25 C
Phnom Penh

មេធាវី​ខកចិត្ត​ដែល​សាលា​ឧទ្ធរណ៍​ភ្នំពេញ​សម្រេច​មិន​ដោះលែង​កញ្ញា សេង ធារី

ដោយ ឌឹ ខេមបូឌា ដេលី

បទវិភាគ

មេធាវី​ការពារ​ក្ដី​ឲ្យ​កញ្ញា សេង ធារី បង្ហាញ​ការ​ខកចិត្ត​ដែល​សាលា​ឧទ្ធរណ៍​រាជធានី​ភ្នំពេញ​សម្រេច​បន្ត​ឃុំ​ខ្លួន​កញ្ញា​នៅ​ពន្ធនាគារ​ដូច​តុលាការ​ថ្នាក់​ក្រោម​សម្រេច និង​មិន​ឲ្យ​មន្ត្រី​ពន្ធនាគារ​ដឹក​កូនក្ដី​មក​ចូលរួម​សវនាការ។

សាលា​ឧទ្ធរណ៍​រាជធានី​ភ្នំពេញ នា​ព្រឹក​ថ្ងៃ​ទី​១ កញ្ញា នេះ បាន​បើក​សវនាការ​បណ្ដឹង​ឧទ្ធរណ៍​មេធាវី​កញ្ញា សេង ធារី ដែល​ប្ដឹង​ប្រឆាំង​នឹង​សេចក្ដី​សម្រេច​សាលាដំបូង​រាជធានី​ភ្នំពេញ​ដោយ​មិន​អនុញ្ញាត​ឲ្យ​កូនក្ដី​នៅ​ក្រៅ​ឃុំ​បណ្ដោះអាសន្ន។

មេធាវី​ការពារ​ក្ដី​ឱ្យ​កញ្ញា សេង ធារី គឺ​លោក ជូង ជូងី បាន​លើកឡើង​ក្នុង​បន្ទប់​សវនាការ​ដោយ​សម្ដែង​ការ​ខកចិត្ត​ចំពោះ​តុលាការ​ជាន់ខ្ពស់​ដែល​មិន​ឲ្យ​មន្ត្រី​ពន្ធនាគារ​ដឹក​កូនក្ដី​មក​ចូលរួម​សវនាការ ដោយ​លោក​ចាត់ទុក​ថា​ជា​ការ​រំលោភ​សិទ្ធិ​កូនក្ដី​ធ្ងន់ធ្ងរ។

ប្រធាន​ក្រុមប្រឹក្សា​ជំនុំជម្រះ​សាលា​ឧទ្ធរណ៍ មិន​បាន​ឆ្លើយតប​ចំពោះ​ការ​លើកឡើង​របស់​លោក ជូង ជូងី ឡើយ។

បន្ទាប់ពី​បើក​សវនាការ​ដេញដោល​ដោយ​មិន​មាន​វត្តមាន​កញ្ញា សេង ធារី ជិត​មួយ​ម៉ោង ព្រះរាជអាជ្ញា​សាលា​ឧទ្ធរណ៍ លោក អ៊ឹម សុផាន បាន​ធ្វើ​សេចក្ដី​សន្និដ្ឋាន​ដោយ​ស្នើ​ទៅ​ចៅក្រម​ឱ្យ​តម្កល់​សាលក្រម​សាលាដំបូង​រាជធានី​ភ្នំពេញ​ទុក​ជា​បាន​ការ​ដដែល។

ព្រះរាជអាជ្ញា​រូប​នេះ​ថា ការ​ស្នើសុំ​នៅ​ក្រៅ​ឃុំ​របស់​លោក ជូង ជូងី គ្មាន​មូលដ្ឋាន​ច្បាប់​ជាក់លាក់ ខណៈ​កញ្ញា សេង ធារី ក៏​ត្រូវ​បាន​សាលាដំបូង​រាជធានី​ភ្នំពេញ​ផ្ដន្ទាទោស​ដាក់​ពន្ធនាគារ​ដោយ​គ្មាន​ការ​ព្យួរ​ទោស។

ឆ្លើយតប​នឹង​ព្រះរាជអាជ្ញា លោក ជូង ជូងី ថា​កូនក្ដី​របស់​លោក​គ្មាន​ទោស​ឡើយ នៅ​ពេល​ដែល​សាលក្រម​សាលាដំបូង​រាជធានី​ភ្នំពេញ​មិន​ទាន់​ចូល​ជា​ស្ថាពរ។ លោក​ស្នើ​ទៅ​ចៅក្រម​ដោះលែង​កូនក្ដី​ឲ្យ​មាន​សេរីភាព​វិញ ព្រោះ​សកម្មភាព​កូនក្ដី​ធ្វើ ជា​ការ​សម្ដែង​មតិ មិនមែន​ជា​បទល្មើស​ដូច​ការ​ចោទប្រកាន់​របស់​ចៅក្រម​សាលាដំបូង​រាជធានី​ភ្នំពេញ​ឡើយ។

