្តស្រាវជ្រាវពីប្រភពអាវុធខ្លីនោះរហូតដល់ថ្ងៃទី២៦ ខែសីហា ឆ្នាំ២០២២ បានឈានដល់ការបង្ក្រាបជនសង្ស័យជួញដូរអាវុធចំនួន ៣នាក់ ក្នុងនោះជនជាតិខ្មែរ ២នាក់ និងជនជាតិចិនម្នាក់ ព្រមទាំងដកហូតបានវត្ថុតាងអាវុធមួយចំនួនបន្ថែមទៀត។ ករណីនេះ លោកថាកម្លាំងជំនាញសមត្ថកិច្ចបានឃាត់ខ្លួនជនសង្ស័យជាបុរសចំនួន ១១នាក់ ក្នុងនោះជនជាតិចិន ៩នាក់ និងជនជាតិខ្មែរ ២នាក់ ព្រមទាំងដកហូតបានអាវុធវែង ២ដើម អាវុធខ្លី ៤ដើម គ្រាប់កាំភ្លើងចំនួន ២៦៥គ្រាប់ រថយន្ត ៤គ្រឿង និងសម្ភារៈផ្សេងៗមួយចំនួនផងដែរ។
ជាងនេះទៅទៀត កម្លាំងជំនាញនៃស្នងការដ្ឋាននគរបាលខេត្តព្រះសីហនុ ក៏បានចុះអនុវត្តតាមបណ្ដឹងរាយការណ៍ចូលប្រព័ន្ធ Hotline បានស្រាវជ្រាវរំដោះបានជនរងគ្រោះចំនួន ៥នាក់ជាជនជាតិម៉ាឡេស៊ី នៅក្រុមហ៊ុនមួយកន្លែងស្ថិតក្នុងភូមិ៤ សង្កាត់៤ ក្រុង-ខេត្តព្រះសីហនុ ខណៈបុរសអ្នកគ្រប់គ្រងដែលជាជនជាតិម៉ាឡេស៊ីត្រូវបានឃាត់ខ្លួនដើម្បីសាកសួរ។
លោក ស ខេង អះអាងថា ជនរងគ្រោះ និងជនសង្ស័យទាំងនេះត្រូវបានសមត្ថកិច្ចនៃស្នងការដ្ឋាននគរបាលខេត្តព្រះសីហនុ បញ្ជូនទៅកាន់អគ្គស្នងការដ្ឋាននគរបាលជាតិ និងអគ្គនាយកដ្ឋានអន្តោប្រវេសន៍ដើម្បីបន្តអនុវត្តទៅតាមផ្លូវច្បាប់។
កាលពីរសៀលថ្ងៃទី២៦ ខែសីហា ឆ្នាំ២០២២ ក្រសួងមហាផ្ទៃបានបង្ហាញរបាយការណ៍ទាក់ទងការជួញដូរ និងរត់ពន្ធមនុស្សគិតចាប់ពីថ្ងៃទី១ ខែមករា ដល់ថ្ងៃទី២០ ខែសីហា ឆ្នាំ២០២២ នេះ សមត្ថកិច្ចកម្ពុជាបានរកឃើញ និងជួយសង្គ្រោះជនបរទេសចំនួន ៨៧ករណី ឬស្មើប្រមាណ ៨៦៥នាក់ និងបានកសាងសំណុំរឿងបញ្ជូនទៅតុលាការចំនួន ១៧ករណីដែលមានជនសង្ស័យចំនួន ៦០នាក់។
បើតាមរបាយការណ៍ក្រសួងការបរទេសសហរដ្ឋអាមេរិក បានចង្អុលបង្ហាញអំពីប្រតិបត្តិការឆបោកតាមអ៊ីនធឺណិតដែលជាប្រភេទប្រតិបត្តិការឆបោកទង់ក្រហម (Red Flags Scam Operations) នៃការជួញដូរជនបរទេសចូលមកក្នុងប្រទេសកម្ពុជា ដែលកំពុងមានការកើនឡើង៕