មន្ត្រីជាន់ខ្ពស់នៃក្រសួងការពារជាតិកម្ពុជា អះអាងថា ប៉ុន្មានឆ្នាំចុងក្រោយនេះ អាមេរិកបានចោទកម្ពុជាជាបន្តបន្ទាប់ថាអនុញ្ញាតឲ្យចិនតាំងមូលដ្ឋានកងទ័ពជើងទឹកនៅតំបន់រាម ជាការជ្រៀតជ្រែកកិច្ចការផ្ទៃក្នុងរបស់កម្ពុជា។
រដ្ឋមន្ត្រីក្រសួងការពារជាតិកម្ពុជា លោក ទៀ បាញ់ បានលើកឡើងក្នុងពិធីប្រគល់ និងទទួលរថយន្ត ១៥០គ្រឿងដែលជាជំនួយឥតសំណងរបស់ក្រសួងការពារជាតិចិន ដល់ក្រសួងការពារជាតិកម្ពុជា កាលពីថ្ងៃទី១ ខែកញ្ញា ឆ្នាំ២០២២ នេះថា កម្ពុជាមានសិទ្ធិគ្រប់គ្រាន់ក្នុងការកសាងទំនើបកម្មនៅក្នុងមូលដ្ឋានសមុទ្ររាម ហើយការចោទប្រកាន់ថាកម្ពុជាអនុញ្ញាតឱ្យចិនតាំងមូលដ្ឋានទ័ពនៅក្នុងប្រទេស គឺជាអ្នកដែលមានភ្នែកល្អ តែធ្វើខ្វាក់តែប៉ុណ្ណោះ។
រដ្ឋមន្ត្រីក្រសួងការពារជាតិកម្ពុជារូបនេះអះអាងថា ការកសាងទំនើបកម្មសមុទ្ររាមនេះ គឺដើម្បីបង្កើនសមត្ថភាពរបស់កងទ័ពជើងទឹកកម្ពុជា ឱ្យកាន់តែរីកចម្រើនបន្ថែមទៀតប៉ុណ្ណោះ ហើយការចោទប្រកាន់ថាមូលដ្ឋានជើងទឹករាមនេះបានដាក់ជាមូលដ្ឋានកងទ័ពចិននោះ វាគឺជាការញុះញង់បង្កើតបញ្ហាដល់កម្ពុជាធ្ងន់ធ្ងរ។
លោក ទៀ បាញ់ បញ្ជាក់ថា ការកសាងនូវមូលដ្ឋានសមុទ្ររាមនេះ គឺដើម្បីការពារអធិបតេយ្យកម្ពុជា បូរណភាពទឹកដីកម្ពុជា បង្កើនសមត្ថភាពកងទ័ពកម្ពុជា ខណៈគម្រោងការកសាងនេះបានត្រៀមយូរណាស់មកហើយ ប៉ុន្តែទើបអនុវត្តយ៉ាងសកម្មក្នុងរយៈពេលចុងក្រោយនេះ ដោយសារតែកម្ពុជាមានតម្រូវការចាំបាច់។
កាលពីថ្ងៃទី១ ខែកញ្ញា ឆ្នាំ២០២២ ក្រសួងការពារជាតិចិន បានផ្តល់ជំនួយឥតសំណងជារថយន្តស៊េរីទំនើបចំនួន ១៥០គ្រឿង ដែលផលិតនៅប្រទេសចិន និងសម្ភារៈការិយាល័យមួយចំនួនដល់ក្រសួងការពារជាតិកម្ពុជា ក្រោមហេតុផលថា កងទ័ពកម្ពុជា-ចិនជាបងប្អូន ស្គាល់ចិត្ត ស្គាល់ថ្លើម និងរួមសុខរួមទុក្ខជាមួយគ្នា និងជាការជួយគាំទ្រដល់ការរៀបចំកិច្ចប្រជុំរដ្ឋមន្ត្រីការពារជាតិ-អាស៊ាន និងកិច្ចប្រជុំពាក់ព័ន្ធផងដែរ។
ស្ថាបនិកអង្គការអភិវឌ្ឍន៍ផ្នត់គំនិត លោក សេក សុជាតិ បានប្រាប់សារព័ត៌មាន The Cambodia Daily នៅថ្ងៃទី២ កញ្ញា នេះថា ការរិះគន់ទៅកាន់សហរដ្ឋអាមេរិករបស់ក្រសួងការពារជាតិកម្ពុជា ជុំវិញមូលដ្ឋានទ័ពជើងទឹករាម ដែលគេកំពុងតែសង្ស័យអំពីវត្តមានកងទ័ពចិន ស្របពេលដែលចិនបានផ្តល់អំណោយជារថយន្តដ៏ច្រើនសន្ធឹកសន្ធាប់បែបនេះ គឺជារឿងដែលមិនគួរឱ្យកើតមាននោះទេ ព្រោះថាកម្ពុជាគួរប្រើឥរិយាបថនយោបាយការទូតរបស់ខ្លួនឱ្យល្អទាំងសងខាងរវាងមហាអំណាចទាំងពីរនេះ នោះទើបជាផលចំណេញសម្រាប់កម្ពុជា។
លោក សេក សុជាតិ លើកឡើងថា បើគេសង្ស័យពីមូលដ្ឋានយោធាជើងទឹករាម កម្ពុជាគួរតែផ្តល់ជាភស្តុតាងតាមលទ្ធភាពដែលខ្លួនមានបញ្ជាក់ទៅកាន់មហាអំណាចទាំងនោះ ដើម្បីឱ្យពួកគេអស់ការសង្ស័យ ព្រោះថាការបារម្ភរបស់មហាអំណាចទាំងនោះ ក៏មិនបំពានលើរដ្ឋធម្មនុញ្ញរបស់កម្ពុជាដែរ ហើយជាងនេះទៀត មូលដ្ឋានជើងទឹករាមក៏ជាចំណុចរសើបអំពីសន្តិសុខក្នុងតំបន់ថែមទៀត។
លោកបញ្ជាក់ថា ដោយឡែកបើនិយាយអំពីជំនួយវិញ សហរដ្ឋអាមេរិកក៏បានផ្តល់ជំនួយដល់កម្ពុជាមិនតិចដែរចាប់តាំងពីមានកិច្ចព្រមព្រៀងសន្តិភាពទីក្រុងប៉ារីស ឆ្នាំ១៩៩១ រហូតមកដល់ពេលនេះ។ ជាងនេះទៀត អាមេរិកក៏បានផ្តល់ឱ្យកម្ពុជានូវប្រព័ន្ធអនុគ្រោះពន្ធ GSP បន្ថែមទៀត ដែលជាកត្តាមួយជួយលើកស្ទួយឱ្យកម្ពុជារីកចម្រើនដូចសព្វថ្ងៃនេះ ប៉ុន្តែអ្វីដែលអាមេរិកចង់បានពីកម្ពុជានោះ គឺការរក្សាអព្យាក្រឹតរបស់ខ្លួនដូចដែលមានចែងក្នុងរដ្ឋធម្មនុញ្ញតែប៉ុណ្ណោះ។
កាលពីថ្ងៃទី១១ ខែឧសភា ឆ្នាំ២០២២ សភាជាន់ខ្ពស់របស់សហរដ្ឋអាមេរិក បានធ្វើសេចក្តីសម្រេចចិត្តមួយដែលបានកំណត់ឱ្យរដ្ឋាភិបាលកម្ពុជារក្សាអព្យាក្រឹត ដូចមានចែងក្នុងរដ្ឋធម្មនុញ្ញរបស់ខ្លួន ធម្មនុញ្ញអង្គការសហប្រជាជាតិ និងតាមគោលការណ៍នៃកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ ដើម្បីធានានូវដំណើរការប្រជាធិបតេយ្យនៅកម្ពុជា ការគោរពសិទ្ធិមនុស្ស និងធ្វើឱ្យជាក់ច្បាស់ពីមូលដ្ឋានទ័ពជើងទឹករាមដែលគេសង្ស័យពីវត្តមានកងទ័ពចិននៅទីនោះផងដែរ៕