ក្រោយពី​ស្ដាប់​សេចក្ដី​សន្និដ្ឋាន​ព្រះរាជអាជ្ញា និង​មេធាវី​ការពារ​ក្ដី​កញ្ញា សេង ធារី ហើយ​នោះ ប្រធាន​ក្រុមប្រឹក្សា​សាលា​ឧទ្ធរណ៍​សម្រេច​ប្រកាស​សាលដីកា​ភ្លាមៗ​ដោយ​បន្ត​ឃុំ​ខ្លួន​កញ្ញា សេង ធារី ក្នុង​ពន្ធនាគារ​ដដែល។

មន្ត្រី​ការពារ​សិទ្ធិមនុស្ស​នៃ​សមាគម​អាដហុក លោក យី សុខសាន្ត ដែល​ឃ្លាំមើល​ពី​ដំណើរការ​សវនាការ​នេះ យល់​ឃើញ​ថា ការ​មិន​បញ្ជូន​កញ្ញា សេង ធារី មក​តតាំង​ក្ដី​នៅ​ចំពោះ​តុលាការ​នេះ​ជា​ការ​រំលោភ​នីតិវិធី។ លោក​បន្ត​ថា ការ​បន្ត​ឃុំ​ខ្លួន​កញ្ញា សេង ធារី នៅ​ពន្ធនាគារ​ទៀត នឹង​ធ្វើ​ឱ្យ​ប៉ះពាល់​ដល់​មុខមាត់​រដ្ឋាភិបាល​កម្ពុជា ដោយសារ​សកម្មភាព​របស់​កញ្ញា សេង ធារី ជា​ការ​សម្ដែង​មតិ។

ក្នុង​ដំណើរ​ទស្សនកិច្ច​នៅ​កម្ពុជា​កាលពី​ដើម​ខែ​សីហា រដ្ឋមន្ត្រី​ការបរទេស​សហរដ្ឋ​អាមេរិក លោក អែនតូនី ប្លីងខិន (Antony J. Blinken) ក៏​បាន​ទទូច​ឲ្យ​លោក ហ៊ុន សែន ដោះលែង​កញ្ញា សេង ធារី មេធាវី​ខ្មែរ​សញ្ជាតិ​អាមេរិកាំង​ដែល​ត្រូវ​បាន​សមត្ថកិច្ច​កម្ពុជា​ចាប់​ឃុំ​ខ្លួន និង​ដែល​អាមេរិក​ចាត់ទុក​ថា​ជា​ការ​ចាប់​ឃុំ​ខ្លួន​ក្រោម​ហេតុផល​នយោបាយ។

កញ្ញា សេង ធារី និង​ថ្នាក់​ដឹកនាំ ព្រមទាំង​អ្នកគាំទ្រ​គណបក្ស​សង្គ្រោះ​ជាតិ​ប្រមាណ ៥០​នាក់ ត្រូវ​បាន​លោក រស់ ពិសិដ្ឋ ចៅក្រម​ជំនុំជម្រះ​នៃ​សាលាដំបូង​រាជធានី​ភ្នំពេញ ផ្ដន្ទាទោស​ដាក់​ពន្ធនាគារ ៦​ឆ្នាំ ខណៈ​ចន្លោះ​ពី ៥ ទៅ ៨​ឆ្នាំ ក្រោម​បទ​ចោទប្រកាន់ «ញុះញង់ និង​រួម​គំនិត​ក្បត់» ជុំវិញ​ការ​ប្រកាស​ជំហរ​គាំទ្រ​ការ​ធ្វើ​មាតុភូមិ​និវត្តន៍​ថ្ងៃ​ទី​៩ វិច្ឆិកា របស់​លោក សម រង្ស៊ី។

កញ្ញា សេង ធារី ដែល​មាន​សញ្ជាតិ​អាមេរិកាំង ត្រូវ​បាន​សមត្ថកិច្ច​រាជធានី​ភ្នំពេញ​បញ្ជូន​កញ្ញា​ចេញពី​ពន្ធនាគារ​ព្រៃស​រាជធានី​ភ្នំពេញ ទៅ​ឃុំ​នៅ​ពន្ធនាគារ​ខេត្ត​ព្រះវិហារ កាលពី​ថ្ងៃទី​១៥ ខែ​មិថុនា ឆ្នាំ​២០២២ ក្រោយពី​សាលាដំបូង​រាជធានី​ភ្នំពេញ​កាត់ទោស​លើ​កញ្ញា៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស