27 C
Phnom Penh

សាលា​ឧទ្ធរណ៍​នឹង​បើក​សវនាការ​បណ្តឹង​សុំ​នៅ​ក្រៅ​ឃុំ​របស់​កញ្ញា សេង ធារី នៅ​ថ្ងៃទី​០១ កញ្ញា

ដោយ ឌឹ ខេមបូឌា ដេលី

បទវិភាគ

សកម្មជន​សិទ្ធិមនុស្ស កញ្ញា សេង ធារី នឹង​ត្រូវ​ចូលរួម​សវនាការ​នៅ​សាលា​ឧទ្ធរណ៍​ក្រុង​ភ្នំពេញ​លើ​បណ្តឹង​សុំ​នៅ​ក្រៅ​ឃុំ​នៅ​ថ្ងៃទី​០១ ខែ​កញ្ញា ឆ្នាំ​២០២២ នេះ បន្ទាប់ពី​កញ្ញា​ត្រូវ​បាន​សាលាដំបូង​ផ្ដន្ទាទោស​ឱ្យ​ជាប់​ពន្ធនាគារ​រយៈពេល ៦​ឆ្នាំ ពី​បទ «រួម​គំនិត​ក្បត់ និង​ញុះញង់»។

សវនាការ​នេះ​ធ្វើឡើង​បន្ទាប់ពី​កញ្ញា សេង ធារី ត្រូវ​សាលាដំបូង​ផ្ដន្ទាទោស​ឱ្យ​ជាប់​ពន្ធនាគារ​រយៈពេល ៦​ឆ្នាំ ពី​បទ​រួម​គំនិត​ក្បត់ និង​ញុះញង់ កាលពី​ពាក់កណ្តាល​ខែ​មិថុនា កន្លងទៅ​នេះ។

អ្នក​នាំពាក្យ​សមាគម​ការពារ​សិទ្ធិមនុស្ស​អាដហុក លោក ស៊ឹង សែនករុណា បាន​ប្រាប់​សារព័ត៌មាន The Cambodia Daily នៅ​ថ្ងៃ​ទី​៣០ សីហា នេះ​ថា សំណុំរឿង​របស់​កញ្ញា សេង ធារី គឺជា​រឿង​នយោបាយ ហើយ​ក្នុង​ពេល​ដែល​ស្ថានភាព​នយោបាយ​នៅ​កម្ពុជា​កំពុងតែ​ឡើង​កម្តៅ​នៅ​ពេលនេះ ក្រុម​សង្គម​ស៊ីវិល​មិន​សង្ឃឹម​ថា កញ្ញា​នឹង​ទទួល​បាន​សិទ្ធិ​នៅ​ក្រៅ​ឃុំ ឬ​មាន​ការ​ទម្លាក់​ចោល​នូវ​បទ​ចោទប្រកាន់​ពី​តុលាការ​នោះ​ទេ។

លោក ស៊ឹង សែនករុណា អំពាវនាវ​ឱ្យ​តុលាការ​ពិចារណា​ឡើងវិញ​លើ​ការ​កាត់ទោស​សកម្មជន​សិទ្ធិមនុស្ស​រូប​នេះ ដើម្បី​ឱ្យ​កញ្ញា​បាន​នៅ​ក្រៅ​ឃុំ ស្រប​ពេល​ដែល​មជ្ឈដ្ឋាន​អន្តរជាតិ​ក៏​បាន​ស្នើ​ឱ្យ​មាន​ការ​ទម្លាក់​ចោល​បទចោទ​លើ​កញ្ញា​ផង​ដែរ ខណៈ​អង្គការ​សង្គម​ស៊ីវិល​ដែល​ធ្វើការ​លើ​វិស័យ​សិទ្ធិមនុស្ស ក៏​ចង់​ឃើញ​ពី​លទ្ធផល​នេះ​ដែរ។

មន្ត្រី​សង្គម​ស៊ីវិល​ដែល​ទទួល​បន្ទុក​សិទ្ធិមនុស្ស​រូប​នេះ​បញ្ជាក់​ថា ប្រសិនបើ​តុលាការ​អាច​ទម្លាក់​ចោល​បទ​ចោទ​លើ​កញ្ញា សេង ធារី នោះ​គឺជា​ឱកាស​មួយ​បង្ហាញ​ថា ការ​អនុវត្ត​សិទ្ធិមនុស្ស​នៅ​កម្ពុជា​ក៏​មាន​ការ​ប្រែប្រួល និង​មាន​ភាព​ប្រសើរ​ឡើង​ដែរ ខណៈ​ប្រព័ន្ធ​យុត្តិធម៌​នៅ​កម្ពុជា​ក៏​អាច​នឹង​ទទួល​បាន​ការ​ទុកចិត្ត​ពី​ពលរដ្ឋ​ថែម​ទៀត។

សកម្មជន​សិទ្ធិមនុស្ស កញ្ញា សេង ធារី ត្រូវ​បាន​អាជ្ញាធរ​ក្រុង​ភ្នំពេញ​ចាប់​ខ្លួន​ភ្លាមៗ​បន្ទាប់ពី​តុលាការ​ប្រកាស​សាលក្រម​ផ្ដន្ទាទោស​ដាក់​ពន្ធនាគារ​កាលពី​ថ្ងៃទី​១៤ ខែ​មិថុនា ឆ្នាំ​២០២២ ដោយ​យក​ទៅ​ឃុំ​ខ្លួន​នៅ​ពន្ធនាគារ​ខេត្ត​ព្រះវិហារ ជាប់​ព្រំដែន​ប្រទេស​ថៃ បន្ទាប់ពី​បាន​ឃុំ​ខ្លួន​កញ្ញា​នៅ​មណ្ឌល​អប់រំ​កែប្រែ​ទី​២ ក្នុង​ទីក្រុង​ភ្នំពេញ​បាន​មួយ​យប់។

កាលពី​ថ្ងៃទី​២២ ខែ​សីហា ឆ្នាំ​២០២២ សកម្មជន​សិទ្ធិមនុស្ស កញ្ញា សេង ធារី បាន​ទាមទារ​ឱ្យ​ផ្លាស់ប្ដូរ​ការ​ឃុំ​ខ្លួន​កញ្ញា​ពី​ខេត្ត​ព្រះវិហារ មក​ឃុំ​ខ្លួន​នៅ​ក្នុង​ពន្ធនាគារ​ព្រៃស​ក្នុង​ទីក្រុង​ភ្នំពេញ​វិញ។ កញ្ញា​អះអាង​ថា ការ​ឃុំ​ក្នុង​ពន្ធនាគារ​ខេត្ត​ព្រះវិហារ កញ្ញា​មាន​អារម្មណ៍​ឯកោ​ណាស់ ព្រោះ​ថា​ខេត្ត​នេះ គឺជា​ខេត្ត​ដែល​ឆ្ងាយ​ដាច់​សង្វែង​ពី​ទីក្រុង​ភ្នំពេញ ដែល​មាន​ការ​ពិបាក​សម្រាប់​អ្នក​ដែល​ចង់​ទៅ​សួរ​សុខទុក្ខ​កញ្ញា។

ទាក់ទិន​នឹង​បញ្ហា​នេះ កាលពី​ថ្ងៃទី​២៦ ខែ​សីហា ឆ្នាំ​២០២២ អ្នក​រាយការណ៍​ពិសេស​អង្គការ​សហប្រជាជាតិ​ទទួល​បន្ទុក​សិទ្ធិមនុស្ស​ប្រចាំ​កម្ពុជា លោក វីទិត ម៉ុនតាប៊ន (Vitit Muntarbhorn) បាន​រិះគន់​ថា បញ្ហា​នៃ​ការ​គោរព​សិទ្ធិមនុស្ស និង​ប្រជាធិបតេយ្យ​នៅតែ​ជា​បញ្ហា​ប្រឈម​របស់​កម្ពុជា ដែល​គេ​ត្រូវ​រួម​គ្នា​ដោះស្រាយ ហើយ​លោក​ចង់​ឃើញ​រដ្ឋាភិបាល​បើក​លំហ​សេរីភាព​ពលរដ្ឋ និង​នយោបាយ​ឱ្យ​កាន់តែ​ទូលំទូលាយ​សម្រាប់​ពលរដ្ឋ​ខ្មែរ​ទូទៅ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស